ۇيىمداستىرۋشىلاردىڭ سوزىنشە بايقاۋدىڭ باستى ماقساتى قازاق ءتىلىن كرەاتيۆتى وقىتۋدىڭ ۇزدىك ءادىس-تاسىلدەرىن انىقتاۋ, قازاق ءتىلىن كرەاتيۆتى وقىتۋدىڭ بىرىڭعاي بازاسىن دايىنداۋ, مەملەكەتتىك ءتىلدى ۇيرەتۋدىڭ ەرەكشە جانە قالىپتان تىس تاسىلدەرىن باق ارقىلى كوپشىلىككە ناسيحاتتاۋ.
بايقاۋعا رەسپۋبليكامىزدىڭ وڭتۇستىك, سولتۇستىك, ورتالىق, شىعىس جانە باتىس وڭىرلەرىنەن, اتاپ ايتقاندا نۇر-سۇلتان, شىمكەنت, الماتى, تالدىقورعان, سەمەي, وسكەمەن, پەتروپاۆل, پاۆلودار, قوستاناي, كوكشەتاۋ, قاراعاندى, اتىراۋ, ورال سىندى قالالاردىڭ ءبىلىم وردالارىنان جالپى سانى 43 بىلىكتى دە تاجىريبەلى وقىتۋشىلار مەن ۇستازدار قاتىسقان.
شارانىڭ ءبىرىنشى كەزەڭىندە قاتىسۋشىلار قازاق ءتىلىن كرەاتيۆتى وقىتۋدا قولداناتىن ءادىس-تاسىلدەرى ۇسىنىلعان ۆيدەو ساباقتارىن فەيسبۋك الەۋمەتتىك جەلىسىندە جاريالاپ, ەكىنشى كەزەڭگە جولداما الۋ مۇمكىندىگىنە يە بولدى. ەكىنشى كەزەڭگە وتكەندەر 18 ءساۋىر كۇنى بەلگىلى ءبىر تاقىرىپ بويىنشا ەسسە جازۋ سايىسىندا ءوز باقتارىن سىنادى. بايقاۋ ناتيجەسى بويىنشا قازاق ءتىلىن كرەاتيۆتى وقىتۋدىڭ ۇزدىك ءادىس-تاسىلدەرى مەن يننوۆاتسيالىق يدەيالار ۇسىنعان جانە ەسسە جازۋدا جوعارى ناتيجە كورسەتكەن جەڭىمپازدار انىقتالىپ, ءتۇرلى دارەجەلى ديپلومدارمەن, سىيلىقتارمەن, سونداي-اق «ۇزدىك ەسسە», «ۇزدىك ادىسكەر», «كرەاتيۆتى مۇعالىم», «جاڭاشىل پەداگوگ», «ۇزدىك ۆيدەو», «ۇستاز برەندى», «جاقسى ءسوز – جارىم ىرىس» نوميناتسيالارى بويىنشا ماراپاتتالدى.
بايقاۋدىڭ باس دەمەۋشىسى «ۆودومەتر» جشس ءىس-شارانىڭ وتۋىنە قارجىلاي قولداۋ كورسەتسە, مادەنيەت جانە سپورت مينيسترلىگى ءتىل كوميتەتى, شايسۇلتان شاياحمەتوۆ اتىنداعى «ءتىل-قازىنا» ۇلتتىق ورتالىعى, نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسى, مەملەكەتتىك ءتىلدى دامىتۋ قورى قۇندى سىيلاقتارىمەن دەمەۋشىلىك ەتكەن.
ەكى كەزەڭدىك سايىستان تۇراتىن بايقاۋ قورىتىندىسى بويىنشا ءى ورىندى سەمەي قالاسى م.اۋەزوۆ اتىنداعى پەداگوگيكالىق كوللەدجىنىڭ وقىتۋشىسى سارا قاليەۆا يەلەنسە, ءىى ورىندى نۇر-سۇلتان قالاسى №53 مەكتەپ-ليتسەيىنىڭ مۇعالىمى گۇلزات تۇرعىنقىزى جانە اتىراۋ قالاسى №13 مەكتەپ-گيمنازياسىنىڭ مۇعالىمى تۇرسىنگۇل عاريفوللاقىزى, ال ءىىى ورىندى «نازارباەۆ زياتكەرلىك مەكتەپتەرى» دەربەس ۇيىمىنىڭ نۇر-سۇلتان قالاسىنداعى حالىقارالىق مەكتەبىنىڭ مۇعالىمى ينديرا ابىلحانقىزى, قاراعاندى قالاسىنداعى نازارباەۆ زياتكەرلىك مەكتەبىنىڭ مۇعالىمى مەيرامگۇل مەيراشقىزى جانە نۇر-سۇلتان قالاسىنداعى زياتكەرلىك مەكتەبىنىڭ مۇعالىمى امانگۇل پىرىمجانقىزى قانجىعالارىنا بايلادى.
راۋان قايدار
