«قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» قازاقستان رەسپۋبليكاسى كونستيتۋتسيالىق زاڭىنىڭ 11-بابىنا سايكەس پارلامەنت سەناتىندا جاڭا كونسۋلتاتيۆتىك - كەڭەسشى ورگان-بيۋدجەت زاڭناماسىن جەتىلدىرۋ جونىندەگى كەڭەس قۇرىلدى.
كەڭەس قۇرامىنا سەنات دەپۋتاتتارى, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ توراعاسى ناتاليا گودۋنوۆا, ۇلتتىق ەكونوميكا ءمينيسترى ر.دالەنوۆ, قارجى ءمينيسترىنىڭ ءبىرىنشى ورىنباسارى ب.شولپانقۇلوۆ جانە باسقالار ەندى.
كەڭەستىڭ نەگىزگى مىندەتتەرىنىڭ ءبىرى بيۋدجەت پروتسەسىنىڭ تيىمدىلىگىن ارتتىرۋ, بيۋدجەتتى قالىپتاستىرۋ ۇدەرىستەرىن قايتا قاراۋ, بيۋدجەتارالىق قاتىناستاردى جەتىلدىرۋ بويىنشا ۇسىنىمدار ازىرلەۋ, سونداي-اق بيۋدجەت ۇدەرىستەرىنە بارلىق قاتىسۋشىلارمەن پارلامەنتتىڭ ءوزارا ءىس-قيمىلىن كۇشەيتۋ جونىندەگى ماسەلەنى قاراۋ بولىپ تابىلادى.
بۇگىن داريعا نازارباەۆانىڭ توراعالىق ەتۋىمەن كەڭەستىڭ ءبىرىنشى وتىرىسى ءوتتى.
ۇلتتىق ەكونوميكا ءمينيسترى رۋسلان دالەنوۆ سەناتورلارعا وسى سالانى جەتىلدىرۋ جوسپارلارى تۋرالى ايتىپ بەردى. ولاردىڭ ىشىندە ستراتەگيالىق جوسپارلاۋدىڭ جاڭا نىساندارىن ەنگىزۋ, جۇمسالعان شىعىستاردىڭ ەكونوميكالىق قايتارىمىن باعالاۋ, وڭىرلەردىڭ دامۋىن ىنتالاندىرۋ ءۇشىن بيۋدجەتتىك قاتىناستاردى جەتىلدىرۋ تاقىرىپتارى بار.
سەنات توراعاسى ايماقتاردىڭ سالالىق ەرەكشەلىكتەرىن ەسكەرە وتىرىپ, شاعىن جانە ورتا بيزنەستى دامىتۋعا, وڭىرلەردىڭ «مۇقتاجدىق كارتاسىن» ازىرلەۋگە, بيۋدجەت قاراجاتىن ءتيىمسىز پايدالانعانى ءۇشىن قىلمىستىق جاۋاپتىلىقتى بىرگە الا وتىرىپ, جاۋاپكەرشىلىكتى كۇشەيتۋگە, ەسەپ كوميتەتىنىڭ ءرولىن نىعايتۋعا, حالىقتى جۇمىسپەن قامتۋ باعدارلاماسىن قايتا قۇرۋعا, بيۋدجەت جىلىن قايتا قاراۋعا باعىتتالعان بىرقاتار سىن-ەسكەرتپەلەر مەن ۇسىنىستار ايتتى.
داريعا نازارباەۆا ۇلتتىق ەكونوميكا مينيسترلىگىنە 17 ماۋسىمعا دەيىن كەڭەس وتىرىسى بارىسىندا ايتىلعان ۇسىنىستاردى ەسكەرە وتىرىپ, بيۋدجەت زاڭناماسىن جەتىلدىرۋ جونىندەگى شارالاردى ىسكە اسىرۋ جونىندەگى جول كارتاسىنىڭ جوباسىن ازىرلەۋدى ۇسىندى. ول ءۇشىن ارنايى جۇمىس توبى قۇرىلدى.
