داستۇرگە ساي ءبىرىنشى بولىپ بالالار قاشىقتىعىنىڭ قاتىسۋشىلارى جۇگىردى. ساعات 7:30-دا 10-14 جاستاعى 1000-عا جۋىق جاس اتلەت ەڭ جۇيرىك اتاعىنا تالاستى. ۇلدار اراسىنان دومينيك بولوۆينتسەۆ, ال قىزدار اراسىنان ريما گرانكينا جەڭىمپاز اتاندى.
ساعات 8:10-دا رەسپۋبليكا الاڭىندا الماتى قالاسىنىڭ اكىمى باۋىرجان بايبەك پەن «الماتى مارافونىنىڭ» نەگىزىن قالاۋشى جانە عالىمجان ەسەنوۆ مارافون (42 كم) جانە جارتىلاي مارافون (21 كم), سونىمەن بىرگە كوماندالىق ەكيدەن ەستافەتاسىن اشتى. مۇنداي كوماندالاردىڭ سانى بيىل 113-كە جەتتى, بۇل دا ءبىر رەكورد بولىپ وتىر.
سپورتشىلاردىڭ سانى ەڭ كوپ 10 كم قاشىقتىق جارىسىنا قاتىسۋشىلار 8.25-تە جۇگىرە باستاپ, ولارعا سكانديناۆيالىق ءجۇرىس اۋەسقويلارى ىلەستى.
نەگىزگى (42 كم) قاشىقتىققا تاشكەنت قالاسىنان كەلگەن زيكريللو ماماتكۋلوۆ 2:28:34 ناتيجەسىمەن ءابسوليۋتتى جەڭىمپاز اتاندى. ال, قىزدار اراسىنان _ماسكەۋ قالاسىنان كەلگەن الەكساندرا كالانوۆا ەڭ ۇزدىك ناتيجە كورسەتتى (2:42:44). بيىل جالپى جۇلدە قورى 2 940 000 تەڭگە قۇراپ, ونى 42 جانە 21 كم قاشىقتىقتارعا جۇگىرگەن ەرلەر مەن ايەلدەر اراسىنان كوشباسشىلار ۇشتىگى ءبولىپ الدى.
«بيىل ءبىز سەگىزىنشى «الماتى مارافونىن» وتكىزدىك. جىل سايىن اۋەسقويلاردىڭ سانى ارتىپ, الەمنىڭ تۇكپىر-تۇكپىرىنەن ادامدار الماتىعا ادەيى وسى شارا ءۇشىن كەلىپ جاتىر. بۇل جولى سورەگە شىققانداردىڭ سانى بىلتىرعا قاراعاندا 3 مىڭ ادامعا ارتىق بولدى. شارا ناعىز سپورتتىق مەرەكەگە اينالا باستادى. جول قاشىقتىعىندا جۇگىرۋشىلەردى جانكۇيەرلەر قولداپ, ال ءبىز قاتىسۋشىلاردى سەرگىتۋ ءۇشىن مۋزىكالىق پۋنكتتەردى اشتىق, ولاردا بارابانشىلار, سىرنايشىلار, وركەستر, تىپتەن فۋتبول جانكۇيەرلەرى ونەر كورسەتتى. Led-ەكرانداردا جانكۇيەرلەردىڭ قولداۋ سوزدەرى جازىلعان بەينەروليكتەر مەن فوتوسۋرەتتەر كورسەتىلدى. جىل سايىن قالادا مارافوننىڭ اۋقىمى ارتىپ كەلەدى», -دەدى «الماتى مارافونىنىڭ» ديرەكتورى سالتانات قازىباەۆا.
«الماتى مارافونى» ءبىرىنشى جىلدان باستاپ الدىنا قايىرىمدىلىق ماقساتتارىن قويىپ كەلەدى. بيىل سورەلىك جارنادان تۇسكەن قاراجاتتىڭ ءبىر بولىگى بالالارعا ارنالعان ءۇش مەكەمەدە سپورتتىق الاڭداردى تۇرعىزۋعا جۇمسالماق.
