قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» اتتى باعدارلامالىق ماقالاسىنا ورايلاستىرىلىپ وتكىزىلگەن سالتاناتتى جيىننىڭ رەسمي ءبولىمى وقۋ ورنىنىڭ «اق شاتىر» جازعى الاڭىنان باستاۋ الدى. ۋنيۆەرسيتەت ۇجىمى مەن ستۋدەنتتەرى جينالعان كوپشىلىك نازارىنا وقۋ ورداسىنىڭ ونەر ۇجىمدارى مەن جەكەلەي ورىنداۋشىلارى دايىنداعان كونتسەرتتىك باعدارلاما ۇسىنىلدى. سونداي-اق قازاق حالقىنىڭ ۇلتتىق سالت-داستۇرلەرىنەن سىر شەرتەتىن مۋزىكامەن ارلەنگەن تەاترلاندىرىلعان كورىنىس تە مەرەكە اجارىن ايشىقتاي ءتۇستى.
ساحنا شىمىلدىعى «ۇلار» ەتنو-فيۋجن ءانسامبلىنىڭ ورىنداۋىنداعى «ناۋرىز» انىمەن اشىلدى. قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا جۇرتشىلىقتى ۇلتىمىزدىڭ ۇلىق مەرەكەسىمەن قۇتتىقتاپ, بۇل مەيرام ۇرپاقتار ساباقتاستىعىنىڭ جəنە حالقىمىزدىڭ تەرەڭنەن تامىر تارتاتىن سالت-ءدəستۇرى مەن مəدەنيەتىنىڭ سيمۆولىنا اينالعانىن ايتتى.
– ۇلىستىڭ ۇلى كۇنى – ناۋرىز مەيرامىنا وراي 75 جىلدىق تاريحى بار قازاق ۇلتتىق قىزدار پەداگوگيكالىق ۋنيۆەرسيتەتىندە ۇيىمداستىرىلىپ وتىرعان « ۇلى دالانىڭ ۇلىق مەرەكەسى» اتتى جيىنعا قوش كەلدىڭىزدەر! بابادان بالاعا مۇرا بولىپ كەلە جاتقان ناۋرىز – حالقىمىزدىڭ بىرلىگىنىڭ بەرەكەسى, شىنايى تىرلىگىمىزدىڭ مەرەكەسى. ۇلتتىق وركەنيەتىمىزدىڭ ولشەمى. قازاق ەلى بۇل مەيرامدى قاشاندا بيىك كوڭىلمەن, كەڭ پەيىلمەن ەرەكشە قارسى الادى. ناۋرىزدى ۇلىقتاۋ – حالقىمىزدىڭ سالتى مەن ءداستۇرىن جاڭا كەزەڭگە كوتەرۋ دەپ بىلەمىز. ناۋرىزدى جاڭعىرتۋ – قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» اتتى باعدارلامالىق ماقالاسىنداعى باسىم باعىتتار مەن مىندەتتەردى جۇزەگە اسىرۋمەن استاسىپ جاتقان شارا. ۇلتتىق كود پەن ۇلتتىق بولمىس – رۋحاني الەمىمىزدىڭ وزەگى. ونى دامىتۋ بۇگىنگى ۇرپاقتىڭ باستى پارىزى, مىندەتى جانە شامشىراعى. جاقسىلىقتىڭ جارشىسى, جاڭا جىلدىڭ باستاۋى – ناۋرىز بارشاڭىزدىڭ شاڭىراعىڭىزعا شاتتىق پەن نەسىبە اكەلسىن! دەندەرىڭىزگە ساۋلىق, تولايىم تابىس تىلەيمىن, دەدى گاۋحار تورەمۇراتقىزى.
سونداي-اق مەرەكەلىك شاراعا ارنايى قوناق رەتىندە قاتىسقان مەملەكەت جانە قوعام قايراتكەرى ءشامشا بەركىمباەۆا, قازاق ۇلتتىق اگرارلىق ۋنيۆەرسيتەتىنىڭ رەكتورى تىلەكتەس ەسپولوۆ, ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى اسحات ماەميروۆ, قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ, س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ رەكتورى تالعات نۇرعوجين, ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ شىعارماشىلىق جۇمىستار جانە حالىقارالىق قاتىناستار جونىندەگى پرورەكتورى ساكەن مايعازيەۆ جانە يۋنەسكو-نىڭ قازاقستانداعى بيۋروسىنىڭ قىزمەتكەرى مەيىرگۇل الپىسباەۆا قىزدار ۋنيۆەرسيتەتىنىڭ ۇجىمىن ناۋرىز مەيرامىمەن قۇتتىقتادى.
«مەملەكەت بولاشاعىنىڭ كىلتى – قازىرگى جاڭا تەحنولوگيالاردى جەتە مەڭگەرگەن, سونىمەن قاتار ءتۇپ-تامىرىنان اجىراماعان, سالتى مەن ءداستۇرىن, تاريحىن بىلەتىن ءبىلىمدى دە بىلىكتى ازاماتتاردىڭ قولىندا. وسى ورايدا ۇلىستىڭ ۇلى كۇنى – ناعىز سالت-ءداستۇرىمىزدى دارىپتەيتىن, ۇلتتىق ناقىشىمىزدى ناسيحاتتايتىن ورەلى دە, ونەگەسى مول مەيرام. جىل باسى قۇتتى بولسىن,» دەستى ءسوز العاندار.
مەرەكەلىك شارانىڭ ەكىنشى ءبولىمى ۋنيۆەرسيتەت الاڭىندا جالعاسىن تاپتى. مۇندا اقشاڭقان كيىز ءۇي تىگىلىپ, پروفەسسور-وقىتۋشىلار مەن ستۋدەنتتەر ءتۇبى ءبىر تۇركى حالىقتارىنىڭ اس ءمازىرىن دايىنداپ, جۇرتشىلىققا ۇسىندى. ال, «اق شاتىر» الاڭىندا « ۇلى دالانىڭ جەتى قىرى» ماقالاسىنداعى باسىم باعىتتاردى تاقىرىپ ەتىپ العان فاكۋلتەتتەر ءوزارا سىنعا ءتۇستى. اتاپ ايتقاندا, اكىمشىلىك «اڭ ءستيلى», پەداگوگيكا جانە پسيحولوگيا فاكۋلتەتى «اتقا ءمىنۋ مادەنيەتى», الەۋمەتتىك-گۋمانيتارلىق فاكۋلتەتى «التىن ادام», ونەر جانە مادەنيەت فاكۋلتەتى «تۇركى الەمىنىڭ بەسىگى», جاراتىلىستانۋ فاكۋلتەتى «قازاقستان – الما مەن قىزعالداقتىڭ وتانى», فيزيكا-ماتەماتيكا فاكۋلتەتى « ۇلى دالاداعى ەجەلگى مەتاللۋرگيا» جانە قازاق فيلولوگياسى جانە الەم تىلدەرى فاكۋلتەتى « ۇلى جىبەك جولى» تاقىرىپتارىندا ساحنالىق قويىلىمدار قويىپ, ونەرلەرىن كوپشىلىك نازارىنا ۇسىندى.
قازىلار القاسىنىڭ شەشىمى بويىنشا باس جۇلدەگە قازاق فيلولوگياسى جانە الەم تىلدەرى فاكۋلتەتى لايىق دەپ تانىلدى. ءبىرىنشى ورىن پەداگوگيكا جانە پسيحولوگيا فاكۋلتەتىنە بۇيىرسا, ەكىنشى ورىندى الەۋمەتتىك-گۋمانيتارلىق فاكۋلتەتى مەن ونەر جانە مادەنيەت فاكۋلتەتى ەنشىلەدى. ال ءۇشىنشى ورىن اكىمشىلىك, فيزيكا-ماتەماتيكا فاكۋلتەتى مەن جارىتىلىستانۋ فاكۋلتەتىنە بۇيىردى.
ءبىر بۇل عانا ەمەس. مەرەكەلىك شارا قارساڭىندا دەكوراتيۆتى-قولدانبالى شىعارماشىلىق كورمەسى مەن ۇلتتىق سپورت سايىستارى دا ۇيىمداستىرىلدى.
قىزدار ۋنيۆەرسيتەتىندەگى ۇلىستىڭ ۇلى كۇنىن تويلاۋعا الماتى قالاسىنداعى ەڭبەكتەگەن بالادان ەڭكەيگەن قارتقا دەيىن كەلدى. مەرەكەلىك شارادا ستۋدەنتتەر مەن قوناقتارعا ناۋرىزكوجە جانە باسقا دا ۇلتتىق تاعامدار تاراتىلدى. كيىز ءۇي ۇلگىسىندە ارنايى دايىندالعان ساحنادا حالىقارالىق جانە رەسپۋبليكالىق ونەر بايقاۋلارىنىڭ لاۋرەاتى «توميريس» بي ءانسامبلى, «ايگۇل» ۆوكالدى-اسپاپتار ءانسامبلى مەن وزگە دە ونەرپازداردىڭ قاتىسۋىمەن وتكەن گالا-كونتسەرت كوپشىلىكتىڭ ىستىق ىقىلاسىنا بولەندى.
وسىلايشا ناۋرىز مەيرامى تاعىلىم مەن تاربيەنىڭ قاراشاڭىراعىندا ءسان-سالتاناتىمەن جانە ەرەكشە تارتىمدىلىعىمەن كوپشىلىكتى ءتانتى ەتتى.
