ايماقتار • 23 ءساۋىر، 2019

تسيفرلاندىرۋ – تولايىم تابىس كوزى

500 رەتكورسەتىلدى

اگروونەركاسىپ كەشەنىنە «اقىلدى تەحنولوگيالاردى» ەنگىزۋ– بۇگىنگى كۇننىڭ باستى تالاپتارىنىڭ ءبىرى. وزىق ەلدەردىڭ تاجىريبەلەرى تسيفرلاندىرۋ ۇلتتىق فاكتورعا اينالا باستاعانىن ايقىن بايقاتادى.

اۋىل شارۋاشىلىعى مينيسترلىگىنىڭ تىكەلەي باستاماسىمەن وقۋشىلار سارايىندا ىسكەر ويىندار فورماتى ۇلگىسىندە  وتكەن سەميناردا اگرالىق سەكتوردى ەكونوميكانىڭ جاڭا  درايۆەرىنە اينالدىرۋ، ءىرى اگرارلىق ەكسپورتتىق ءونىم وندىرۋشىلەر قاتارىنا قوسىلۋ، شيكىزات وندىرىسىنەن ساپالى وڭدەلگەن ءونىم شىعارۋ ساتىسىنا كوتەرىلۋ، مۇنداي وزەكتى ماسەلەلەردىڭ  وڭتايلى شەشىم تابۋى، اينالىپ كەلگەندە،  وزىق ءادىس-تاسىلدەردى جەدەلدىلىكپەن مەڭگەرۋگە، وندىرىسكە ەنگىزۋگە تىكەلەي بايلانىستى ەكەنى اتاپ كورسەتىلدى. اتالمىش ۆەدوموستۆوعا قاراستى مەملەكەتتىك قىزمەتتى دامىتۋ جانە تسيفرلاندىرۋ دەپارتامەنتى ديرەكتورىنىڭ ورىنباسارى بەرنات الپىسبەكوۆ، وبلىستىق اۋىل شارۋاشىلىعى باسقارماسىنىڭ باسشىسى  ەربولات بەكشەنوۆ، «نۇركەن-اگرو» جشس-ءنىڭ جەتەكشىسى  قانات سىزدىقوۆ،  «اتامەكەن-اگرو-شۇقىركول» اگروفيرماسىنىڭ باسشىسى ارمان ءابايدىلدين، م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى اۋىل شارۋاشىلىق كافەدراسىنىڭ مەڭگەرۋشىسى، پروفەسسور كۇلبارام بايازيتوۆا، تاعى باسقا شەشەندەر ءوز سوزدەرىنە جەرگىلىكتى جەرلەردە قالىپتاسقان وڭ ۇردىستەردى، ورنىققان  تاجىريبەلەردى ارقاۋ ەتە وتىرىپ، ءوز ويلارىن ناقتى مىسالدارمەن ساباقتادى. اوك سالاسىندا  جۇزدەن استام قىزمەتتىڭ  تسيفرلىق فورماتقا كوشىرىلۋى  ارقاسىندا  وتىنىمدەردى قاراۋ مەرزىمى  2،5 ەسەگە دەيىن قىسقارعان.  جاڭاشىلدىقتاردىڭ بىرىنە ەلەكتروندىق تاۋارلىق جانە  قارجىلىق قولحاتتاردىڭ، «بلوكچەين» تەحنولوگياسىن، ونلاين-تاپسىرىس بەرۋدى، ونلاين-ترەيدينگ جۇيەلەرىن جاتقىزۋعا بولادى. اوك ونىمدەرىن قاداعالاۋدىڭ  «ەگىستىكتەن ۇستەلگە دەيىن» جۇيەسىن، ەلەكتروندىق ساۋدانى  تولىق فورماتتا ەنگىزۋ جوسپارلانعان.

جيىندا  «اقىلدى فەرمالار»، «دالمە-ءدال ەگىنشىلىك» جۇيەلەرى  از شىعىن جۇمساپ، مول ءونىم الۋدىڭ ءتيىمدى ءتاسىلى بولاتىنى العا تارتا وتىرىپ، اۋىل شارۋاشىلىق جەرلەرىن تالاپقا ساي يگەرۋدىڭ جولدارىن ورتاعا سالدى.  م.قوزىباەۆ اتىنداعى سقمۋ-ءنىڭ عالىمدارى  «پەتەرفەلد-اگرو»، «شاعالا-اگرو» سەرىكتەستىكتەرىمەن قويان-قولتىق جۇمىس ىستەپ، قۋانتارلىق ناتيجەگە قول جەتكىزىپ كەلەدى. بۇل شارۋاشىلىقتاردا ەلەكتروندى توپىراق كارتالارى، اگروحيميالىق كارتوگراممالار كەڭىنەن قولدانىلادى. ەگىنشىلىك مادەنيەتىن جەتىلدىرۋ، اۋىسپالى ەگىس جۇيەسىن قاتاڭ ساقتاۋ ناتيجەسىندە جانارماي، مينەرالدىق تىڭايتقىشتار شىعىنى الدەقايدا كەمىگەن.

«SMART»  فەرمالار ارقىلى ادام كۇشىن بارىنشا ازايتىپ، ساۋىلعان ءسۇت مولشەرىن انىقتاۋ،  ءدارى-دارمەكپەن قامتۋ، جەمدەۋ، ەلەكتروندى چيپ تاعۋ سەكىلدى  ناقتى مال شارۋاشىلىعى ەلەمەنتتەرى ەنگىزىلگەن.  «قازەكسپورتاستىق» حولدينگىنە قاراستى شارۋاشىلىقتاردىڭ ءبىرى «اتامەكەندە»  تابىس 6،4 ميلليارد تەڭگەدەن  20 ميلليارد تەڭگەگە دەيىن ارتقان. اققايىڭ اۋدانىندا  «يۆان زەنچەنكو» جشس-ءى قۇنى 700 ميلليون بولاتىن  632 باسقا ارنالعان  «اقىلدى»  ءسۇت  فەرماسىن ىسكە قوسقان.

سەمينارعا قاتىسۋشىلار تسيفرلاندىرۋ جەمقورلىقتى ەڭسەرۋگە،  سۋبسيديالاۋدى جەڭىلدەتۋگە، اۆتوماتتاندىرىلعان جۇيەلەردى كەڭىنەن ەنگىزۋگە، تابيعي رەسرۋرستاردى ءتيىمدى پايدالانۋعا دا قولايلى مۇمكىندىكتكر بەرەتىنىن جان-جاقتى ساراپقا سالدى.


 سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار