ءبىر تويداعى ءۇش ەرەكشەلىك
سەيسەنبى, 27 قاراشا 2012 6:55
جاقىندا ەلوردامىزداعى مەيرامحانالاردىڭ بىرىندە قۇنىپيا مەن اقبوپە الپىسباەۆتاردىڭ نەمەرەسى – ابدۋلعافيزدىڭ سۇندەت تويىنا 150-گە جۋىق قوناقتىڭ ءبىرى رەتىندە قاتىسقانىمىز بار. الىس-جاقىننان قۇتتى بولسىن ايتىپ, ارنايى كەلگەن كوپشىلىك اسەم ءان مەن كۇمبىرلەگەن كۇي تىڭداپ, كونتسەرت كورىپ وتىرعانداي ءبىر دەمالىپ قايتتى. توي يەلەرىنە ريزا بولىپ تارقاستى.
سەيسەنبى, 27 قاراشا 2012 6:55
جاقىندا ەلوردامىزداعى مەيرامحانالاردىڭ بىرىندە قۇنىپيا مەن اقبوپە الپىسباەۆتاردىڭ نەمەرەسى – ابدۋلعافيزدىڭ سۇندەت تويىنا 150-گە جۋىق قوناقتىڭ ءبىرى رەتىندە قاتىسقانىمىز بار. الىس-جاقىننان قۇتتى بولسىن ايتىپ, ارنايى كەلگەن كوپشىلىك اسەم ءان مەن كۇمبىرلەگەن كۇي تىڭداپ, كونتسەرت كورىپ وتىرعانداي ءبىر دەمالىپ قايتتى. توي يەلەرىنە ريزا بولىپ تارقاستى.
ارينە, قازاقتا توي كوپ – شىلدەحانا تويىنان باستالىپ, ءجۇزجىلدىق مەرەيتويعا دەيىن جالعاسا بەرەدى. بولسىن, وعان ەشكىمنىڭ قارسىلىعى جوق. باستى ماسەلە, تويدىڭ قالاي وتكىزىلۋىندە بولسا كەرەك. ال ابدۋلعافيزدىڭ سۇندەت تويىنىڭ توي جاساۋشى اتا-انانىڭ, جالپى, كوپشىلىكتىڭ قاپەرىندە جۇرەتىندەي وزىندىك ەرەكشەلىكتەرى بولدى.
ءبىرىنشى, ءارى ەڭ باستى ەرەكشەلىگى – توي داستارقانىنا اراق-شاراپ سەكىلدى ىشىمدىك اتاۋلى قويىلمادى. ولاردىڭ ورنىندا قىمىز بەن شۇبات, باسقا دا سۋسىندار تۇردى. «اراق-شاراپ نەگە جوق؟» – دەگەن سوزدەر دە ەستىلمەدى. ەكىنشى – توي ءان-جىرسىز وتپەيتىنى بەلگىلى. كوپشىلىك تويلاردا شەتەلدىڭ اندەرى مەن بيلەرىنە باسىمدىق بەرىلىپ جاتاتىنى جاسىرىن ەمەس. بۇل تويدا شەتەلدىڭ بىردە-ءبىر ءانى ورىندالمادى. ونىڭ ەسەسىنە, ءانشى-دومبىراشىلار قازاقتىڭ ءداستۇرلى اندەرىن كوبىرەك شىرقادى, جاستار «قاماجاي» مەن «قاراجورعاعا» بيلەدى.
ءۇشىنشى ەرەكشەلىگى – تويدىڭ ءوز ۋاقىتىندا باستالۋى مەن اياقتالۋى. جەكسەنبى كۇنى بولعاندىقتان شىعار, قوناقتار ساعات 14.00-گە شاقىرىلعان ەكەن. تويدىڭ باستالۋى كوپ كەشىكپەدى, ساعات 14.30-دا قوس وركەشتى «اق تۇيەگە» مىنگەن ابدۋلعافيز قولىنا سەگىز ءورىم قامشىنى بۇكتەي ۇستاپ, مەيرامحانا زالىنا كىرىپ كەلە جاتتى.
ال توي, ارادا ءتورت ساعات ءوتكەندە, ياعني ساعات 18.30-دا اياقتالدى. وسى ءتورت ساعاتتا تىلەكتەر دە ايتىلدى, اندەر دە شىرقالدى, بي دە بيلەندى. وسىلايشا, قۋانىشقا ورتاقتاسۋعا كەلگەن كوپشىلىك جاقسى دەمالىپ, ريزا بولىپ تارقاستى.
ءاليسۇلتان قۇلانباي,
«ەگەمەن قازاقستان».
استانا.
