بۇگىندە بۇل قوعامدىق ينستيتۋت وزگە ەلدەر ءۇشىن ۇلتارالىق كەلىسىمنىڭ ۇلگىسىنە اينالدى. بىرلەسسەك, بىرگە بولساق, بارلىق حالىقتى ويلاساق قانا ۇلكەن جەڭىستەرگە جەتەمىز.
ەلىمىزدەگى تۇڭعىش دوستىق ءۇيى شىعىستا – وسكەمەن قالاسىندا 1992 جىلى اشىلعانى بەلگىلى. ول كەزدە 9 ۇلتتىق بىرلەستىك قانا بولعان-دى. ال قازىر وڭىرىمىزدە 13 دوستىق ءۇيى بار, ولاردىڭ قۇرامىندا 123 ەتنومادەني بىرلەستىك بەلسەندى جۇمىس ىستەۋدە. مەملەكەت تاراپىنان ۇلتتاردىڭ مادەنيەتىن, سالت-ءداستۇرىن, ءتىلىن دامىتۋعا بارلىق جاعداي جاسالىپ كەلەدى. ول جەردە نەمىس, تاتار, بەلورۋس, چەشەن, ارميان, ازەربايجان, ۋكراين, يۆريت, كورەي تىلدەرى وقىتىلادى.
سوڭعى ەكى جىلدا وبلىس اكىمى, وبلىستىق قازاقستان حالقى اسسامبلەياسىنىڭ ءتوراعاسى دانيال احمەتوۆتىڭ باستاماسىمەن «شىعىس قازاقستان ەتنوستارىنىڭ مادەني مۇراسى» جوباسى اياسىندا ءوڭىر ەلدى مەكەندەرىندە ساقتالعان قازاق, ورىس جانە تاتار فولكلورىن زەرتتەۋگە جەتكىلىكتى قارجى ءبولىندى. وبلىس باسشىلىعى تاراپىنان ەتنومادەني ءبىرلەستىكتەرگە ەتنوستىق مەرەكەلەردى وتكىزۋگە, كورمەلەردى, سەمينارلاردى, شەبەرلىك ساباقتارىن, كونفەرەنتسيالاردى ۇيىمداستىرۋعا, ۇلتتىق كيىم-كەشەكتەر تىگۋگە ءجاردەمدەسىپ تۇرادى.
1996 جىلدان بەرى جۇمىس ىستەپ كەلە جاتقان, بۇگىندە ءوزىم جەتەكشىلىك ەتەتىن وبلىستىق ازەربايجان ەتنومادەني ءبىرلەستىگىنە 2500 ادام مۇشە. ءبىزدىڭ بىرلەستىگىمىزدىڭ «ريتم» دەگەن بي توبى بار. وڭىردەگى, قالاداعى بارلىق ءىس-شاراعا قاتىسىپ جۇرەمىز. وسكەمەندەگى دوستىق ءۇيى – قوعامدىق كەلىسىم ورتالىعى جانىنداعى جاڭعىرۋ مەكتەبىندە ايماقتاعى ۇلتتار مەن ۇلىستاردىڭ تىلدەرى تەگىن وقىتىلادى. ازەربايجان ءتىلى دە اپتاسىنا ءبىر رەت وقىتىلادى. بىزگە ءوز ءتىلىمىزدى, ءدىلىمىزدى, سالت-ءداستۇرىمىزدى وقىپ-ءۇيرەنۋگە مۇمكىندىك بەرىپ وتىرعانى ءۇشىن مەملەكەتكە العىسىمىز شەكسىز.
ءتىل دەگەننەن شىعادى, جالپى, شىعىستاعى ازەربايجان جاستارىنىڭ كوبى قازاق ءتىلىن جاقسى بىلەدى. قانشا دەگەنمەن ءتۇبى ءبىر تۇركى جۇرتىنىڭ بالاسىمىز عوي. مەنىڭ زايىبىم – قازاق قىزى. دوستىق, تاتۋلىق, بىرلىك-بەرەكە وسىدان باستالماي ما؟ ماعان ەلىمىزدەگى وزگە دياسپورا وكىلدەرى ءبىر ءۇيدىڭ بالالارىنداي كورىنەدى. ءبىر-بىرىمەن ارالاسىپ, ءبىتە قايناسىپ كەتكەن. وسى ءبىرلىگىمىزدەن, وسى ىرىس-ىنتىماعىمىزدان ايىرىلماساق ەكەن. بارشالارىڭىزدى 1 مامىر – قازاقستان حالقىنىڭ ءبىرلىگى كۇنى مەرەكەسىمەن قۇتتىقتايمىن.
ەلۆين دەميرچيەۆ,
وبلىستىق ازەربايجان ەتنومادەني بىرلەستىگىنىڭ توراعاسى
وسكەمەن
