8 بەن 12 جاس ارالىعىنداعى بالالار ءۇشىن بايقاۋدىڭ ىرىكتەۋ كەزەڭدەرى ەلىمىزدە 29 ناۋرىزدان باستاپ وتۋدە. اتىراۋ وبلىسىنا دەيىن شىعارماشىلىق توپ الماتى, شىمكەنت قالالارى مەن تۇركىستان, جامبىل, قىزىلوردا, اقتوبە, باتىس قازاقستان جانە ماڭعىستاۋ وبلىستارىنا بارىپ قايتتى.
قازىلار القاسىن باستاپ كەلگەن اتىراۋ وبلىسى ءفيناليسىنىڭ جۇلدىزدى تالىمگەرى دينارا سۇلتان بالالارعا ارنالعان اۋقىمدى جوباعا العاش رەت قاتىسقان بولاتىن. سوعان قاراماستان ول بايقاۋ ەرەجەلەرى بويىنشا كەزەكتى ءفيناليسى تاڭداي الدى.
فينالعا جولداما الۋ ءساتى الفيا تىلەكقابىلعا بۇيىردى. ول قازىلار القاسى مەن كورەرمەندەردىڭ الدىندا ءوزىن جان-جاقتى كورسەتە ءبىلدى. قازاق, ورىس جانە اعىلشىن تىلدەرىندە ءۇش ءاندى كەرەمەت ورىنداپ شىقتى. دارىندى بالانى اناسى باستاعان ءبىر توپ جاقىندارى قولداپ كەلدى. ولار «جاندانۋ الەمى» قوعامدىق قورى, ءاليا نازارباەۆا مەن جوبانىڭ شىعارماشىلىق توبىنا كىشكەنتاي قازاقستاندىقتارعا اشاتىن ۇلكەن مۇمكىندىكتەر ءۇشىن العىس ءبىلدىردى.
كۇزدە الفيا قازاقستاننىڭ باسقا ايماقتارىنىڭ 16 فيناليسىمەن «جۇلدىزدى ارمان ۇيىندە» كەزدەسەدى. بايقاۋدىڭ سۋپەرفينالىنا دايىندالۋ ماقساتىندا بالالار ۆوكال, حورەوگرافيا جانە ارتىستىك قابىلەتتەرىن شىڭدايتىن ساباقتارعا قاتىسادى.
25-27 قازان كۇندەرى بالدىرعاندار جوبانىڭ اقتىق باعدارلامالارىندا ونەر كورسەتىپ, بايقاۋعا ارنايى جازىلعان اندەردى ورىندايدى.
«بالا داۋىسى-2019» بايقاۋىنىڭ جەڭىمپازى مۋزىكالىق وقۋ ورنىندا ءبىلىم الۋعا مۇمكىندىك بەرەتىن گرانت پەن ديسنەيلەند ەرتەگىلەر الەمىنە ساياحات جولداماسىن ۇتىپ الادى.
