ءوتىنىش يەلەرىنىڭ ايتۋىنشا الەۋمەتتىك قىزمەتتى كورسەتۋ بارىسىندا مەملەكەتتىك ساتىپ الۋدا ارتىق بيزنەس-پروتسەسستەر, بيۋدجەت قاراجاتىن جىمقىرۋ, جەكە كومەكشىلەردىڭ تولەم اقىسىنىڭ كولەمىن زاڭسىز تومەندەتۋ, ارتىق قۇجاتتاردى سۇراتۋ جانە ءنورماتيۆتى-قۇقىقتىق اكتىلەردەگى قايشىلىقتارى بار.
وسىعان وراي, جوعارىدا كورسەتىلگەن ماسەلەلەردىڭ ماڭىزدىلىعىن ەسكەرە وتىرىپ, اتالعان ءوتىنىشتى ساپالى قاراۋ جانە ارىزدانۋشىلاردىڭ كەلتىرگەن دالەلدەرىنىڭ راستىعىن انىقتاۋ ماقساتىندا وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتى مۇددەلى مەملەكەتتىك ورگاندار وكىلدەرىنىڭ, اتاپ ايتقاندا قالالىق پروكۋراتۋرا, «اقتوبە قالاسىنىڭ سال اۋرۋىنا شالدىققان ازاماتتاردى قولداۋ ورتالىعى» قب, «ەرەكشە تاڭداۋ اقتوبە» كق, «وبششەستۆو نەۋنىۆايۋششيح ينۆاليدوۆ» قب وكىلدەرىنىڭ, سونداي-اق مۇمكىندىگى شەكتەۋلى ازاماتتار مەن ولاردىڭ جەكە كومەكشىلەرىنىڭ قاتىسۋىمەن جۇمىس تارتىبىندەگى كەڭەسىن ۇيىمداستىردى.
سونىمەن, تالقىلاۋ بارىسىندا قاتىسۋشىلاردىڭ جارتىسى نورماتيۆتىك-قۇقىقتىق اكتىلەرگە سايكەس جەكە كومەكشىنىڭ قىزمەتىن مەملەكەتتىك ساتىپ الۋ ارقىلى جۇرگىزىلەتندىگىنە كەلىسسە, ال ەكىنشى جارتىسى جەكە تۇلعالارمەن تىكەلەي كەلىسىمگە كەلۋگە كەلىسەتىندىگىن جەتكىزدى.
ءوتىنىش بىلدىرۋشىلەردىڭ پىكىرىنشە, دەلدالدارسىز مەملەكەتتىك ساتىپ الۋدان باس تارتۋ تەندەرلەردى الىپ تاستاۋعا, قۇجات اينالىمىن قىسقارتۋ, سونداي-اق جەكە كومەكشىلەردىڭ تولەمدەرىن ارتتىرۋ بولىگىندە بيزنەس ۇدەرىستى وڭتايلاندىرۋعا الىپ كەلەدى.
سونىمەن قاتار, ولار جەكە كومەكشىنىڭ قىزمەت كورسەتۋ ۋاقىتىنا دا نارازى ەكەندىكتەرىن جەتكىزدى.
- مەنىڭ بىلۋىمشە, قاۋلىدا 8 ساعاتتان ارتىق ەمەس دەپ كورسەتىلگەن. وندا ناقتى شەكتەۋلەر جوق. ەگەر شەكتەۋ بولسا, بۇل دەگەنىمىز, جۇمىس ىستەيتىن مۇگەدەكتى 4 ساعات جۇرگىزىپ, ۇيىندە جاۋىپ تاستاپ, ەشقايدا شىعارماۋ دەگەنىمىز. بۇل مۇگەدەكتىڭ قۇقىعىن بۇزۋ, كەمسىتۋشىلىك دەپ بىلەمىن. سونداي-اق, ءسىز 41 ملن.تەڭگە بولىنەتىنىن ءوزىڭىز دە ايتتىڭىز, ونىڭ 9% - ى اكىمشىلىك شىعىندارعا الىنادى. سوندىقتان ءبىز بىرلەسكەن كەلىسىم-شارتتى دەلدالسىز جاساۋ ءتيىمدى دەپ سانايمىز, ال بۇل 9% - دى باسقا قاجەتتىلىكتەرگە جاراتقان دۇرىس ەمەس پە؟, - دەدى 1 توپ مۇگەدەگى ءجانيا اياۋباەۆا.
ءوز كەزەگىندە ۇەۇ وكىلدەرى قاتىسۋشىلارعا تاۋلىكتىڭ كەز كەلگەن ۋاقىتىندا مۇگەدەكتى كورسەتىلگەن ورىنعا جەتكىزۋگە قاجەتتى كومەك كورسەتە الاتىن جەكە كومەكشىلەردىڭ ءموبيلدى توبىن قۇرۋدى ۇسىندى.
كەڭەس سوڭىندا مۇمكىندىگى شەكتەۋلى ازاماتتار مەن ولاردىڭ جەكە كومەكشىلەرىنە مۇگەدەكتەرگە ارنالعان جەكە كومەكشىنىڭ شارتتارىن جاساۋ بارىسىندا تالاپتار مەن تارتىبىمەن كەلىسپەگەن جاعدايدا شاعىمدانۋ قۇقىعى مەن ءتارتىبىن ءتۇسىندىردى.
