قۇمار ويىنداردى ۇيىمداستىرۋ ارقىلى ونى جەكە باسىنىڭ پايدا تابۋ كوزىنە اينالدىرعاندار دا بار. الايدا ولاردىڭ سول قۇمار ويىندارىنىڭ قۇرىعىندا قىلعىنىپ كەتىپ جاتقان تالاي ادامنىڭ تاعدىرى بار ەكەندىگىن دە ويلاساق ەتتى. وسى ورايدا ءبىزدىڭ بيزنەستىڭ مۇددەسىن ويلايمىز دا, ادامنىڭ مۇددەسىن, ادامنىڭ تاعدىرىن, سونىڭ ىشىندە جاس جەتكىنشەكتەردىڭ جاعدايىن ويلامايتىنىمىز قىنجىلتادى.
قازاقستانداعى قۇمار ويىنداردىڭ ورتالىعىن قاپشاعاي قالاسى مەن بۋرابايعا شوعىرلاندىرۋ جونىندە شەشىم قابىلدانعان كەزدە وسى ءتوڭىرەكتىڭ حالقى بۇعان نارازى دا بولدى. وسى ورايدا 2012 جىلى سەنات دەپۋتاتى رەتىندە بۋراباي كەنتىندەگى «كازينو» ويىندارىن بۋرابايدىڭ شەت جاعىنا شىعارۋ جونىندە ۇكىمەتكە دەپۋتاتتىق ساۋال جولداعان ەدىم. ۇكىمەت بۇل ۇسىنىسىمدى دۇرىس دەپ ساناپ, بۋراباي كەنتىندەگى قۇمار ويىندار شەتكە شىعارىلىپ تاستالدى.
وسى جايدى جۋىردا بۋرابايدا بولعانىمدا ءبىر اقساقال ەسىمە سالدى. «شىراعىم, ساعان راحمەت! مىنا بۋرابايداعى «جىن-ويناقتى» جاپقىزىپ, شەتكە شىعارتتىڭ-اۋ! وسىندا قانشاما جاس سول قۇمار ويىنداردىڭ قۇربانى بولىپ كەتتى. تىرنەكتەپ جيعان مال-مۇلكىنەن ۇتىلىپ, ءتىپتى اجىراسىپ كەتكەن وتباسىلار دا بولدى», دەپ الگى اقساقال ءمان-جايدى جايىپ سالدى.
اقساقالدىڭ بۇل ايتقانى ەسىمە مىنا جايدى تۇسىرگەنى بار. قۇمار ويىنداردىڭ ءىرى ورتالىقتارىنىڭ ءبىرى – «كازينو» «مەنەدجەرلەرى», ياعني پىسىقايلارى قازىر وسى قاراوتكەل, كوكشەتاۋ, قىزىلجار توڭىرەگىندەگى قالتالى دەگەن, بولماسا ءىرى شارۋاشىلىقتارى بارلاردىڭ وزدەرىمەن, بولماسا ولاردىڭ بالالارىمەن تانىسىپ, «دوستىق» بايلانىس ورناتىپ, قۇمار ويىنعا تارتىپ, ەلىكتىرىپ الادى ەكەن. كەيبىرەۋلەرىنىڭ قالتالارىندا پۇلدارى بولماسا, «كۇزدە جيناپ الار استىقتىڭ» ەسەبىنەن دە ويناتا بەرەدى. سونداي ءبىر باسشى ءوز بالاسىنىڭ ۇتىلىسى ەسەبىنەن شارۋا قوجالىعىنىڭ بار جيعان-تەرگەن استىعىن وتكىزىپ جىبەرىپ, ارتى داۋ-دامايعا ۇلاسقانى دا بار.
ويىنقۇمارلىق جۇرە بارىپ جابىساتىن دەرت پە دەپ ويلايمىن. ماماندار قازىر وسى ويىنقۇمارلىقتى لۋدومانيا دەگەن پسيحولوگيالىق دەرتكە جاتقىزىپ ءجۇر. تاعى دا سول ماماندار وسى لۋدومانيا دەرتىنىڭ ماسكۇنەمدىكپەن جانە ناشاقورلىقپەن بىردەي ەكەندىگىن دالەلدەگەن كورىنەدى. كەز كەلگەن ادامنىڭ بويىنا جابىسقان بۇل دەرتتىڭ العاشقى بەلگىلەرى بويىنشا قۇمار ويىنشىنىڭ كوڭىل كۇيى بولمايدى ەكەن. بارىنەن تۇڭىلۋگە ۇشىرايدى. قۇمار ويىنعا ابدەن تاۋەلدى بولعان جاس بالا, بولماسا جاسوسپىرىم بارا-بارا اتا-اناسىنىڭ قالتاسىنان, ەرەسەك جاندار وتباسىنان, جۇمىس ىستەپ جۇرگەن جەرىنەن اقشا ۇرلاۋدى باستايدى. قارىز الىپ, قارىزعا دا باتادى. بۇدان سوڭ وتىرىك ايتىپ, وتىرىكپەن ءومىر سۇرەدى. بۇل كەسەلدىڭ سوڭى قايعىمەن دە اياقتالارى بار...
ەندىگى ارادا وسى ويىنقۇمارلىق دەرتى ءبىزدىڭ ءوسىپ كەلە جاتقان جاس ۇرپاعىمىزدىڭ كەسەلىنە اينالا ما دەپ تە قاۋىپتەنەمىن. قازىرگى بالالاردىڭ ويىن الاڭدارىنداعى ءتۇرلى اۆتوماتتاردى الىپ قاراڭىز, بالا ساناسى وسى ارادا ۋلانىپ جاتىر. سونداي-اق ءالى ءتىلى شىقپاعان ءسابي دە قولىنداعى ۇيالى تەلەفونداعى ءتۇرلى ويىندارعا ەسى كەتە الداناتىن بولدى. قازىرگى اتا-انالاردىڭ جىلاعان, مازاسىزدانعان بالالارىن ۋاتاتىن دا, الداندىراتىن قۇرال وسى قالتافون بولىپ بارادى. ءتىپتى كومپيۋتەر ويىنى, بۋكمەكەرلىك ۇتىستار, جاي عانا ويىن اۆتوماتتارىنىڭ ءوزى قانىمىزدى قىزدىرىپ قانا قويماي, جانىمىزدى بۇزىپ جاتقاندىعى دا الاڭدايتىن جاي. سوندا ءبىز ءوز بالالارىمىزدى تۋا سالا قۇمار ويىنعا بەيىمدەپ جاتقان جوق پا ەكەنبىز؟! قازاقتىڭ ءبىر ويلاناتىن تۇسى, مىنە, وسى!
جۋىردا قازاقستان پرەزيدەنتى قاسىم-جومارت توقاەۆ نۇر-سۇلتان قالاسىنداعى ويىن-ساۋىق جانە مەيرامحانالار جۇمىسىن تۇنگى ساعات ەكىدە توقتاتۋ كەرەك دەگەندى ايتتى. وتە ورىندى! ويتكەنى قازاقستاننىڭ كەز كەلگەن قالالارىندا تاڭعى ساعات 4-5-كە دەيىن جۇمىس ىستەيتىن ويىن-ساۋىق ورىندارى بار. بۇلاردان ىشكەن شاراپتان, تارتقان قورقوردان ميى اينالىپ, ەسەڭگىرەپ شىعىپ بارا جاتقان قازاقتىڭ جاپ-جاس قىزدارى مەن جىگىتتەرىن كورىپ, جۇرەگىڭنىڭ قان جىلايتىنى بار. سوندىقتان جالعىز نۇر-سۇلتانداعى ەمەس, قازاقستاننىڭ بارلىق قالاسى مەن كەنتىندەگى جانە ەلدىمەكەنىندەگى تويلار مەن ءتۇرلى ەلىكتىرۋشى شارالاردى تاڭ اتقانشا وتكىزە بەرمەۋدىڭ ورتاق ءبىر ءتارتىبىن بەلگىلەۋ كەرەك.
ايتا بەرسەڭ ويىنقۇمارلىقتىڭ قاسىرەتى مەن زاردابى جايلى كوپ مىسالدار كەلتىرۋگە بولادى. ەندىگى ماسەلە سول كەسەلدەن ارىلۋ جانە ءوسىپ كەلە جاتقان ۇرپاعىمىزدى ساقتاپ قالۋدا بولسا كەرەك. وسى ورايدا ويىنقۇمارلىقتىڭ اۋىر زاردابى جايلى كوبىرەك ايتۋ كەرەك. جانە دە بۇل كەسەلدەن وزدەرىن دە, بالالارىن دا ساقتاۋدىڭ جولدارىن ايتىپ, جازىپ وتىرۋعا ءتيىستىمىز. ويتكەنى حالىق بۇل دەرتتىڭ ءالى نە ەكەندىگىن جەتىك بىلە دە بەرمەيدى. ەندىگى ارادا ءبىز ءوز ۇرپاعىمىزدى ءوز حالقىمىزدىڭ اسىل سالتى مەن ءداستۇرى نەگىزىندە تاربيەلەۋدى قولعا العانىمىز ءجون.
جابال ەرعاليەۆ,
جازۋشى-دراماتۋرگ, قازاقستاننىڭ ەڭبەك سىڭىرگەن قايراتكەرى
كوكشەتاۋ
