تاراز قالاسىنا جاڭا اكىم تاعايىندالدى

تاعايىنداۋ • 24 ءساۋىر، 2019

تاراز قالاسىنا جاڭا اكىم تاعايىندالدى

693 رەت كورسەتىلدى

بۇگىن تاراز قالاسىنىڭ جاڭا اكىمى تاعايىندالدى. بۇدان بىلاي بۇل قىزمەتتى قايرات اسكەربەك ۇلى دوساەۆ اتقاراتىن بولادى. وبلىس اكىمى اسقار مىرزاحمەتوۆ شاھاردىڭ جاڭا باسشىسىن قالا اكتيۆىنە تانىستىرىپ، جۇمىسىنا ساتتىلىك تىلەدى. بۇل تۋرالى جامبىل وبلىسى اكىمدىگىنىڭ ءباسپاسوز قىزمەتى حابارلادى.

Marzhan Tileubekova

ءوز سوزىندە ءوڭىر باسشىسى قايرات اسكەربەك ۇلىنىڭ مەملەكەتتىك قىزمەتتەگى تاجىريبەسىن ەسكەرە كەلە، جاڭا قىزمەتتە دە قالانىڭ ەكونوميكالىق-الەۋمەتتىك دامۋى جولىندا ناتيجەلى ەڭبەك ەتەتىنىنە سەنىم ارتتى.

قايرات اسكەربەك ۇلى دوساەۆ، 1965 جىلى تۋعان، ۇلتى قازاق، ءبىلىمى جوعارى. 1987 جىلى قازاقتىڭ ەڭبەك قىزىل تۋ وردەندى اۋىلشارۋاشىلىق ينستيتۋتىن «اۋىلشارۋاشىلىعىن مەحانيكالاندىرۋ»، 2007 جىلى اباي اتىنداعى قازاق ۇلتتىق پەداگوگيكالىق ۋنيۆەرسيتەتىن «ەكونوميست» ماماندىقتارى بويىنشا بىتىرگەن.

ق.دوساەۆ ءوز ەڭبەك جولىنىڭ ءار جىلدارىندا «كازسەلحوزمەحانيزاتسيا» عىلىمي-وندىرىستىك بىرلەستىگىنىڭ جانە «التىن ديىرمەن» اق-نىڭ ينجەنەرى، «دەشت» جشس-ءنىڭ ديرەكتورى، الماتى قالالىق توتەنشە جاعدايلار باسقارماسىنىڭ ءبولىم باستىعىنىڭ ورىنباسارى، الماتى قالاسى بوستاندىق اۋدانىنىڭ توتەنشە جاعدايلار ءبولىمىنىڭ سەكتور مەڭگەرۋشىسى، باستىقتىڭ ورىنباسارى، قازاقستان رەسپۋبليكاسى توتەنشە جاعدايلار اگەنتتىگى توراعاسىنىڭ كومەكشىسى، الماتى وبلىسى اكىمىنىڭ كومەكشىسى، تالدىقورعان قالاسى اكىمىنىڭ ورىنباسارى، قاراتال اۋدانىنىڭ اكىمى، الماتى وبلىسىنىڭ تابيعي مونوپوليالاردى رەتتەۋ جانە باسەكەلەستىكتى قورعاۋ جانە تاريفتەر جونىندەگى باسقارمالارىنىڭ باستىعى، قازاقستان رەسپۋبليكاسى توتەنشە جاعدايلار ءمينيسترىنىڭ كەڭەسشىسى، «كازسپورتينۆەست» اق-نىڭ ۆيتسە-پرەزيدەنتى، جامبىل وبلىسى قورداي اۋدانىنىڭ اكىمى قىزمەتتەرىن اتقارعان.

2017 جىلدىڭ ناۋرىزىنان باستاپ جامبىل وبلىسى شۋ اۋدانىنىڭ اكىمى لاۋازىمىندا قىزمەت اتقارىپ كەلدى.

سونداي-اق، بۇگىن جامبىل وبلىسى اكىمى اپپاراتىنىڭ باسشىسى بولىپ رۇستەم رىسباي ۇلى داۋلەت تاعايىندالدى.

ر. داۋلەت 1974 جىلى تۋعان، ءبىلىمى جوعارى. ول 2018 جىلعى ساۋىردەن باستاپ جامبىل وبلىسى اكىمىنىڭ كەڭەسشىسى قىزمەتىن اتقارىپ كەلدى.