قاراعاندى وبلىسىندا وبلىستىق, قالالىق جانە اۋداندىق دەڭگەيدەگى 55 ەتنومادەني بىرلەستىك جۇمىس ىستەيدى. قالالار مەن اۋدانداردا وبلىستىق قوعامدىق بىرلەستىكتەردىڭ 4 فيليالى جانە 23 باستاماشىل توبى بار. بۇل ۇيىمداردا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىن, « ۇلى دالانىڭ جەتى قىرى» جانە قازاقستان حالقى اسسامبلەياسىنىڭ «قازاقتانۋ» جوباسىن جۇزەگە اسىرۋ ماقساتىندا ءتۇرلى شارالاردى تۇراقتى ءوتكىزۋ ۇردىسكە اينالعان.
كۇنى كەشە وتكەن قازاقستان حالقى اسسامبلەياسىنىڭ كەزەكتى سەسسياسىندا ۇيىمنىڭ ءتوراعاسى, ەلباسى نۇرسۇلتان نازارباەۆ: «حالىقتىڭ قالاۋىمەن قۇرىلعان اسسامبلەيا بەدەلدى كونستيتۋتسيالىق ورگانعا اينالدى. قحا مەملەكەتتىك قۇرىلىسقا بارلىق قازاقستاندىق ەتنوستار مەن ءدىني كونفەسسيالاردى تارتا ءبىلدى. اسسامبلەيانى مەملەكەتتىڭ ساياسي جۇيەسىمەن استاستىرا وتىرىپ, ءبىز ۇلتتىق بىرلىكتە ءوزىمىزدىڭ ايرىقشا باعىتىمىزدى تاڭدادىق», دەپ ورىندى اتاپ ءوتتى.
ءبىزدىڭ ەلىمىزدە تاتۋلىق پەن كەلىسىمنەن بولەك, قازاقستاندىقتاردىڭ بيزنەسى مەن ينۆەستورلار ءۇشىن دە جان-جاقتى جاعدايلار جاسالعان. وسى بەرەكەلى تىرلىكتى كوزىمەن كورگەن ءبىزدىڭ ليتۆالىق دوستارىمىزدىڭ ءبىرى قاراعاندى وبلىسىنىڭ ورتالىعىندا «ليتۆا اۋلاسى» دەپ اتالاتىن كەرەمەت عيمارات سالدى. قازىرگى ۋاقىتتا «ليتۋانيكا» ليتۆا ءبىرلەستىگىنىڭ مۇشەلەرى بۇل جەردە باس قوسىپ, بارلىق مەرەكەلەردى اتاپ وتەدى.
ەتنومادەني بىرلەستىكتەر قاراعاندى قالاسىندا بوي كوتەرگەن «دوستىق ءۇيى» سىندى عاجايىپ عيمارات ءۇشىن ەلىمىزدىڭ تۇڭعىش پرەزيدەنتى نۇرسۇلتان ءابىش ۇلى نازارباەۆقا زور العىسىمىزدى بىلدىرەمىز. مۇنداي مارتتىك پەن باتىلدىقتى ءبىزدىڭ سوڭىمىزدان ەرگەن جاڭا بۋىن وكىلدەرى دە جاقسى سەزىنەدى. وسى ورايدا بيىلعى جىلدىڭ «جاستار جىلى» دەپ اتالۋىنىڭ دا تەگىن ەمەستىگىن ايتقىم كەلەدى. ءبىز جاستارعا مەملەكەتتى, بيزنەستى جانە وتباسىن قۇرۋ ىسىندە ءوزدەرىن كورسەتە الاتىن تاماشا ءمۇمكىندىك بەرىپ وتىرمىز. بولاشاقتا جاس بۋىننىڭ بىزگە ريزاشىلىقپەن جانە قۇرمەتپەن قارايتىنىنا نىق سەنىمدىمىز.
ءبىز, قازاقستاندا تۇراتىن ليتۆالىقتار, كەزىندە ءوز باسىنداعى اۋىر جاعدايعا قاراماستان, وزگە ۇلتتارعا كومەك قولىن سوزعان قايىرىمدى قازاق حالقىنا ارقاشان قۇرمەتپەن, زور ريزاشىلىق سەزىمىمەن قارايمىز. ەلىمىزدەگى تىنىشتىق پەن تۇراقتىلىقتى قازاق حالقىنىڭ باۋىرمالدىعى مەن دارقاندىعىنا تاعدىردىڭ بەرگەن ۇلكەن سىيى رەتىندە قابىلدايتىندىعىمىز دا سونىڭ جارقىن بەلگىسى. سالت-ءداستۇرى ساقتالعان, ءتىلى مەن دىنىنە ەركىندىك بەرىلگەن كوپۇلتتى, كوپ كونفەسسيالى قازاقستان حالقى ەلىمىزدەگى بەيبىت ءومىردىڭ تىرەگى سانالاتىن تاتۋلىق پەن كەلىسىمدى ساقتاۋعا ەڭ ءبىرىنشى كەزەكتە مۇددەلى دەپ نىق سەنىممەن ايتۋعا بولادى.
ۆيتالي تۆاريوناس,
قاراعاندى وبلىسى قازاقستان حالقى اسسامبلەياسى قايىرىمگەرلەر مەن مەتسەناتتار كلۋبىنىڭ توراعاسى, «ليتۋانيكا» ليتۆا بىرلەستىگىنىڭ توراعاسى
قاراعاندى
