تەاتردىڭ ءباسپاسوز قىزمەتىنىڭ حابارلاۋىنشا, رەجيسسەر اندرەا بەرناردتىڭ ماڭگىلىك ماحاببات حيكاياسىنا دەگەن جاڭا كوزقاراسى استانالىق ونەر سۇيەر قاۋىمدى تاڭعالدىرىپ, كوڭىلىن باۋراپ الدى. ەيفەل مۇناراسى, وت شاشقان اتكەنشەكتەر مەن ساحنانى اينالا جۇرگەن ومىردەگىدەي ولشەمدەرمەن جاسالعان پويىز زالدا وتىرعانداردى شاتتىققا بولەدى. پرەمەرا قر مادەنيەت جانە سپورت مينيسترلىگىنىڭ قولداۋىمەن ءوتتى.
ۇزدىك قازاقستاندىق ارتىستەر مەن الەمگە تانىمال ءارى سۇرانىسقا يە كلاسسيكالىق ونەر مەترلەرىنىڭ جۇمىسى قويىلىمدى تابىستى ەتتى.
ولاردىڭ ءبىرى – ماەسترو دجۋزەپپە اكۋاۆيۆا. ول – پۋچچيني وپەرالارى بويىنشا ايگىلى مامان. «استانا وپەرا» سيمفونيالىق وركەسترىنىڭ ورىنداۋىنا قاراعاندا, ديريجەر پارتيتۋرانىڭ بارلىق نيۋانسىن مۋزىكانتتاردىڭ كوكەيىنە جەتكىزە بىلگەن.
الەمدىك دەڭگەيدەگى مايتالمان, «دوستىق» وردەنىنىڭ كاۆالەرى, زامانىمىزدىڭ كورنەكتى ستسەنوگرافى ەتسيو فريدجەريو تەاترىمىزعا تاعى ءبىر جاۋھارىن تارتۋ ەتتى. اۋقىمدى كوپدەڭگەيلى دەكوراتسيالار ارقىلى كورەرمەندەر بىردە قۇبىرلار قورشاعان يەسىز قالعان زاۋىتقا, بىردە ءسان-سالتاناتتى پاريج جارمەڭكەسىنىڭ كوڭىل-كۇيىنە بولەيتىن جارقىراعان الاڭعا, بىردە قار جامىلعان تەمىرجول بەكەتىنە ساياحات جاساپ, رومانتيكاعا بولەدى.
ارتىستەر وسى كورىنىستەردىڭ اربىرەۋىنە جاعدايى بەيشارا بولعانىمەن, رۋحاني تۇرعىدان باي بوگەمالىق جاسامپازداردىڭ رۋحىن سىڭىرە ءبىلدى.
سوليستەر ليريكالىق جانە درامالىق ەپيزودتاردا كەرەمەت دۋەتتەر شىعاردى. ءار كۇندەرى: ميمي – ماريا مۋدرياك پەن مايرا مۇحامەدقىزى, رۋدولف – مەدەت چوتاباەۆ پەن جان تاپين پۋچچينيگە ءتان ۆوكال ءستيلىن تاماشا مەڭگەرگەندىگىن پاش ەتتى.
سالتانات احمەتوۆانىڭ, الفيا كاريموۆانىڭ (ميۋزەتتا) جانە سۇندەت بايعوجيننىڭ, تالعات مۇساباەۆتىڭ (مارسەل) ورىنداۋىنداعى ءارى كۇلدىرگى, ءارى درامالىق ساحنالىق كورىنىستەر كورەرمەننىڭ كوزدەردەرىنە جاس كەلتىردى.
كوللەن پارتياسىن ورىنداۋشى – تايىر ءتاجى, بولات ەسىمحانوۆ; شونار پارتياسىنداعى – اندرەي بوريسەنكو, ەرجان سايىپوۆ ءوز ۇندەرىمەن, باي تەمبرلىك بوياۋلارىمەن, سونداي-اق ۆوكالدىق تەحنيكالارىمەن تىڭدارمانداردى باۋراپ الدى. بەيىمبەت تاڭارىقوۆ پەن رامزات بالاكيشيەۆ – پارپينول پاتياسىن اكتەرلىك تۇرعىدا ءساتتى ورىنداپ شىقتى. سامات جارىلقاسىنوۆ پەن باحتيار وماروۆ كەدەن سەرجانتى رولىندە ونەر كورسەتتى.
مەيرام كورىنىسىنە كاسىبي تسيرك ارتىستەرى قاتىستى.
«وسكار» سىيلىعىنىڭ يەگەرى فرانكا سكۋارچاپينو كەرەمەت كوستيۋمدەر جاساپ شىعارعان. «استانا وپەرا» باس حورمەيستەرى ەرجان ءداۋىتوۆ جەتەكشىلىك ەتكەن حور تاڭعالارلىقتاي مانەرلى ەستىلدى. بالالار حورىنىڭ جەتەكشىسى التىنعانىم احمەتوۆا جانە حورمەيستەر ايگەرىم ماكيباەۆا جەتەكشىلىك ەتكەن بالالار ستۋدياسى جاس ارتىستەرىنىڭ جۇمىسىن جەكە اتاپ وتكەن ءجون.
ەلوردا كورەرمەندەرى كورنەكتى يتالياندىق كومپوزيتوردىڭ ماڭگى وشپەس وپەراسىنىڭ جاڭا قويىلىمىن سۇيسىنە قابىل الدى.
