باتىس قازاقستان وبلىسىنىڭ بىتىك كەنتىندە تۋىپ-وسكەن قاراپايىم عانا اۋىل بالاسى عىلىمنىڭ نارىنە تەرەڭنەن بويلاپ, وسى سالادا وراسان زور تابىسقا قول جەتكىزدى. ورتا مەكتەپتى التىن مەدالمەن تامامداعان ول رەسەيدىڭ ساراتوۆ قالاسىنداعى مەحانيكالاندىرۋ جانە ەلەكترلەندىرۋ ينستيتۋتىنا وقۋعا ءتۇستى. ستۋدەنتتىك شاعىندا دا العىرلىعىمەن وقشاۋلاندى. لەنين ستيپەندياتى اتانىپ, ايتۋلى ءبىلىم وشاعىن قىزىل ديپلوممەن اياقتادى.
ءوز قاتارلاستارىنىڭ الدى بولعان انۆار عافۋر ۇلى 1970 جىلى تەحنيكا عىلىمدارى بويىنشا كانديداتتىق ديسسەرتاتسيانى ءساتتى قورعادى. 1976 جىلى 32 جاسىندا تەحنيكا عىلىمدارىنىڭ دوكتورى اتاندى. سول كەزەڭدە ەلىمىزدە وتىزدان ەندى عانا اسقان شاعىندا ءدال وسىنداي بيىك دارەجەگە جەتكەن تەحنيكا سالاسىنىڭ عالىمدارى ىلۋدە بىرەۋ عانا ەدى.
ا.اكچۋرين كوپتەگەن اۋقىمدى ەڭبەكتەر جازدى. 1975 جىلى قازاقستان لەنين كومسومولى سىيلىعىنىڭ لاۋرەاتى اتاندى. سونىمەن قاتار كسرو ونەرتاپقىشى (1983), قازاقستاننىڭ قۇرمەتتى جول قىزمەتكەرى (1989), كسرو جوعارى مەكتەبىنىڭ ۇزدىگى (1990), اكادەميك (1998), جوو-نىڭ ەڭ ۇزدىك وقىتۋشىسى (2007), «قازاقستاننىڭ عىلىمىن دامىتۋعا قوسقان ۇلەسى ءۇشىن» مەدالىنىڭ يەگەرى دەگەن اتاقتارى تاعى بار.
ا.اكچۋرين 1979-1983 جىلدار ارالىعىندا رەسپۋبليكالىق عىلىمي ەڭبەكتى ۇيىمداستىرۋ جانە ءوندىرىستى باسقارۋ ورتالىعىنا جەتەكشىلىك ەتتى. ودان كەيىنگى ۋاقىتتا قازاقتىڭ اۆتوجول ينستيتۋتىنىڭ رەكتورى, پرەزيدەنت جانىنداعى مەملەكەتتىك قىزمەت اكادەمياسىنىڭ وقۋ-ءادىستەمەلىك جۇمىس ورتالىعىنىڭ ديرەكتورى, باسقارۋ ينستيتۋتىنىڭ پرورەكتورى قىزمەتتەرىن اتقاردى. ءبىر سوزبەن ايتساق, ايتۋلى ازاماتتىڭ وتاندىق عىلىم مەن كولىك سالاسىنىڭ دامۋىنا قوسقان ۇلەسى وراسان زور.
ءوزىنىڭ سانالى عۇمىرىن تولىقتاي ءبىلىم مەن عىلىمعا ارناعان انۆار اكچۋريننىڭ جەتەكشىلىگىمەن 800-دەن اسا مامان ديپلومدىق جوبالارىن ويداعىداي قورعادى. ۇلاعاتتى ۇستازدان تاربيە العان شاكىرتتەردىڭ دەنى رەسپۋبليكامىزدا جول كولىگى, حالىق شارۋاشىلىعىن باسقارۋ, قۇرىلىس جانە باسقا دا سالالاردىڭ دامۋىنا سۇبەلى ۇلەس قوسۋدا. بۇگىندە ەل ەكونوميكاسىن وركەندەتۋ جولىندا ا.اكچۋريننىڭ شاكىرتتەرى تىنباي ەڭبەك ەتۋدە.
