«بەيبارىس» باعىندىرعان بيىك
سەيسەنبى, 8 مامىر 2012 7:14
اتىراۋدىڭ شايبالى حوككەي كومانداسى ەكىنشى رەت ەل چەمپيونى اتاندى
مۇز ايدىنىندا قارسىلاستاردان ايلا اسىرىپ, قارسى كوماندانىڭ قاقپاسىنا شايبا سوعۋ دا وڭاي ەمەس. دەگەنمەن, «بەيبارىستىڭ» جولى بولىپ تۇر. وتكەن جىلدارعى جەتىستىكتى ايتپاعاننىڭ وزىندە, بيىلعى ماۋسىمدا «بەيبارىس» ويىنشىلارى تاعى دا بيىك بەلەسكە بالانعان چەمپيوندىق اتاقتى جەڭىپ الدى.
سەيسەنبى, 8 مامىر 2012 7:14
اتىراۋدىڭ شايبالى حوككەي كومانداسى ەكىنشى رەت ەل چەمپيونى اتاندى
مۇز ايدىنىندا قارسىلاستاردان ايلا اسىرىپ, قارسى كوماندانىڭ قاقپاسىنا شايبا سوعۋ دا وڭاي ەمەس. دەگەنمەن, «بەيبارىستىڭ» جولى بولىپ تۇر. وتكەن جىلدارعى جەتىستىكتى ايتپاعاننىڭ وزىندە, بيىلعى ماۋسىمدا «بەيبارىس» ويىنشىلارى تاعى دا بيىك بەلەسكە بالانعان چەمپيوندىق اتاقتى جەڭىپ الدى.
حوككەيدەن ەل چەمپيوناتىنىڭ كەزەكتى ويىندارى وتكەن جىلعى كۇزدەن بەرى وتكىزىلىپ, بيىل پلەي-وفف ويىندارىمەن جالعاسىن تاپتى. بۇل ويىن ەل چەمپيوناتىنىڭ تاريحىندا العاش رەت ەنگىزىلىپ وتىرعاندىقتان, «بەيبارىس» ويىنشىلارىنا شەبەرلىكتى بۇرىنعىدان دا شىڭداي تۇسۋگە تۋرا كەلدى. اتىراۋ حوككەيشىلەرىنە ءۇمىت ارتقان جانكۇيەردىڭ سەنىمى اقتالدى دەۋگە بولادى. شيرەك فينالدىق ويىنداردا «الماتىدان» باسىم تۇسكەن «بەيبارىستىڭ» ۇپايى ەسەلەنە ءتۇستى. ال تەمىرتاۋدىڭ «ارىستانىن» تازا جەڭىسپەن ۇتقان اتىراۋ حوككەيشىلەرىنە اقتىق سىندا قاتەلىككە ۇرىنباۋ قاجەتتىگى جۇكتەلدى.
– ءبىزدىڭ حوككەيشىلەرگە, – دەيدى «بەيبارىستىڭ» باس باپكەرى الەكساندر يستومين, – فينالدىق ويىندا التى كەزدەسۋ وتكىزۋ قاجەت بولدى. بۇل – پلەي-وفف ويىندارىنىڭ ەرەجەسى. ال قارسىلاسىمىز – «ەرتىس-پاۆلودار» ەڭ ازۋلى كوماندالاردىڭ ءبىرى. ءساتتى ويىن وتكىزىپ, جەڭىسكە جەتۋ ءۇشىن بىزگە قاتەلەسۋگە بولمايدى. ءوز ويىنشىلارىما وسىنداي تالاپ قويدىم.
ءسويتىپ, «بەيبارىس» قارسىلاسىمەن العاشقى ەكى كەزدەسۋدى ءوز مۇز ايدىنىندا كەزدەسىپ, ەكەۋىندە دە جەڭىستىڭ ءتاتتى ءدامىن تاتتى. الايدا, ۇنەمى بۇلاي بولا بەرمەيدى عوي. كەزەكتى ەكى ويىن قارسىلاستار ايدىنىندا, پاۆلوداردا وتكەندە اتىراۋلىق حوككەيشىلەرگە جەڭىلىستىڭ اششى ءدامىن تاتۋىنا تۋرا كەلدى. جەڭىسكە جەتۋ جولىنداعى اتىراۋدا كەزەكتى بەسىنشى ويىندا «بەيبارىس» ويىنشىلارى تاعى دا جەڭىسكە قول سوزدى. الايدا, ەڭ شەشۋشى التىنشى ويىننىڭ ناتيجەسى قالاي بولارى بەلگىسىز ەدى.
حوككەي جانكۇيەرلەرىنىڭ 26 ءساۋىردە وتكەن شەشۋشى ويىندى اسىعا كۇتكەنى انىق. ويتكەنى, ءدال وسى ويىندا قازاقستاننىڭ بيىلعى چەمپيون كومانداسى انىقتالاتىن ەدى. وسى ماتچتا جەڭىس 4:2 ەسەبىمەن اتىراۋلىق «بەيبارىس» كومانداسىنىڭ ەنشىسىنە جازىلدى. ويىننىڭ ءوتۋ بارىسىنا ەگجەي-تەگجەيلى توقتالماي-اق قويالىق, دەگەنمەن, «بەيبارىس» كومانداسى شايبالى حوككەيدەن ەكىنشى مارتە قازاقستان چەمپيونى اتانعانى اتىراۋ جۇرتشىلىعىن ايرىقشا قۋانتقانى داۋسىز. چەمپيونات قورىتىندىسىمەن «بەيبارىستىڭ» بەلدى ويىنشىلارى ميحايل پانشين «ۇزدىك شابۋىلشى», ال ماكسيم شاريفيانوۆ «ۇزدىك ويىنشى» اتاندى.
– ءبىز سوڭعى شەشۋشى ويىندا قاتەلىككە ۇرىنباۋدى باستى ماقسات ەتتىك. سول ماقساتىمىز ورىندالدى. شەشۋشى ويىندى ءساتتى وتكىزدىك. تورەشىلەر تاراپىنان دا ەش قاتەلىك بولعان جوق. ەندى قىركۇيەكتە باستالاتىن كەزەكتى چەمپيوناتقا تىڭعىلىقتى دايىندىقتى باستايمىز, – دەيدى «بەيبارىستى» ەكىنشى مارتە بيىك بەلەستى باعىندىرۋعا جۇمىلدىرعان باس باپكەر الەكساندر يستومين.
ايتپاقشى, قازاقستان چەمپيوندىعىن ەكى رەت جەڭىپ العان «بەيبارىس» كومانداسى بۇدان بىلاي تەك اتىراۋدىڭ عانا ەمەس, ەل نامىسىن ەۋروليگادا قورعاۋ مۇمكىندىگىنە يە بولىپ وتىر. جاقىندا وبلىس اكىمدىگى كومانداعا 40 ملن. تەڭگە ءبولىپ, قۇرمەت كورسەتتى.
جولداسبەك شوپەعۇل.
اتىراۋ وبلىسى.
