پرەزيدەنتتىككە كانديداتتاردىڭ مەملەكەتتىك ءتىلدى ەركىن مەڭگەرگەندىگى لينگۆيستيكالىق كوميسسيا وتىرىستارىندا جان-جاقتى انىقتالدى. وسىعان وراي پرەزيدەنتتىككە كانديدات تولەۋتاي راقىمبەكوۆتىڭ, جامبىل احمەتبەكوۆتىڭ جانە ءامىرجان قوسانوۆتىڭ كونستيتۋتسيا مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ تالاپتارىنا سايكەستىگى انىقتالىپ, ولارعا ازاماتتاردىڭ قولدارىن جيناۋ ءۇشىن قول قويۋ پاراقتارى بەرىلدى.
سول سياقتى پرەزيدەنتتىككە كانديداتتار ورتالىق سايلاۋ كوميسسياسىنا كىرىستەرى مەن مۇلكi تۋرالى دەكلاراتسيا تاپسىرعانى تۋرالى مەملەكەتتىك كىرىستەر ورگانىنىڭ انىقتاماسىن, ولاردى تىركەۋگە كەدەرگى كەلتىرەتىن اۋرۋلاردىڭ جوقتىعى تۋرالى مەديتسينالىق قورىتىندى مەن اۋماقتىق سايلاۋ كوميسسيالارىنىڭ پرەزيدەنتتىككە كانديداتتاردى قولداپ جيناعان ازاماتتاردىڭ قولدارىن تەكسەرۋ ناتيجەلەرى تۋرالى حاتتامالارى ۇسىنىلدى. ماسەلەن, وسى حاتتامالارعا ءسايكەس پرەزيدەنتتىككە كانديدات تولەۋتاي راقىمبەكوۆتى قولداپ قازاقستاننىڭ 15 وڭىرىنەن 122 309 ازاماتتىڭ قولى جينالدى, ولاردىڭ 120 754-ءى راس دەپ تانىلدى. وسىلايشا تولەۋتاي راقىمبەكوۆتى پرەزيدەنتتىككە كانديدات رەتىندە تىركەۋگە قاجەتتى بارلىق قۇجاتتار ورتالىق سايلاۋ كوميسسياسىنا ۇسىنىلدى جانە ولارعا قويىلاتىن تالاپتارعا تولىق سايكەس كەلەتىندىگى بەلگىلەندى.
مىنە, وسىلاردىڭ نەگىزىندە «2019 جىلعى 9 ماۋسىمعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا تولەۋتاي راقىمبەكوۆ پەن جامبىل احمەتبەكوۆتى جانە ءامىرجان قوسانوۆتى قازاقستان رەسپۋبليكاسى پرەزيدەنتتىگىنە كانديدات رەتىندە تىركەۋ تۋرالى» جەكە-جەكە قاۋلى قابىلدانىپ, ولارعا ءتيىستى كۋالىك بەرىلدى.
بۇدان كەيىن ورتالىق سايلاۋ كوميسسياسىنىڭ مۇشەسى زاۋرەش بايمولدينا ءوز بايانداماسىندا «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 20-2-بابىنا سايكەس شەت مەملەكەتتەردىڭ, حالىقارالىق ۇيىمداردىڭ بايقاۋشىلارىن اككرەديتتەۋدى ورتالىق سايلاۋ كوميسسياسى سىرتقى ىستەر مينيسترلىگىنىڭ ۇسىنۋى بويىنشا جۇزەگە اسىرادى», دەدى. 2019 جىلعى 29 ساۋىردە, 2 جانە 3 مامىردا سىرتقى ىستەر مينيسترلىگىنەن 45 بايقاۋشىنى اككرەديتتەۋگە ۇسىنىستار كەلىپ تۇسكەن. ولاردىڭ بارلىعى اككرەديتتەۋگە شىعارىلىپ وتىر. ولاردىڭ ىشىنەن: 7 بايقاۋشى – تاۋەلسىز مەملەكەتتەر دوستاستىعىن, 22 بايقاۋشى – تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ پارلامەنتارالىق اسسامبلەياسىنان; 12 بايقاۋشى ەۋروپاداعى قاۋىپسىزدىك جانە ىنتىماقتاستىق ءجونىندەگى ۇيىمنىڭ دەموكراتيالىق ينستيتۋتتار جانە ادام قۇقىقتارى ءجونىندەگى بيۋروسى ميسسياسىنان, 4 بايقاۋشى – يسلام ىنتىماقتاستىعى ۇيىمى ميسسياسىنان اككرەديتتەلمەك.
بۇدان ءارى زاۋرەش بايمولدينا ەقىۇ/دياقب مەن تمد ميسسيالارىنىڭ اقپاراتىنا سايكەس سايلاۋعا 700-دەن استام قىسقا مەرزىمدى بايقاۋشىنى جىبەرۋ جورامالدانىپ وتىرعانىن جانە اككرەديتتەۋگە ۇسىنىستاردىڭ تۇسۋىنە وراي بايقاۋشىلار جونىندەگى دەرەكتەر جاڭارتىلاتىنىن ايتىپ ءوتتى.
سونداي-اق بۇگىنگى كۇنى سىرتقى ىستەر مينيسترلىگىنە سايلاۋدى جاريا ەتۋ ءۇشىن شەتەلدىك تىلشىلەردەن 53 ءوتىنىم تۇسكەن. جالپى العاندا, قازىرگى كۇنى سىرتقى ىستەر مينيسترلىگىندە تۇراقتى نەگىزدە 28 شەتەلدىك بۇقارالىق اقپارات قۇرالىنىڭ 94 جۋرناليسى اككرەديتتەلدى. سوعان سايكەس ميسسيالاردىڭ باسشىلارى بولىپ: تمد-دان بايقاۋشىلار ميسسياسى – تمد اتقارۋشى كوميتەتىنىڭ توراعاسى – اتقارۋشى حاتشىسى سەرگەي لەبەدەۆ, تمد قاتىسۋشى مەملەكەتتەردىڭ پارلامەنتارالىق اسسامبلەياسىنان بايقاۋشىلار توبى – باس حاتشى – تمد پاا كەڭەسى حاتشىلىعىنىڭ باسشىسى دميتري كوبيتسكي, ەقىۇ/دياقب سايلاۋدى بايقاۋ جونىندەگى ميسسياسى – ۋرشۋلا گاتسەك (پولشانىڭ ەۋروپا كەڭەسىندەگى بۇرىنعى ەلشىسى, پولشانىڭ نيۋ-يوركتەگى باس كونسۋلى, سەيم دەپۋتاتى), شانحاي ىنتىماقتاستىق ۇيىمىنان بايقاۋشىلار ميسسياسى – شانحاي ىنتىماقتاستىق ۇيىمىنىڭ باس حاتشىسى ۆلاديمير يماموۆيچ نوروۆ; يسلام ىنتىماقتاستىعى ۇيىمىنان بايقاۋشىلار ميسسياسى – ەلشى, يسلام ىنتىماقتاستىعى ۇيىمىنىڭ ساياسي ماسەلەلەر جونىندەگى دەپارتامەنت ديرەكتورى – ماحمۇد ءال رايسي (ومان) بەكىتىلدى.
