— ءلاززات مەيراشقىزى, ەلىمىزدە ازاماتتاردىڭ بارلىق ساناتىنا قانداي مەديتسينالىق كومەك تۇرلەرى تەگىن كورسەتىلەتىنىن جانە حالىقتىڭ جەكەلەگەن ساناتتارىنا كورسەتىلەتىن مەدكومەكتىڭ تۇرلەرى قانداي ەكەنىن ايتىپ بەرسەڭىز؟
— بۇگىنگى تاڭدا تەگىن مەديتسينالىق كومەكتىڭ كەپىلدەندىرىلگەن كولەمىنىڭ اياسىندا قازاقستان رەسپۋبليكاسىنىڭ ازاماتتارىنا, ورالماندارعا, شەتەلدىكتەرگە, قر اۋماعىندا تۇراقتى تۇراتىن ازاماتتىعى جوق ادامدارعا مەديتسينالىق كومەك كورسەتىلەدى. جالپى, تەگىن مەديتسينالىق كومەكتىڭ كەپىلدەندىرىلگەن كولەمى مەديتسينالىق كومەكتىڭ نەگىزگى تۇرلەرىن قامتيدى. بۇل - ورتا مەديتسينا قىزمەتكەرى كورسەتەتىن, دارىگەرگە دەيىنگى العاشقى مەديتسينالىق كومەك, جالپى تاجىريبە دارىگەرلەرى, تەراپەۆتەر, پەدياترلار كورسەتەتىن بىلىكتىلىكتى كومەك, بەلگىلى ءبىر ناقتى باعىت ماماندارى كورسەتەتىن مامانداندىرىلعان كومەك, جوعارى تەحنولوگيالىق مەديتسينالىق قىزمەتتەر جانە مەديتسينالىق-الەۋمەتتىك كومەك. مۇنىڭ بارلىعى تەگىن مەديتسينالىق كومەكتىڭ كەپىلدەندىرىلگەن كولەمىنە كىرەدى.
— كومەكتى ءبولۋ كەزىندە ازاماتتاردىڭ قانداي ساناتتارى العاشقى باسىمدىققا يە؟ قىمبات وپەراتسيالار ءۇشىن كۆوتا قالاي بولىنەدى؟ ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلارعا نەمەسە كوپ بالالى وتباسىلارعا جەكەلەگەن كەزەك بار ما؟
— مەديتسينالىق كومەكتىڭ ەكى ءتۇرى بار – شۇعىل جانە جوسپارلانعان. شۇعىل مەديتسينالىق كومەك كەزىندە ەشقانداي دا كەزەك بولمايدى, سەبەبى ونداي جاعدايلاردا ءاربىر ساعات, ءتىپتى ءار مينۋت ماڭىزدى. سوندىقتان دا شۇعىل مەديتسينالىق كومەك قاجەت بولعان كەزدە شۇعىل مەديتسينالىق كومەك الۋ ءۇشىن مەديتسينا ۇيىمىنا جۇگىنۋ كەرەك نەمەسە 103 نومىرىنە حابارلاسۋ قاجەت. جوسپارلى مەديتسينالىق كومەككە كەلەر بولساق, ول «ەمدەۋگە جاتقىزۋ بيۋروسى» پورتالى ارقىلى رەتتەلەدى. كورسەتكىشتەر بولعان جاعدايدا دارىگەر اۋرۋحاناعا جاتقىزۋ ءۇشىن جولداما بەرەدى جəنە ەمدەلۋشىنىڭ اتى-ءجونى مەن دياگنوزىن اقپاراتتىق جۇيەگە — «ەمدەۋگە جاتقىزۋ بيۋروسى» پورتالىنا ەنگىزەدى. ناۋقاستىڭ اۋرۋىنىڭ تۇرىنە سايكەس مەديتسينالىق قىزمەت كورسەتىلەتىن مەديتسينالىق ۇيىم انىقتالادى. ودان كەيىن, توسەك ورنىنىڭ بوساۋىنا, ونىڭ وتكىزۋ مۇمكىندىگىنە قاراي اۋرۋحاناعا جاتقىزۋ كۇنى بەلگىلەنەدى. اۋرۋحاناعا جاتقىزۋ كۇنى پورتالدا كورسەتىلگەن كۇنمەن سايكەس كەلمەيتىنى تۇسىنىكتى, اۋرۋحاناعا جاتقىزۋ كەيىنگە شەگەرىلۋى مۇمكىن. سوندىقتان دا ول جوسپارلى دەپ اتالادى. الايدا مەديتسينالىق كومەكتى كۇتۋ بارىسىندا ناۋقاستى اۋرۋحاناعا جاتقىزۋعا كىدىرتۋگە بولمايتىن جاعداي تۋىنداسا, ول شۇعىل كومەك كورسەتۋ ساناتىنا جاتقىزىلادى دا, بىردەن اۋرۋحاناعا جاتقىزىلادى. ستاتسيونارلىق ەمدەلۋگە جەكەلەگەن كەزەك تۋرالى ايتار بولسا, مۇندا دا مەديتسينالىق كورسەتكىشتەردى باسشىلىققا الۋ قاجەت: ششۇعىل نەمەسە جوسپارلى. جەكەلەگەن كەزەك جوق. دەگەنمەن, تەگىن مەديتسينالىق كومەكتىڭ كەپىلدەندىرىلگەن كولەمىندە حالىقتىڭ الەۋمەتتىك ءالسىز توپتارىنا ارنالعان الەۋمەتتىك كومەك تۇسىنىگى بار. بۇل قىمبات تۇراتىن مەديتسينالىق قىزمەتتەرگە قاتىستى: حالىقتىڭ وسى ساناتتارىنا باسىمدىق بەرىلگەن. ولارعا — بالالار, جۇكتى ايەلدەر, «التىن القامەن», «كۇمىس القامەن» ماراپاتتالعان كوپ بالالى انالار, 1, 2, 3 توپتاعى مۇمكىندىگى شەكتەۋلى جاندار, جاسى بويىنشا زەينەتتەگى ادامدار, ۇوس مۇگەدەكتەرى مەن اتاۋلى الەۋمەتتىك كومەك الۋشىلار كىرەدى. سوندىقتان كەز-كەلگەن مەديتسينالىق ۇيىمدا قىمبات تۇراتىن مەديتسينالىق قىزمەتكە جولداما ءبىرىنشى كەزەكتە وسى ساناتتارداعى ناۋقاستارعا بەرىلەدى. ماسەلەن, كومپيۋتەرلىك, ماگنيتتىك-رەزونانستىق, پوزيتروندىق-ەميسسيالىق توموگرافيا جانە ت.ب.
— 2019 جىلدىڭ ءى توقسانىندا شۇعىل كومەكتى قوسا العاندا قانشا ازامات مەملەكەتتىك كۆوتا بويىنشا ەمدەلدى؟
— وسى جىلدىڭ ءى توقسانىندا 1800 ادامعا جوعارى تەحنولوگيالىق مەديتسينالىق قىزمەت بويىنشا مەديتسينالىق كومەك كورسەتىلدى. مۇنداي قىزمەتتەردى بارلىق مەديتسينالىق ۇيىمدار كورسەتپەيدى. بۇل ءۇشىن ءتيىستى كادر الەۋەتى جانە ماتەريالدىق-تەحنيكالىق بازا بولۋى قاجەت. مىسالى, بۇل — بۇيرەك, ۇرىق جاسۋشالارىن ترانسپلانتاتسيالاۋ, سۇيەك وتكىزگىشتىگىن يمپلانتاتسيالاۋ. قوعامدىق دەنساۋلىق ساقتاۋ كوميتەتى ولشەمدەرگە سايكەستىگىنە بايلانىستى رۇقسات بەرەتىن جوعارى تەحنولوگيالىق قىزمەتتەر بار. ودان كەيىن, مەديتسينالىق الەۋمەتتىك ساقتاندىرۋ قورىمەن كەلىسىمشارت جاساسقاننان كەيىن بۇل قىزمەت تەگىن كورسەتىلەدى. بىزدە جوعارى تەحنولوگيالىق مەديتسينالىق قىزمەتتەر كولەمىن ارتتىرۋدىڭ وڭ ءۇردىسى بايقالادى. ەگەر جىلدىق كورسەتكىشتەردى سالىستىرساق, 2016 جىلى 71 مىڭعا جۋىق ادام جوعارى تەحنولوگيالىق مەديتسينالىق قىزمەت السا, ال وتكەن جىلى بۇل كورسەتكىش 105 مىڭ ادامدى قۇرادى. كوپتەگەن مەديتسينالىق ۇيىمدار جوعارى تەحنولوگيالىق مەديتسينالىق قىزمەتتەردى كورسەتە باستاسا, ولار كۆوتا جوق مامانداندىرىلعان مەديتسينالىق كومەك كاتەگورياسىنا وتە الادى, ياعني كولەمى بويىنشا شەكتەۋ جوق. ليميتتەر حالىقتىڭ سۇرانىستارىنا بايلانىستى انىقتالادى, ياعني, ەگەر وسى تەحنولوگيالارعا قاجەتتىلىك بولسا, مىسالى, مىڭداعان ناۋقاس ەندوپروتەزدەۋگە مۇقتاج بولسا, وندا وتكەن جىلدارى كورسەتىلەتىن قىزمەتتەردىڭ تاريحي كولەمى قاداعالانىپ, حالىق سانىنىڭ ءوسۋىن ەسكەرە وتىرىپ, قانشا ادامعا كومەك كورسەتىلۋى كەرەك بولاتىنى ەسەپتەلەدى. ياعني, بەلگىلى ءبىر قىزمەتتەردى شەكتەۋ كەزىندە مىندەتتى تۇردە وسى تەحنولوگياعا حالىقتىڭ سۇرانىسى ەسكەرىلەدى.
— مەديتسينالىق كومەكتى شۇعىل جانە جوسپارلى كۇتۋ كەزىندەگى شەكتى كۇتۋ مەرزىمدەرى قانداي؟
— شۇعىل جاعدايلار - جەدەل مەديتسينالىق كومەك قاجەت بولاتىن جاعدايلار, سوندىقتان ءمۇندا كۇتۋ ۋاقىتى جوق. جوسپارلى اۋرۋحاناعا جاتقىزۋ عانا «ەمدەۋگە جاتقىزۋ بيۋروسى» پورتالى ارقىلى جۇرگىزىلەدى. بۇگىنگى تاڭدا «ەمدەۋگە جاتقىزۋ بيۋروسى» پورتالىندا 44 مىڭ ادام جوسپارلى ەمدەلۋدى كۇتىپ ءجۇر. ەگەر اۋرۋ تۇرلەرىنە قاراپ ايتار بولساق, كوبىنەسە وفتالمولوگيالىق اۋرۋلارى, ياعني كوز اۋرۋلارى بار, ورتوپەديالىق اۋرۋلارى بار, نەگىزىنەن ەندوپروتەزدەۋدى قاجەت ەتەتىن ناۋقاستار كەزەكتە تۇر. كەزەك كۇتۋ ۋاقىتى بىرنەشە ايعا دەيىن سوزىلۋى مۇمكىن, دەگەنمەن, بۇل كۇتىلەتىن ۋاقىتتىڭ ناۋقاستىڭ دەنساۋلىعىنا كەرى اسەرىن بەرمەيتىن اۋرۋلار.
— تەگىن مەديتسينالىق كومەك كورسەتىلەتىن اۋرۋلار ءتىزىمى قانشالىقتى وزگەردى؟ الەۋمەتتىك ماڭىزى بار اۋرۋلاردىڭ ءتىزىمى وزگەرە مە؟
— بۇگىندە الەۋمەتتىك ماڭىزى بار اۋرۋلار ءتىزىمى, بۇرىنعىداي, 13 اۋرۋدان تۇرادى. بۇل ءتىزىم وزگەرمەگەن, بىراق وتكەن جىلى بۇل ءتىزىمدى وزگەرتۋ تۋرالى پىكىرتالاس بولدى. ءبىز بىرنەشە تىزىمدەردە بولۋى مۇمكىن اۋرۋلاردىڭ قايتالانۋىن بولدىرماۋ ءۇشىن جۇمىستار جۇرگىزدىك. مىسالى, الەۋمەتتىك ماڭىزى بار اۋرۋلار تىزىمىندەگى سۋسامىر اۋرۋى اسقىنۋلارى بولۋى سەبەپتى ادامنىڭ مۇگەدەكتىگىن تۋدىرادى. سوڭىندا, بۇل ءتىزىمدى وزگەرتپەۋ تۋرالى شەشىمگە كەلدىك. بۇل تىزىمدەر نەدەن شىعادى؟ ءسوز مۇنداي اۋرۋلار كەزىندە دياگنوستيكالىق قىزمەتتەر مەن ەمدەۋ شارالارىن تولىق قارجىلاندىرۋ قاجەتتىگى تۋرالى بولىپ وتىر, سوندىقتان ءبىرىنشى كەزەكتە بۇل پاتسيەنتتەردىڭ دياگنوستيكالىق ەمدەۋ تاكتيكاسىن قارجىلىق تۇرعىدان وتەگەن ماڭىزدى. 2020 جىلىدڭ 1 قاڭتارىنان باستاپ مىندەتتى مەديتسينالىق سقاتاندىرۋ فۋنكتسياسى ىسكە قوسىلادى. دەنساۋلىق سقاتاۋ سالاسىنا قوسىمشا قارجى رەسۋرستارى كەلەدى. سوندىقتان تۇرعىنداردىڭ دياگنوستيكالىق قىزمەتتەرگە قاناعاتتانباۋشىلىعى ءمامس ەنگىزىلۋىنە وراي قاناعاتتاندىرىلاتىن بولادى. سوندا, مۇمكىن, ءبىز بۇل ءتىزىمدى وزگەرتەتىن بولامىز. بۇگىندە بۇل اۋرۋلار ءتىزىمى ەش وزگەرگەن جوق.
— مەملەكەتتىك كەپىلدەندىرۋ مەن ساقتاندىرۋ بويىنشا مەديتسينالىق كومەك كورسەتۋ جۇيەسىندە قانداي وزگەرىستەر ورىن الۋى مۇمكىن؟ بۇل قۇجاتتاردىڭ ايىرماشىلىقتار قانداي؟
— 2020 جىلدىڭ 1 قاڭتارىنان باستاپ مەديتسينالىق كومەك كورسەتۋدىڭ بىرنەشە پاكەتى ەنگىزىلەدى. نەگىزگىسى — تەگىن مەديتسينالىق كومەكتىڭ كەپىلدەندىرىلگەن كولەمى. ەكىنشىسى — ساقتاندىرۋ پاكەتى. ءۇشىنشىسى — قوسىمشا پاكەت. قوسىمشا پاكەت اقىلى قىزمەتتەر نەمەسە زاڭمەن رۇقسات ەتىلگەن باسقا دا كوزدەر ارقىلى كورسەتىلەدى. تەگىن مەديتسينالىق كومەكتىڭ كەپىلدەندىرىلگەن كولەمى قازىرگى كەزدەگىدەي, قازاقستان رەسپۋبليكاسىنىڭ بارلىق ازاماتتارىنا كورسەتىلەتىن بولادى. ساقتاندىرۋ پاكەتى ساقتاندىرىلعان پاتسيەنتتەرگە كورسەتىلەدى. ياعني, بۇل تەگىن مەديتسينالىق كومەكتىڭ كەپىلدەندىرىلگەن كولەمىنەن باسقا مەديتسينالىق كومەك ءتۇرى. تەگىن مەديتسينالىق كومەكتىڭ كەپىلدەندىرىلگەن كولەمى ەسەبىنەن وتەلەتىن جانە تۇرعىندارعا تەگىن كورسەتىلەتىن پاكەتتە قانداي قىزمەتتەر بولادى؟ بۇل — جەدەل مەديتسينالىق جاردەم, سانيتارلىق اۆياتسيا, ءبىرىنشى رەتتىك مەديتسينالىق-سانيتارلىق كومەك, ءپاللياتيۆتى كومەك. بۇدان وزگە, مۇگەدەكتىك پەن ءولىم-جىتىممەن ايقىندالاتىن الەۋمەتتىك ماڭىزى بار جانە نەگىزگى اۋرۋلار كەزىندەگى تەگىن مەديتسينالىق كومەكتىڭ كەپىلدەندىرىلگەن كولەمى بار. بۇلار 25 نەگىزگى اۋرۋ تۇرلەرى, ولاردىڭ قاتارىندا ارتەريالىق گيپەرتەنزيا, قانت ديابەتى, سوزىلمالى جۇرەك جەتكىلىكسىزدىگى ت.ب. بار. اۋرۋلاردىڭ مۇنداي تۇرلەرىندە تەگىن كونسۋلتاتيۆتىك-دياگنوستيكالىق كومەك, دياگنوستيكالىق قىزمەتتەر, شاعىن ماماندار كەڭەستەرى, جوسپارلى ستاتسيونارلىق كومەك, امبۋلاتورلىق ءدارى-دارمەكتەرمەن قامتۋ كورسەتىلەتىن بولادى. سونىمەن قاتار, ساقتاندىرىلعانىنا نەمەسە ساقتاندىرىلماعانىنا قاراماستان, بارلىق تۇرعىندارعا شۇعىل ستاتسيونارلىق كومەك كورسەتىلەدى. بۇل تەگىن مەديتسينالىق كومەكتىڭ كەپىلدەندىرىلگەن كولەمى اياسىندا جۇرگىزىلەدى. تەگىن ستاتسيونارلىق كومەكتىڭ كەپىلدەندىرىلگەن كولەمىنە ەنگىزىلمەگەندەر ساقتاندىرۋ پاكەتىنە كىرەدى. ولار تەگىن مەديتسينالىق كومەكتىڭ كەپىلدەندىرىلگەن كولەمىنە ەنگىزىلمەگەن اۋرۋلار بويىنشا كونسۋلتاتيۆتىك-دياگنوستيكالىق قىزمەتتەر, امبۋلاتورلىق ءدارى-دارمەكتەرمەن قامتۋ, تەگىن مەديتسينالىق كومەكتىڭ كەپىلدەندىرىلگەن كولەمىنە ەنگىزىلمەگەن اۋرۋلار بويىنشا ءدارى-دارمەكتەردى تەگىن تاراتۋ, جوسپارلى ستانتسيونارلىق كومەك. بۇل رەتتە ساقتاندىرىلعان بولۋىنىڭ ماڭىزى زور. ساقتاندىرىلعاندار ءۇشىن ساقتاندىرۋ پاكەتى قولجەتىمدى بولادى. مىندەتتى مەديتسينالىق ساقتاندىرۋ جۇيەسىندە جەڭىلدىك بەرىلەتىن ازاماتتار ساناتى بار. ياعني, ازاماتتاردىڭ بۇل 15 ساناتى ءۇشىن مەملەكەت تولەم جۇرگىزەدى, ولار جارنا تولەمەيدى. ولار ءۇشىن ساقتاندىرۋ پاكەتى تەگىن. بۇل ساناتتارعا بالالار, جۇمىس ىستەمەيتىن جۇكتى ايەلدەر, ااك الۋشىلار, وقۋشىلار, كوپ بالالى انالار, «التىن القا», «كۇمىس القا» يەگەرلەرى, 1,2,3 توپ مۇگەدەكتەرى مەن بالا كەزىنەن مۇگەدەكتەر جاتادى. سانى 11 ملن ازامات بولاتىن جەڭىلدىكتى ساناتتاعىلارمەن قاتار, جۇمىس بەرۋشىلەرى تولەم اۋداراتىن جۇمىسكەرلەر دە ساقتاندىرىلادى. ولار — 5 ملن-عا جۋىق ادام. بىرىڭعاي جيىنتىق تولەم جۇرگىزەتىن ازاماتتار ساناتى دا بار. ولار دا مىندەتتى مەديتسينالىق ساقتاندىرۋ جۇيەسىندە سقاتاندىرىلاتىن بولادى.
— تەگىن قىزمەت كورسەتۋ فۋنكتسيالارى بولىپ تابىلاتىن مەديتسينالىق قىزمەتكەرلەردىڭ جۇمىس ساپاسىن باقىلاۋ قالاي جۇرگىزىلەدى؟
— ءاربىر مەديتسينالىق ۇيىمدا پاتسيەنتتەردى قولداۋ قىزمەتى بار, ولار ازاماتتاردىڭ شاعىمدارىن جەدەل قابىلداپ, مەديتسينالىق كومەك ساپاسىنا قاناعاتتانباۋ ماسەلەلەرىن شەشەدى. ءاربىر مەديتسينالىق ۇيىمدا مەديتسينالىق كومەك ءاۋديتى بويىنشا باس دارىگەردىڭ ورىنباسارى بار. بۇل تۇستا مەديتسينالىق ۇيىمداعى مەديتسينالىق كومەك ساپاسىنا قاناعاتتانباعان جاعدايدا ءبىزدىڭ ازاماتتاردىڭ سول جەردە ءوز ماسەلەلەرىن شەشۋدىڭ ماڭىزى زور. سونىمەن قوسا, سىرتقى باقىلاۋ بار, مەديتسينالىق كومەكتىڭ ساپاسىز كورسەتىلگەنى تۋرالى شاعىم تۇسىرۋگە بولاتىن قوعامدىق دەنساۋلىق ساقتاۋ كوميتەتى بار. وسى جىلدىڭ ءى توقسانىندا ازاماتتاردان 1100 شاعىم ءتۇستى. ونىڭ جارتىسىنا جۋىعى قارالدى. قارالعانداردىڭ ىشىنەن 22%-نىڭ نەگىزى بار. نەگىزدىلىگىنە وراي اكىمشىلىك قۇقىق بۇزۋشىلىقتار تۋرالى كودەكسكە سايكەس اكىمشىلىك جاۋاپقا تارتىلادى. ال مەديتسينالىق كومەك كورسەتۋ كەزىندە زاردابى تيگەن جاعدايدا ماتەريالدار قۇقىقتىق تۇرعىدان باعالاۋ ءۇشىن ءىىد-ىنە جولدانادى.
— زاماناۋي يننوۆاتسيالىق تەحنولوگيالار كومەگىمەن كۇردەلى وتالاردى جاساۋدا, جەڭىل ەمدەۋدە قازاقستاندىق مەديتسينا قانشالىقتى ىلگەرى جىلجىدى؟ قازىرگى تاڭدا قانداي ەم تۇرلەرى قولجەتىمدى؟
— قازاقستاندىق مەديتسينا الەمدەگى ۇردىستەردەن قالىس قالماي, ايتارلىقتاي تەز دامىپ كەلەدى. دارىگەرلەر حالىقارالىق مويىندالعان كلينيكالىق نۇسقاۋلار نەگىزىندە جاسالعان دياگنوز قويۋ مەن ەمدەۋدىڭ كلينيكالىق حاتتامالارىن باسشىلىققا الادى. تەحنولوگيالار ەنگىزىلىپ جاتىر. الايدا, ەلىمىزدە مەديتسينالىق كومەك كورسەتە المايتىن اۋرۋلاردىڭ ءتىزىمى بار, سوندىقتان ناۋقاستار شەت ەلدەرگە جىبەرىلەدى. وتكەن جىلى 89 ناۋقاس جىبەرىلدى. نەگىزىنەن, وتاندىق كلينيكالاردا ءتيىستى جابدىقتاردىڭ بولماۋىنان نەمەسە دارىگەرلەرىمىزدىڭ وسى تەحنولوگيالاردى مەڭگەرمەۋى سەبەبىنەن ناۋقاستار شەتەلگە جىبەرىلەدى. ماسەلەن, نەيروحيرۋرگيا ۇلتتىق عىلىمي ورتالىعىندا ەنگىزىلەتىن گامما-پىشاق اپپاراتى, كەلەسى جىلدان باستاپ ونىڭ كومەگىمەن ەمدەۋگە بولاتىن ناۋقاستار شەتەلگە جىبەرىلمەي, ەلىمىزدە ەمدەلەدى. ۇلتتىق عىلىمي ونكولوگيا ورتالىعىنىڭ قۇرىلىسى اياقتالعاننان كەيىن ىسىك اۋرۋلارىنا ارنالعان پروتوندىق تەراپيانى ەنگىزۋ جوسپاردا بار. ياعني, جىلدان جىلعا ەلىمىزدە بولماعان تەحنولوگيالاردىڭ سانى ارتىپ, شەتەلگە جىبەرۋ سانى ازايىپ كەلەدى. ءۇش قىزمەت بەلسەندى تۇردە دامىپ كەلەدى: كارديوحيرۋرگيا, نەيروحيرۋرگيا, ورتوپەديا, ولاردا الەمدە بار ەڭ جاڭا, يننوۆاتسيالىق تەحنولوگيالار قولدانىستا. نەيروحيرۋگيادا — نەيروناۆيگاتسيالار, ورتوپەديادا — بۋىن اۋرۋلارى كەزىندە جاڭا ەندوپروتەزدەر ەنگىزىلىپ جاتىر. كارديوحيرۋرگيا ورتالىعىندا الەمدە العاش رەت جاساندى جۇرەك الماستىرۋ وتاسى جاسالدى. سوندىقتان ءبىزدىڭ وتاندىق مەديتسينا الەمدىك تەحنولوگيالار كوشىنەن قالماي كەلەدى. سوندىقتان دا ءبىزدىڭ وتاندىق مەديتسينا الەمدىك تەحنولوگيالارمەن تەڭ دارەجەدە جۇرگىزىلىپ كەلەدى دەۋگە بولادى. جاڭا تەحنولوگيالاردى ەنگىزۋدىڭ نەگىزىندە جاتقان ەڭ باستىسى — «شىعىندار – تيىمدىلىك» قاعيداتى. وسى تەحنولوگيالاردى ەنگىزۋگە جۇمسالاتىن شىعىنداردىڭ مەديتسينالىق كومەكتىڭ ساپاسىنىڭ تيىمدىلىگىن ارتتىرۋعا نەگىز بولۋى وتە ماڭىزدى.
— ءلاززات مەيراشقىزى, سۇحبات بەرگەنىڭىزگە راقمەت.
