«مەنىڭ وتانىمنىڭ مەملەكەتتىك ءتىلى» تاقىرىبىندا وتكەن وليمپياداعا الماتى قالاسىنداعى جوعارى وقۋ ورىندارىندا ءبىلىم الاتىن ستۋدەنتتەر قاتىسىپ, باق سىناستى.
شارانى ۇيىمداستىرۋشى قىزدار ۋنيۆەرسيتەتىنىڭ قازاق ءتىل ءبىلىمىنىڭ تەورياسى مەن ادىستەمەسى كافەدراسىنىڭ مەڭگەرۋشىسى تىنىشتىق ەرمەكوۆانىڭ مالىمەتىنە سۇيەنەر بولساق, قاتىسۋشىلاردىڭ بارلىعى وزگە ۇلت وكىلدەرى.
– قازاق تىلىنە شورقاق ستۋدەنتتەردى ىرىكتەپ الۋىمىز بەكەر ەمەس. وسى ارقىلى ولاردىڭ قازاق ءتىلى بويىنشا تانىمدىق قابىلەتىن دامىتىپ, مەملەكەتتىك ءتىلدى مەڭگەرۋىنە ىقپال ەتۋدى كوزدەيمىز. وليمپيادا وسكەلەڭ ۇرپاقتى ەلجاندى ءھام ۇلتتىق قۇندىلىقتار نەگىزىندە تاربيە بەرۋدە زور ۇلەس قوسادى دەپ سەنەمىز, دەيدى تىنىشتىق ەرمەكوۆا.
جارىستىڭ اشىلۋ راسىمىندە قازاق فيلولوگياسى جانە الەم تىلدەرى فاكۋلتەتىنىڭ دەكانى جانار قيىنوۆا ءسوز سويلەپ, ءبىلىم دوداسى ۋنيۆەرسيتەت قابىرعاسىندا تۇڭعىش رەت ۇيىمداستىرىلىپ وتىرعانىن اتاپ ءوتىپ, توپ مۇشەلەرىنە ساتتىلىك تىلەدى. سونىمەن قاتار جوعارى وقۋ ورىندارى ستۋدەنتتەرى اراسىندا «قازاق ءتىلى» پانىنەن وتكەن وليمپيادانىڭ بيىلعى جەڭىمپازى, فاكۋلتەت ستۋدەنتى كامەليا كارپوۆيچ تە ءوز تىلەگىن ارنادى.
– كوكىرەك كوزىمەن تۇيسىنە بىلگەن جانعا ءتىل – دوستىقتىڭ كىلتى, ىنتىماقتىڭ ۇيىتقىسى, ىرىس-بەرەكەنىڭ نىشانى. بىرلىگى بەكەم, تىرلىگى تاتۋ قازاق ەلىندە 130-دان استام ۇلت پەن ۇلىس وكىلى «ءبىر جاعادان – باس, ءبىر جەڭنەن – قول شىعارىپ», ءومىر سۇرۋدە. مەنىڭ ويىمشا, وسى ەلدە تۇرعان ءاربىر ازامات قازاق تىلىنە زور قۇرمەت كورسەتۋى ءتيىس. جانە ونى كۇندەلىكتى قارىم-قاتىناستا قولدانۋ قاجەت. قاجەت ەمەس, سولاي بولۋى ءتيىس جانە ءوز قاتارلاستارىمدى وسىعان شاقىرامىن, دەپ اتاپ ءوتتى قىزدار ۋنيۆەرسيتەتىنىڭ ستۋدەنتى.
قازاق ءتىلىن تەرەڭ مەڭگەرگەن, سوزگە شەشەن, تانىمى بيىك 7 توپتىڭ مۇشەلەرى ءتورت كەزەڭ بويىنشا سىنعا ءتۇستى. قاتىسۋشىلار «سالەم – ءسوزدىڭ اناسى» اتتى العاشقى اينالىمدا وزدەرىن تانىستىردى. وندا ستۋدەنتتەردىڭ سويلەۋ مانەرىنە باسىمدىق بەرىلدى. «بىلەكتى ءبىردى جىعار, ءبىلىمدى مىڭدى جىعار» اتتى ەكىنشى كەزەڭدە سايىسكەرلەر ءار ۇياشىقتا جاسىرىلعان لەكسيكالىق, گرامماتيكالىق سۇراقتارعا جاۋاپ بەرىپ, پراكتيكالىق تاپسىرمالاردى ورىنداپ, ءبىلىم دەڭگەيلەرىن ساراپقا سالدى. ال ءۇشىنشى تۋردا ستۋدەنتتەردىڭ ينتەللەكتۋالدىق الەۋەتى باعامدالدى. ال «قازاق ءتىلى» پانىنەن تەوريالىق بىلىمدەرى مەن تانىمدىق دەڭگەيلەرىن انىقتاۋ ماقساتىندا ارنايى دايارلانعان تاقىرىپتار توپتاماسىنىڭ ىشىنەن تاڭدالعان تاقىرىپ بويىنشا ەسسە بايقاۋى «ۇشقىر قالام» اتتى سوڭعى كەزەڭدە ۇيىمداستىرىلدى. ۇسىنىلعان تاقىرىپتاردىڭ دەنى تۋعان جەر, «رۋحاني جاڭعىرۋ» باعدارلاماسىنداعى باسىم باعىتتار مەن ۇلتتىق سالت-ءداستۇردى قاۋزايدى. اتاپ ايتقاندا ولاردىڭ قاتارىندا «قازاق ەلى, قازاق ءتىلى – ماڭگىلىك!», «ەل بولاشاعى – ءبىلىمدى ۇرپاق», «مەملەكەتتىك ءتىل – مەنىڭ ءتىلىم», «رۋحاني جاڭعىرۋ وزىڭنەن باستالادى», «اباي پوەزياسى – ادامزاتتىڭ اسىل قازىناسى», «لاتىن ءالىپبيى – تاۋەلسىزدىكتىڭ جەتىستىگى», «قازاق ءداستۇرىن قاستەرلەۋ – پارىز», «ىرىس الدى – ىنتىماق» جانە «مەنىڭ ۋنيۆەرسيتەتىم» تاقىرىپتارى بار.
سايىس بارىسىندا ستۋدەنتتەردىڭ ءبىلىم مەن ونەرىنە الماتى قالاسى مەملەكەتتىك تىلدەردى دامىتۋ ينستيتۋتىنىڭ ديرەكتورى بيجومارت قاپالبەك, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ Phd دوكتورى گۇلميرا كاريموۆا جانە قىزدار ۋنيۆەرسيتەتىنىڭ «Nur Otan» پارتياسىنىڭ «ۇلاعات» باستاۋىش ۇيىمىنىڭ توراعاسىنىڭ ورىنباسارى ءالىبي نەسىپباەۆ قازىلىق جاسادى.
تارتىستى وتكەن وليمپيادا قورىتىندىسى بويىنشا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ «اباي» توبى وزگەلەردەن وق بويى وزىپ شىعىپ, جەڭىمپاز اتاندى. قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرىنەن قۇرالعان «ىزگىلىك» توبى مەن س. دەميرەل اتىنداعى ۋنيۆەرسيتەتتىڭ «سۋپەرسترات» كومانداسى تەڭ ءتۇسىپ, ءبىرىنشى ورىندى ءوزارا ءبولىستى. ەكىنشى ورىنعا ازاماتتىق اۆياتسيا اكادەمياسىنىڭ «ۇشقىشتار» جانە حالىقارالىق اقپاراتتىق تەحنولوگيالار ۋنيۆەرسيتەتىنىڭ «سۇڭقار» كوماندالارى يە بولدى. حالىقارالىق بيزنەس ۋنيۆەرسيتەتىنىڭ «International پوليگلوتتار» توبى مەن حالىقارالىق اقپاراتتىق تەحنولوگيالار ۋنيۆەرسيتەتىنىڭ «العىر» توبى ءۇشىنشى ورىندى قانجىعاسىنا بايلادى.
جەڭىمپازدارعا ارنايى ديپلومدار مەن باعالى سىيلىقتار تابىستالدى.
