قۇرلىقتىڭ مىقتىسى – يسپانيا
سەيسەنبى, 3 شىلدە 2012 7:28
«قىزىل فۋريا» بۇل اتاققا تاريحتا ءبىرىنشى بولىپ قاتارىنان ەكىنشى مارتە قول جەتكىزىپ وتىر
شىلدەنىڭ 1-ءى كۇنى كيەۆتە وينالعان ەۋروپا چەمپيوناتىنىڭ فينالىندا يسپانيا قۇراماسى يتاليا كومانداسىن 4:0 ەتىپ ۇتىپ, ەۋروپا چەمپيونى اتاندى. ەگەر وسىلاردىڭ اراسىندا, 2010 جىلى «قىزىل فۋريانىڭ» الەم چەمپيوناتىن دا جەڭىپ العانىن ەسكە الار بولساق, بۇل ونىڭ سوڭعى ءتورت جىلدىڭ ىشىندەگى ءۇشىنشى تولاعاي تابىسى بولىپ تابىلادى.
سەيسەنبى, 3 شىلدە 2012 7:28
«قىزىل فۋريا» بۇل اتاققا تاريحتا ءبىرىنشى بولىپ قاتارىنان ەكىنشى مارتە قول جەتكىزىپ وتىر
شىلدەنىڭ 1-ءى كۇنى كيەۆتە وينالعان ەۋروپا چەمپيوناتىنىڭ فينالىندا يسپانيا قۇراماسى يتاليا كومانداسىن 4:0 ەتىپ ۇتىپ, ەۋروپا چەمپيونى اتاندى. ەگەر وسىلاردىڭ اراسىندا, 2010 جىلى «قىزىل فۋريانىڭ» الەم چەمپيوناتىن دا جەڭىپ العانىن ەسكە الار بولساق, بۇل ونىڭ سوڭعى ءتورت جىلدىڭ ىشىندەگى ءۇشىنشى تولاعاي تابىسى بولىپ تابىلادى.
ەۋروپا قارسىلاستاردىڭ ءبىرى ايقىن باسىمدىلىق تانىتقان مۇنداي فينالدى كوپتەن بەرى كورگەن جوق. ماسەلە يسپانداردىڭ چەمپيونات باستالعالى بەرى ءبىرىنشى رەت وسىنداي جويقىن ويىننىڭ جورتۋىلىنا جالىن قوسقانىندا عانا ەمەس. ولار ءوز ەلدەرىندەگى «بارسەلونانىڭ» ەڭ ءبىر كەرەمەت بابىندا تۇرعان كەزىندە ۇسىنا الاتىن بارىنشا ۇزدىك ويىندارىنىڭ ۇلگىسىن كورسەتتى. ساردار ۆيسەنتە دەل بوسكەنىڭ ساربازدارى ءۇشىن بۇل كۇنى الاڭ ۇستىندە ارتىق-اۋىس دوپ بەرىس, بوسقا جۇگىرىس, ءتىپتى بولماعان ەسەپتى. ولار ءبارىن وتە ءدال, مەيلىنشە ناقتى, قولدان كەلگەنىنشە تازا ىستەدى. ۇيىمداستىرعان كومبيناتسيالارىنىڭ ءوزى بىرىنەن ءبىرى اسىپ ءتۇستى. سونداي كەزدەردە ارەنانىڭ القىمىندا ءبىر عانا كوماندا ويناپ جاتقانداي اسەر قالدىردى. سەبەبى, ويىنى قۇيىنداي ۇيىتقىعانىمەن, دالدىكتىڭ دارگەيىنە باس ۇرعان يسپانداردىڭ قيمىلىنا يتالياندار ىلەسە الماي جاتتى.
ماتچتىڭ باسى ەكى جاقتىڭ دا ءبىر-بىرلەرىنە قاتاڭ پرەسسينگ قولدانا وتىرىپ, ساقتانا ارەكەت ەتۋىمەن ەستە قالدى. ال قاقپاعا قاراي سارتىلداتىپ ساقپان اتۋدى اپپەنيندىك جىگىتتەر باستادى. بىراق ايىپ الاڭىنىڭ اۋقىمىنان وراعىتا ۇرىلعان دوپ داربازادان دۇرەگەي ۇشتى. بۇدان كەيىن پيرەنەيلىك قورعاۋشىلار يتاليانداردىڭ مۇنداي ەركىنشىلىگىنە اسا كوپ جول بەرە قويمادى. ولار قارسى جاققا ءبىرىنشى قاۋىپتى سوققىنى 6 مينۋتتا ايىپ دوبىن ورىنداۋ ارقىلى جاسادى. وسىدان باستاپ يسپانداردىڭ باسىمدىلىعى ءسات سايىن ۇلعايىپ, تامشىدان قۇرالعان تەڭىزدەي بىرتە-بىرتە كولەمىن كوبەيتە بەردى. ولار يتاليانداردى جان-جاقتان قىسپاققا الىپ, دوپ بەرۋدى مۇلدەم دەرلىك قويدى. بۇعان «سكۋادرا ادزۋررا» قات-قابات قورعانىسىن قارسى قويدى. ەندى ونى بۇزىپ-جارىپ, ىشكە قاراي ءوتۋ وڭاي بولمادى. دەگەنمەن, يسپاندار مۇنىڭ دا ەبىن تاپتى. ولار ءبىر-بىرلەرىنە قىسقا قاشىقتىقتا پاس بەرە وتىرىپ, وزگەنىڭ ورىسىنەن ساڭىلاۋ تاپتى. العاشقى سوققىلار الىستان ۇرىلدى – اندرەس ينەستانىڭ اياعىنان ۇشقان بۇل ەكى دوپتى دا قورعاۋشىلار جولاي قاعىپ ۇلگەردى. بۇدان سوڭ ەكى اڭدۋشىسىن سوڭىنا ەرتە-مەرتە العا ۇمتىلعان سەسك فابرەگاستىڭ تاستاعان دوبىن حاۆي قاقپا باعانىنان ءسال عانا جوعارىدان زىڭك ەتكىزدى. وسى تۇستا ناعىز شاراسىزدىڭ ءحالىن كەشكەن يتالياندار قارسىلاستارىنان دوپتى دا تارتىپ الا المادى, ولاردىڭ تولقىندانىپ ءۇيىرىلىپ كەلىپ جاتقان شابۋىلدارىن دا توقتاتۋعا الدەرى كەلمەدى. يسپانداردىڭ وسى تاباندى شابۋىلى اقىرى گولعا جەتكىزدى. ءوزىنىڭ قىر-سوڭىنان قالماي جۇرگەن دجوردجو كەللينيدەن وڭ قاناتتىڭ شەگىنە قاراي سىتىلىپ شىققان فابرەگاس ءسال ارتقا بۇرىلىپ, الا باۋىر دوپتى داۆيد سيلۆاعا قاراي ءدال باعىتتادى. ال فورۆارد ءوزىنىڭ باسىنا ادەمى كەلىپ قالعان دوپتى قۇددى ءبىر بيلياردتىڭ تاسىن ۇرعانداي ەتىپ, ءبىر سەرپىپ قالىپ, قارسى الدىنداعى قاقپانىڭ تورىنە گۇمپ ەتكىزدى – 1:0. ءبىر مينۋتتان كەيىن يتاليان جاعى وسى گولدىڭ قارىمتاسىن قايتارىپ كەتە جازدادى. ستاندارتتى جاعدايدا دوپ ۇرۋ قۇقىعىن العان ولار ءتاپ-ءتاۋىر كومبيناتسيا ۇيىمداستىردى. بىراق سوڭىنا دەيىن مۇلتىكسىز ورىنداي المادى. سونىڭ سالدارىنان ول بىرەر بۇلتالاقتان سوڭ قاقپاشى يكەر كاسيلياستىڭ ولجاسىنا اينالدى. يتالياندار وسىدان سوڭعى ءبىرشاما ۋاقىتتى دا جامان وتكىزگەن جوق. ولار بىرنەشە رەت بۇرىشتاما دوبىن بەرۋ ارقىلى يسپانداردى ءوز ايىپ الاڭىنا قۋىپ تاستادى. ال قاقپاعا قاراي سوعىلعان ەكى سوققىنىڭ بىرەۋى عانا كاسيلياستىڭ الدىنان قايتتى.
البەتتە, يسپانيا بۇعان قارىزدار بولىپ قالعان جوق. ولار تاعى دا شۇعىل تۇردە قاۋىرت شابۋىلعا كوشتى. تاعى دا كەلليني ءوز قاناتىنداعى پوزيتسياسىندا ۇتىلىس تاپتى. ودان قاشقان دوپ ينەستانىڭ اياعىمەن ايىپ الاڭىنا جەتتى. وسى جەردە ونى اندرەا پيرلو ودان ارى اپارعىزبادى. وسىدان سوڭ يتالياندار ويىن تىزگىنىن قولعا الۋعا ءبىراز تالاپتانىپ باقتى. بۇعان ەپتەپ بەي-جاي قاراعان يسپاندار سالدەن كەيىن قايتادان اتقا قونعانداي اسەر قالدىردى. ولار 35 مينۋتتان باستاپ قارسىلاستارىنىڭ ايىپ الاڭىن ءبىراز شارلادى. سودان سوڭ يتالياندار بىرەر رەت العا قاراي جوڭكىلدى. مىنە, سولاردىڭ سوڭعىسىندا يسپانداردىڭ قارسى شابۋىلىن جىبەرىپ الدى. الاڭ ورتاسىنىڭ ارعى تۇكپىرىنەن جەدەل العا اسىرىلعان دوپ عالامات ءبىر ءدالدىكپەن جوردي البانى قاقپاشى دجانلۋيدجي بۋففونمەن بىرگە-ءبىر شىعاردى. بۇدان ارعىسى شەبەرلىكتىڭ شەگىنەن كورىندى – 2:0. يتالياندار وسى گولدان كەيىن تاعى دا تايلى-تاياعى قالماي كوتەرىلدى. ولاردىڭ جاپپاي شابۋىلى ريككاردو مونتوليۆونىڭ الىستان جونەلتكەن جالعىز سوققىسىمەن اياقتالدى.
ەكىنشى تايمدى يتاليا قۇراماسى قۇرامداعى وزگەرىسپەن باستادى. شابۋىلشى انتونيو كاسسانونىڭ ورنىنا شىققان انتونيو دي ناتالە العاشقى ساتتە قارىمتا گول سوعۋدىڭ ءسال الدىندا قالدى. ونىڭ باسپەن ۇرعان دوبى نىسانادان شامالى جوعارى كەتتى. وسى كەزدەرى يتالياندار اشىلا شابۋىل جاساۋعا ارەكەت ەتتى. وسىنى جاقسى پايدالانعان يسپاندار بىرنەشە قاۋىپتى جورىقتار ۇيىمداستىرىپ ۇلگەردى. ايتالىق, فابرەگاستىڭ الىستان ۇرعان دوبى باعاننىڭ جانىنان زۋ ەتتى. بۇدان سوڭ «قىزىل فۋريا» ويىنشىلارى ايىپ الاڭىنا توپىرلاي كىردى. ولاردىڭ سوققىلارىن بۋففون مەن قورعاۋشىلار اۋپىرىمدەپ ءجۇرىپ قايتاردى. اقىرىندا كەزەكتى مارتە ىشكە ەنۋ سەرحيو راموستىڭ قۇلاپ بارا جاتىپ باسپەن دوپ ۇرۋىنا جول اشتى. وسى دوپ يتاليان قورعاۋشىسىنىڭ قولىنا سارت ەتىپ ءتيدى دە, باعىتىن وزگەرتىپ, جەرگە قاراي جانتايدى. بىراق پورتۋگاليالىق رەفەري مۇنى كورسە دە, كورمەگەن بولدى.
وسىدان كەيىن يتاليانداردا شابۋىلدى ورىستەتكەننەن وزگە جول قالمادى. سونىڭ بىرىندە 50 مينۋتتا كاسيليانس قاتتى كەلگەن سوققىنى الدىنا قايتاردى. ونى قايتا سوقپاق بولعان دي ناتالە مۇمكىندىكتى بوسقا جىبەرىپ الدى. ال يسپانداردىڭ جاۋابى بۇدان الدەقايدا قاۋىپتى شىقتى. كەزەكتى گولدى ولار تاعى دا قارسى شابۋىل كەزىندە سالدى. يتاليانداردىڭ العا اسىرعان دوبىن جولاي ءىلىپ اكەتكەن حاۆي ونى جەدەل فەرناندو توررەسكە جەتكىزدى. سونىڭ ارقاسىندا بۋففونمەن جەكپە-جەك شىققان فەرناندو قاقپانىڭ ءبىر بۇرىشىنا دوپتى تاستاي سالدى – 3:0. سوڭعى ءتورتىنشى گول دا وسىعان ۇقساس بولدى. بۇل جولى توررەس الاڭعا ەندى عانا شىققان حۋان ماتاعا ايىپ الاڭىنىڭ ىشىندە ادەمى پاس بەردى. ەسەپتى تالقانداۋ دارەجەسىنە دەيىن جەتكىزگەن گول وسىلاي سوعىلدى.
ويىننان كەيىنگى ءباسپاسوز ءماسليحاتى كەزىندە, البەتتە, يسپانيا قۇراماسىنىڭ باس جاتتىقتىرۋشىسى ۆيسەنتە دەل بوسكە باقىتتى كورىندى. جۇزدەسۋدى اشقان ول: «بۇل عاجايىپ ويىنشىلار. ولار قالاي ويناۋدى ءبىلەدى جانە سونى جاسايدى. ءويتكەنى, فۋتبولدى تۇسىنەتىن ەلدە تۋعان. بۇل يسپان فۋتبولىنىڭ كەرەمەت شاعى. ءبىز عالامات ماتچ وتكىزدىك. بىراق يتاليانداردى دا باعالاماسقا بولمايدى. ءبىزدىڭ تەك جولىمىز بولىپ كەتتى», – دەدى. ءوز كەزەگىندە يتاليا قۇراماسىنىڭ باس جاتتىقتىرۋشىسى چەزارا پراندەللي دە مىناداي ءىرى ەسەپپەن ۇتىلعاندارىنا قاراماستان, وزدەرىنىڭ بىرىنشىلىكتى تاماشا ەتىپ وتكىزگەندەرىن ايتتى.
سونىمەن, كەزەكتى فۋتبول تويى تارقادى. ول ءبىر قۇرلىقتىڭ عانا بىرىنشىلىگى سانالعانىمەن, كۇللى الەمنىڭ قۇلاق ءتۇرىپ, كوز قاداعان ناعىز جاۋھار ءدۇنيەسىنە اينالدى.
سەرىك ءپىرنازار,
«ەگەمەن قازاقستان».
