اسەت ءاسساندي ءوزىنىڭ پاراقشاسىندا بىرنەشە پوست جاريالاپ, جانتۇرشىگەرلىك سۋرەتتەر سالعان. ايتۋىنشا, ءبىر ءۇيدىڭ ءۇش قىزىنا وگەي شەشەلەرى ينە تىعىپ, توڭازىتقىشقا وتىرعىزىپ قويعان.
«اپالى-ءسىڭلىلى - 2003 جىلعى ساليما, 2005 جىلعى مانشۇك, 2007 جىلعى ميلانا. بۇل قاراكوزدەرىمىزدىڭ كورمەگەن قورلىعى قالماپتى. وگەي اناسى, 1991 جىلعى كوبەەۆا جۇلدىز فاشيستەردەن دە اسىپ تۇسكەن سياقتى. كامەلەت جاسىنا تولماعان قىزداردىڭ تىرناقتارىنىڭ استىنا قايتا-قايتا ينە تىعىپ, جىلايىن دەسە, ۇرىپ-سوعىپ «ك ۇلىپ تۇر» دەپ, جاندارىنا باتىپ تۇرسا دا, ەزۋلەرىن تارتقىزىپ, توڭازىتقىشقا ءبىرتالاي ۋاقىت وتىرعىزىپ قيناپ, قايشىمەن دەنەلەرىنە جاراقات سالىپ, شايلارىنا گەل قوسىپ بەرىپ ىشكىزىپ, ءتىپتى جىنىستىق مۇشەلەرىن كەمپىراۋىزبەن قىسىپ, جاراقات سالىپ جۇرگەن ەكەن. بۇل قىزداردىڭ كورگەن ازاپتارى ادام ايتقىسىز. جەتىسايدان تابىلماعان اراشانى تۇركىستان وبلىسىنىڭ باسشىلارى, زاڭ ورىندارىنان, دەنساۋلىق ساقتاۋ باسقارماسىنان سۇرايمىز! قاراكوزدەرىمىزدى جىلاتۋعا جول بەرمەيىك! جانە الگى وگەي شەشەلەرىن قاتاڭ جازاعا تارتايىق»- دەپ جازادى اسەت ءاسساندي.
ايتا كەتەيىك, اتالمىش وقيعاعا قاتىستى ىشكى ىستەر مينيسترلىگىنىڭ رەسمي وكىلى ءنۇردىلدا وراز پىكىر ءبىلدىردى. ونىڭ ايتۋىنشا, ماسەلەنى ىشكى ىستەر ءمينيسترى ەرلان تۇرعىمباەۆ ءوز باقىلاۋىنا العان. «الەۋمەتتىك جەلى ارقىلى كەڭىنەن تارالىپ, جەتىساي اۋدانىنداعى ءبىر وتباسىندا ورىن العان وگەي اناسىنىڭ قاتىگەزدىكپەن بالالارىن ۇرىپ-سوعىپ, دەنە جاراقاتىن سالۋ ارقىلى زورلىق كورسەتكەن جايت بويىنشا قىلمىستىق ءىس قوزعالدى. ماسەلەنىڭ ءمان-جايىن انىقتاۋ ءۇشىن ارنايى كوميسسيا قۇرىلدى. كوميسسيا شەشىمىمەن بالالار اجەسىنە تاپسىرىلعان», - دەپ جازادى ءنۇردىلدا وراز.
