رۋحانيات • 26 ءساۋىر، 2019

«استانا وپەرا» تەاترىندا مامىر كەشتەرى وتەدى

792 رەتكورسەتىلدى

مامىر ايىندا «استانا وپەرا» تەاترىنىڭ كامەرالىق زالىندا ەلوردا تۇرعىندارى مەن قوناقتارىنىڭ نازارىنا كونتسەرتتىك باعدارلامالار ۇسىنىلادى دەپ حابارلايدى قالا اكىمدىگىنىڭ رەسمي سايتى.

3 مامىردا ساعات 19:00-دە «سەۆيليادان نەاپولگە دەيىن» كونتسەرتىندە يسپان، فرانتسۋز جانە يتالياندىق سازگەرلەردىڭ جالىندى تۋىندىلارى، سونداي-اق نەوپوليتاندىق اندەر شىرقالادى. كامەرالىق زال ساحناسىندا قازاقستاننىڭ ەڭبەك سىڭىرگەن قايراتكەرلەرى بيبىگۇل جانۇزاق، ازامات جىلتىركوزوۆ، «قۇرمەت» وردەنىنىڭ كاۆالەرى ايزادا كاپونوۆا، حالىقارالىق بايقاۋلاردىڭ لاۋرەاتتارى سالتانات مۇراتبەكوۆا، ەرۇلان كامەل ونەر كورسەتەدى. فورتەپيانو پارتياسىندا – حالىقارالىق بايقاۋلاردىڭ ديپلومانتى جانار احمەتوۆا. 

5 مامىردا ساعات 18:00-دە «Tango Project» كونتسەرتى وتەدى. مۋزىكا، بي، ۆوكال كەرەمەت ۇيلەسىم تاپقان بىرەگەي مۋزىكالىق جوبانى «Art Contrast» اسپاپتىق ءانسامبلى ۇسىنادى. ونىڭ قۇرامىندا: ايگەرىم ماتاەۆا (فورتەپيانو، فرانتسيا)، ماريا ورينينسكايا (سكريپكا، اۆستريا)، تاتيانا ۆيتسينسكايا (مەتستسو-سوپرانو)، جىبەك ساپارعاليەۆا (فلەيتا)، جانىبەك ساپاروۆ (گيتارا)، ساپار كۇمىسقاليەۆ (بايان)، ءادىل ساتىبالدينوۆ (كونتراباس) بار. بيشىلەر انەل ماراباەۆا مەن ەۆگەني مويسەەۆتىڭ جۇبى كەشتىڭ كوركىن قىزدىرا تۇسپەك. ارگەنتينالىق «تانگو كورولى» – ۇلى استور پياتستسوللانىڭ جالىندى تۋىندىلارى، سونىڭ ىشىندە Ave Maria، Fugata، №3 ەتيۋد، «تانگو تاريحى. Café 1930»، El penu’ltimo، Oblivion، «مارحابات»، «سىعان تانگوسى»، «سول ءبىر قايعى»، Escualo، Adios Nonino، La muerte del Angel، «Yo soy Maria…»، سونىمەن قاتار حۋان-كارلوس كوبياننىڭ «Los Mareados»، ك.گاردەل-د.ۋيليامستىڭ «ايەل ءيىسى» كينوفيلمىنەن تانگو ورىندالاتىن بولادى.  

ۇلى مەرەكە – جەڭىس كۇنى «جەڭىستىڭ وشپەس شىراعى» اتتى مەرەكەلىك كونتسەرتپەن اتالىپ وتەتىن بولادى. 9 مامىردا ساعات 15:00-دە «استانا وپەرا» تەاترىنىڭ كامەرالىق زالىندا وپەرا سوليستەرى، حور جانە وركەستر ارتىستەرىنىڭ ورىنداۋىندا سوعىس جىلدارىنداعى تانىمال اندەر مەن سۇيىكتى اۋەندەر، سونىمەن قاتار قازاق، ورىس جانە باتىس ەۋروپالىق كلاسسيكانىڭ وزىق تۋىندىلارى شىرقالادى. 

19 مامىردا ساعات 18:00-دە كورەرمەن نازارىنا زاماناۋي كامەرالىق مۋزىكا ۇسىنىلاتىن بولادى. «جۇرەككە جول تاپقان مۋزىكا» كونتسەرتىنە حالىقارالىق بايقاۋلاردىڭ لاۋرەاتتارى ۇلپان ابدىكارىموۆا (سوپرانو)، روزا سولتىحانوۆا (فلەيتا)، ماناربەك اباەۆ (كلارنەت)، دينارا قالاباەۆا (فورتەپيانو) قاتىسادى. مۋزىكانتتار امەريكالىق جانە ەۋروپالىق كومپوزيتورلاردىڭ تۋىندىلارىن جاڭا ۇلگىدە ۇسىنادى. اتاپ ايتقاندا، ە.ەۆايزەننىڭ فلەيتا مەن فورتەپيانوعا ارنالعان №1 سوناتاسى، ا.ديۋتيەنىڭ فلەيتا مەن فورتەپيانوعا ارنالعان سوناتيناسى، ف.پۋلەنكتىڭ كلارنەت پەن فورتەپيانوعا ارنالعان سوناتاسى، ك.دەبيۋسسيدىڭ «جۇلدىزدى ءتۇن»، «كەرەمەت كەش»، ل.شپوردىڭ «نەمىس اندەرى» op.37، دج.مانۋكياننىڭ فلەيتا، كلارنەت پەن فورتەپيانوعا ارنالعان تريوسى سىندى شىعارمالارى شىرقالادى. 

23 مامىردا ساعات 19:00-دە تىڭدارماندار ۆەناداعى مۋزىكالىق سەرۋەنگە شاقىرىلادى. « ۇلى ەسىمدەر: ي.گايدن، ۆ.ا.موتسارت» كونتسەرتىنە قازاقستاننىڭ ەڭبەك سىڭىرگەن ءارتىسى جاننات باقتاي، قازاقستاننىڭ ەڭبەك سىڭىرگەن قايراتكەرى سالتانات احمەتوۆا، تالعات عالەەۆ، پ.ي.چايكوۆسكي اتىنداعى ح حالىقارالىق جاسوسپىرىمدەر بايقاۋىنىڭ لاۋرەاتى اقبيكە العي (سكريپكا)، روسس كلارك (ترۋبا، ۋەلس، ۇلىبريتانيا)، «استانا وپەرا» تەاترىنىڭ بالالار ستۋدياسى (جەتەكشىسى – التىنعانىم احمەتوۆا)، سونىمەن بىرگە ديريجەر راقىمجان باسپاەۆتىڭ جەتەكشىلىگىمەن «استانا وپەرا» تەاترىنىڭ كامەرالىق وركەسترى قاتىسادى. مازمۇندى باعدارلاماعا ي.گايدننىڭ وركەستر مەن فورتەپيانوعا ارنالعان كونتسەرت رە ماجور (1-ءبولىم)، №104 سيمفونيا رە ماجور (1-ءبولىم)، ۆ.ا.موتسارتتىڭ «سەرالدان الىپ قاشۋ» وپەراسىنان ۋۆەرتيۋرا جانە كونستانتسانىڭ ارياسى، «دون جۋان» وپەراسىنان تسەرلينا مەن دون جۋاننىڭ دۋەتى، وركەسترمەن سكريپكاعا ارنالعان № 4 كونتسەرت رە ماجور (1-ءبولىم)، وركەسترمەن فورتەپيانوعا ارنالعان № 23 كونتسەرت ليا ماجور (2-ءبولىم)، №40 سيمفونيا (1- ءبولىم) ەنگەن. 

25 مامىردا ساعات 18:00-دە ۆيولونچەلگە ارنالعان مۋزىكا كەشى وتەدى. «ۆيولونچەل ءۇن قاتقان مامىر كەشى» كونتسەرتىنە قازاقستاندىق ۆيولونچەلشى ءسانيا دۇركەەۆا مەن ونىڭ ۇستازى – اتاقتى شۆەيتساريالىق ۆيولونچەلشى، تسيۋريح ونەر ۋنيۆەرسيتەتىنىڭ پروفەسسورى ورفەو ماندوتستسي، قازاقستاننىڭ ەڭبەك سىڭىرگەن قايراتكەرى ماەسترو ابزال ءمۇحيتدينوۆتىڭ جەتەكشىلىگىندەگى «استانا وپەرا» تەاترىنىڭ كامەرالىق وركەسترى قاتىسادى. «قازاقستاننىڭ 100 جاڭا ەسىمى – 2017» جوباسىنىڭ جەڭىمپازى ءسانيا دۇركەەۆا جەكە ورىنداۋشى-مۋزىكانت رەتىندە دە، ءتۇرلى كامەرالىق انسامبلدەردىڭ قۇرامىندا دا اۆستريا، فرانتسيا، شۆەيتساريا، اقش، رەسەي مەن قازاقستان زالدارىندا تابىستى ونەر كورسەتۋدە. ورفەو ماندوتستسي نيكولاي تسنايدەر، يۋليان راحلين جانە يۋري باشمەت سىندى تانىمال مۋزىكانتتارمەن، ايگىلى ديريجەرلەر فابيو لۋيزي، كريستيان يارۆي جانە ميحايل يۋروۆسكيمەن شىعارماشىلىق ىنتىماقتاستىقتا، سونداي-اق تسيۋريح جوعارعى ونەر مەكتەبى مەن يمولا قالاسىنداعى حالىقارالىق پيانينو اكادەمياسىندا (يتاليا) ساباق بەرەدى. 

28 مامىردا ساعات 19:00-دە Melodía de la pasión («قۇشتارلىق اۋەنى») كونتسەرتىندە ورىس، ەۋروپالىق جانە لاتىنامەريكالىق كومپوزيتورلاردىڭ اسەرلى دە بەينەلى اۋەندەرى شىرقالماق. ونەرسۇيەر قاۋىم نازارىنا ە.گرانادوس – گ.كاسسادونىڭ «گويەسكي» وپەراسىنان ينتەرمەتستسو، ك.سەن-سانستىڭ ۆيولونچەل مەن فورتەپيانوعا ارنالعان سيۋيتاسى، ر.ششەدرين – م. پلەتنەۆتىڭ «اننا كارەنينا» بالەتىنەن پرولوگ جانە ات جارىس،  ە.ۆيللا-لوبوستىڭ گيتاراعا ارنالعان №11 ەتيۋد مي مينور، «برازيليالىق باحيانا» №5. اريا، ج. ما رۋەردىڭ «Meditacio»، م.اندرە-بلوحتىڭ «دەننەريانا»، گ.كاسسادونىڭ «ەستەلىكتەر» سىندى تانىمال كامەرالىق شىعارمالارى جاڭا قىرىنان ۇسىنىلماق. حالىقارالىق بايقاۋلاردىڭ لاۋرەاتتارى بوتاگوز قاليەۆا (ۆيولونچەل)، الماس توقپانوۆ (كلارنەت)، جانىبەك ساپاروۆ (گيتارا)، ەلميرا سۇلتانعازينانىڭ (فورتەپيانو) ونەر كورسەتۋى تىڭدارمان كوڭىلىنە قۋانىش ۇيالاتپاق.



سوڭعى جاڭالىقتار

ۇقساس جاڭالىقتار