چەمپيونات دەمىن العان شاق
سارسەنبى, 27 ماۋسىم 2012 6:46
ماۋسىمنىڭ 24-ىندە شيرەك فينالدىق ويىندار سوڭىنا جەتكەننەن كەيىن سول تورتتىككە كىرگەن كوماندالار ەكى كۇندىك ءۇزىلىس الدى. چەمپيوناتتىڭ دەمىن ىشىنە تارتىپ, تىنىس العان وسىناۋ ءساتى دۇلەي داۋىلدىڭ الدىنداعى سايابىر تاپقان تىنىشتىق سياقتى.
سارسەنبى, 27 ماۋسىم 2012 6:46
ماۋسىمنىڭ 24-ىندە شيرەك فينالدىق ويىندار سوڭىنا جەتكەننەن كەيىن سول تورتتىككە كىرگەن كوماندالار ەكى كۇندىك ءۇزىلىس الدى. چەمپيوناتتىڭ دەمىن ىشىنە تارتىپ, تىنىس العان وسىناۋ ءساتى دۇلەي داۋىلدىڭ الدىنداعى سايابىر تاپقان تىنىشتىق سياقتى.
ارىدان تولعاپ, بەرىدەن ويلاعاننىڭ وزىندە, بىرىنشىلىكتىڭ بۇل كەزەڭىندە ەشقانداي كۇتپەگەن وقيعالار بولعان جوق. نەگىزىنەن, ماماندار العا وزادى دەپ توپشىلاعان قۇرامالار سول مەجەدەن كورىنە ءبىلدى. پورتۋگاليا ءوزىنىڭ چەحتاردان كۇشتى ەكەنىن ءىس جۇزىندە دالەلدەسە, قازىرگى ساتتە ءبىر يىعى وزىق يسپاندار وزىنە بوي بەرمەي كەلگەن فرانتسۋزداردى تۇساۋدىڭ ىعىتىن جاقسى كەلتىردى. ال نەمىستەر مەن گرەكتەردى سالىستىرىپ جاتۋدىڭ ءوزى ارتىق. تەك انگليا مەن يتاليا اراسىنداعى شايقاستا عانا انىق فاۆوريت بولعان جوق. مۇندا ناقتىلى ماتچتا قاي جاساق ەپتىلىك تانىتسا, سونىڭ ايدىنى اساتىنى ايقىن ەدى. ول تۇتاستاي باسىمدىق كورسەتكەن يتاليانداردىڭ ويىننان كەيىنگى پەنالتي ارقىلى جەڭىسكە جەتكەنىن ايعاقتاپ بەردى. سونىمەن بىرگە, پلەي-وفف كەزەڭى كريشتيانۋ رونالدۋ, حابي الونسو, ماركو رويس جانە دجانلۋيدجي بۋففون سەكىلدى ويىنشىلاردى قاھارمان ەتىپ شىعاردى.
كريشتيانۋ رونالدۋ فاكتورى
جارتىلاي فينالعا ءبىرىنشى بولىپ پورتۋگاليانىڭ شىققانى بۇگىندە تاريح بولىپ قالدى. بىراق ونىڭ چەحيانى 1:0 ەتىپ ۇتۋى الاڭدا قالىپتاسقان جاعدايعا مۇلدەم جاناسپايدى. «ەۋروپالىق برازيلدەر» بۇكىل ماتچ بويىنا باسىمدىلىققا يە بولدى. وسى جاعدايدا ءىرى ەسەپپەن ۇتىلماي, امان كەتكەن چەحتاردىڭ جولى بولدى دەۋگە تولىق نەگىز بار. وسىعان جەتكىزبەۋ ءۇشىن پەتر چەح بىرنەشە رەت ەستەن تاندىرارلىقتاي سەيۆ جاسادى, ەكى رەت كريشتيانۋ رونالدۋدىڭ دوبىن قاقپا باعانى «جۇتتى», ەكى رەت گول سوعۋدىڭ تاماشا مۇمكىندىگىن ناني بوسقا جىبەرىپ الدى. ءبىر رەت ۋگۋ المەيدا چەحيا قاقپاسىنا كەرەمەت گول سالىپ ەدى, ول وفسايد دەگەن جەلەۋمەن سانالماي تاستالدى.
دەگەنمەن, پيرەنەيلىك جىگىتتەر ءوز دەگەندەرىنە جەتتى. ەكىنشى تايمنىڭ اقىرىندا قاقپاعا تۇسكەن بۇل گولدى كريشتيانۋ رونالدۋ ءوز ەسەبىنە جازدى. ال بۇگىنگى پورتۋگاليا قۇراماسىن تاپ وسى فورۆاردسىز ەلەستەتۋ مۇمكىن ەمەس. بۇلار ءبىر-ءبىرىنىڭ ءسينونيمى سياقتى. سەبەبى, كوماندا كاپيتانىنىڭ ويىنى جۇرمەسە, قۇرامانىڭ دا ويىنى العا باسا قويمايدى. بۇل اكسيوما وسى چەمپيونات كەزىندە دە الدەنەشە رەت دالەلدەندى. ايتالىق, بىرىنشىلىك باسىنداعى ەكى كەزدەسۋدە كريشتيانۋ وزىنە-ءوزى كەلە الماي ءجۇردى. سونىڭ ءناتيجەسىندە, پورتۋگالدار نەمىستەرگە ەسە جىبەرىپ قويدى. ال دانيالىقتاردى اۋپىرىمدەپ ءجۇرىپ, ارەڭ تىزە بۇكتىردى. بۇدان ءارى رونالدۋدىڭ ءدۋبلى تىركەلگەن گوللانديامەن ويىن ولاردىڭ چەمپيوناتتاعى ەڭ مىقتى ماتچتارىنىڭ ءبىرى بولىپ تانىلدى. كەلەسى كەزەكتە كاپيتاننىڭ جالعىز دوبى پاولۋ بەنتۋ ساربازدارىنا جارتىلاي فينالدىڭ ەسىگىن اشىپ بەردى.
ەندى پورتۋگاليا جارتىلاي فينالدا الەمنىڭ جانە ەۋروپانىڭ ءىس ۇستىندەگى چەمپيونى يسپانيامەن كەزدەسەدى. مۇندا, ءالبەتتە, ولارعا فاۆوريتتىك ءرولدى ەشكىم بەرىپ وتىرعان جوق. بىراق قۇرامىندا كريشتيانۋ رونالدۋ بار «ەۋروپالىق برازيلدەر» كەز كەلگەن ساتتە ماسەلەنى جەكە-دارا شەشىپ تە كەتە الار ەدى.
«نەمىس ماشينەسىن» كىم توقتاتادى؟
گەرمانيا قۇراماسى ءوزىنىڭ گرەكتەرمەن ماتچىندا پالەندەي قاتتى قارسىلىققا تاپ بولعان جوق. بۇل وسى ماتچقا يواحيم ليوۆ كوماندانىڭ شابۋىل شەبىن تۇگەلدەي وزگەرتىپ شىعارعانىنا قاراماستان ورىن الدى. كەرىسىنشە, «بۋندەستيم» وسىدان كەيىن ءتىپتى جاڭا قىرىنان كورىندى. نەمىستەردىڭ شابۋىلى بۇرىنعىدان دا جەدەل, جاي وتىنداي جارقىلدى بولىپ شىقتى. مۇندا وڭ قاناتتا ماركو رويس, سول قاپتالدا اندرە شيۋررلە ءوز قارسىلاستارىن قۇيىنداي ءيىرىپ, قايتا-قايتا ارتقا تاستاپ كەتۋمەن بولدى. ال جاراقاتىنان كەيىن قاتارعا ەندى عانا قوسىلىپ كەلە جاتقان 34 جاسار ميروسلاۆ كلوزە جىلدامدىعىن ءالى جوعالتا قويماعانىن تالاي تانىتتى.
بۇل جولعى 4:2 دەگەن ەسەپ تە ماتچتىڭ تولىق كەيپىن بەرە المايدى. ول يواحيم ليوۆ شاكىرتتەرىنىڭ پايداسىنا قاراي ءالى دە جىعىلا ءتۇسۋى قاجەت ەدى. تەك رويستىڭ ءوزى ءبىرىنشى تايمدا ءۇش رەت گول سوعاتىن ءساتتى پايدالانا المادى. ۇزىلىسكە دەيىن دوپ قۇددى ءبىر دۋالاپ تاستاعانداي ميحاليس سيفاكيستىڭ قاقپاسىنا قاراي باسپاي قويدى. تەك فيليپپ لامنىڭ دوپتى «توعىزدىققا» توپ ەتكىزگەنىنەن كەيىن عانا يىقتان اۋىر جۇك تۇسە باستاعانداي بولىپ كورىندى.
گەرمانيا قۇراماسى تەك ەكىنشى تايمنىڭ 55-تەن 61-مينۋتىنا دەيىن عانا ءبىرشاما قيىندىقتارعا تاپ كەلدى. وسى تۇستا گيورگوس ساماراس ەسەپتى تەڭەستىرىپ ۇلگەردى. الايدا, بۇدان كەيىن «بۋندەستيم» ايتارلىقتاي تەز ىلگەرى شىعىپ كەتتى. الدىمەن سامي حەديرا اياعىنا كەلىپ قالعان دوپتى توقتاتپاستان ۇرىپ, كەرەمەت گولدىڭ اۆتورى اتاندى. سودان سوڭعىسى شەبەرلىكتىڭ شەڭبەرىنەن ءورىلدى. وسى تۇستا كليۋزە مەن رويس ءبىر-ءبىر دوپتان سوعىپ, ەسەپتى تالقانداۋ شەگىنە دەيىن جەتكىزدى. راس, ماتچ سوڭىندا گەرمانيا وزىنە ءتىپتى كەرەك ەمەس جاعدايدا پەنالتيدەن گول سوقتىرىپ الدى. بۇل ادەمى ورنەكتەلگەن ونەگەلى ويىنعا ەپتەپ كولەڭكە ءتۇسىرىپ كەتتى.
ەندى, جارتىلاي فينالدا نەمىستەرگە يتاليا قۇراماسىمەن سەمسەر سىلتەسۋ كۇتىپ تۇر. بۇل ماتچتا, ءسوز جوق, فاۆوريت ءرولىن گەرمانيا الادى. بىراق «سكۋادرا ادزۋررانىڭ» وڭايلىقپەن بەرىلە سالمايتىنى تاعى ايان. ال «بۋندەستيم» بۇل كەزدەسۋگە قانداي كەلبەتتە شىعادى؟ ستارتتىق قۇرامعا گومەس, پودولسكي جانە ميۋللەر ورالا ما؟ قازىر, بالكىم, يواحيم ليوۆ بۇعان بىزدەن دە ارتىق باس قاتىرىپ جاتقان شىعار. بىراق بۇل جانعا جايلى باس اۋرۋى. سەبەبى, جاتتىقتىرۋشىدا تاڭداۋ بار. ال قارسى جاقتىڭ باس قاتىرۋى بۇدان دا كۇشتى بولسا كەرەك. ول قايتكەندە «نەمىس ماشينەسىن» تۇرعان ورنىندا كىلت توقتاتۋعا بولاتىنى توڭىرەگىندە ءوربيدى.
تاعى ءبىر ستاتيستيكا. گەرمانيا قۇراماسى وسى جەڭىسپەن بىرگە ءوزىنىڭ رەسمي ماتچتارداعى ۇتىستارى قاتارىن تۋرا 15-كە جەتكىزىپتى. بۇل – جاڭا رەكورد.
سونىمەن, چەمپيونات ءوزىنىڭ شەشۋشى كەزەڭىنە قادام باستى. بۇگىن تۇندە پورتۋگاليا مەن يسپانيا الاڭعا شىعادى. ەرتەڭ گەرمانيا مەن يتاليا فينالعا باراتىن مىقتىنى انىقتايدى. وسىلايشا بىرىنشىلىك ءوزىنىڭ مارەسىنە بىرتىندەپ جاقىنداپ كەلەدى.
Cەرىك ءپىرنازار,
«ەگەمەن قازاقستان».
