بۇل كەزەكتەن تىس وتكەلى وتىرعان پرەزيدەنتتىك سايلاۋدىڭ تاريحي ماعىناسى وسى تۇرعىدان ۇلكەن مانگە يە. اتالعان تاريحي وقيعانىڭ سالماعىن الداعى ۋاقىتتا سايلاۋعا تۇسەتىن ءۇمىتكەرلەر, ءتىپتى ارتتىرا تۇسەدى. قۇدايعا شۇكىر, قازاق ەلىندە پرەزيدەنت بولۋعا لايىقتى ازاماتتار جەتكىلىكتى, ولاردىڭ بارلىعى ەل باسقارۋعا نيەت ءبىلدىرۋى ءتيىس. سولاردىڭ ىشىنەن حالىق ءوزىنىڭ قالاۋلىسىن قاپىسىز تاڭدايدى دەپ سەنەمىن. پرەزيدەنتىمىز قاسىم-جومارت توقاەۆ ءوزى اتاپ وتكەندەي, بۇل سايلاۋدى ءادىل وتكىزۋگە جاۋاپكەرشىلىك الاتىنىن جەتكىزدى. بۇل ءسوزدى مەملەكەت باسشىسى جايدان-جاي ايتىپ وتىرعان جوق.
ق.توقاەۆ پرەزيدەنتتىك سايلاۋ وتكىزۋدە ۇلكەن تاجىريبەسى بار تۇراقتى تۇلعا. مينيستر مىنبەرىندە بولسىن, مەملەكەتتىك حاتشى مىندەتىن اتقارعان تۇستا, سىرتقى ساياسات ساحناسىندا ءجۇرگىزگەن ساليقالى ساياساتى بۇل مەملەكەت باسشىسىنىڭ زور ءتاجىريبەسىن ايعاقتايدى. پرەزيدەنت قازاق حالقىن جاقسى بىلەدى, سايكەسىنشە قاسىم-جومارت كەمەل ۇلىن دا بۇقارا جاقىن تانيدى. ول كىسىنىڭ سايلاۋ ءادىل وتەدى دەگەن ءسوزى ءبىزدى نىق قادامدارعا جەتەلەپ اكەتتى. سايلاۋدىڭ تازا ءوتۋى – كوپ جايتتاردىڭ, سونىڭ ىشىندە مۇسىلماندىق جولىمىزدىڭ دۇرىس ەكەنىن بىلدىرەدى. تازا دەگەن ءسوز – ادىلەتتىلىك دەگەن قاعيدانىڭ تۋرا بالاماسى. بۇل ادىلدىك جولى بارلىعىمىزدى مارقايتاتىن شەشىم.
ءبىز وسى ەكى ايدىڭ وزىندە ۇلت رەتىندە ەداۋىر وسەمىز. قازىر قوعام قوزعالىسقا كەلدى, ءارتۇرلى ويلار مەن الۋان پىكىرلەردىڭ دە اشىق تالقىلانعانى زاڭدى. الايدا ءبىزدىڭ حالىق – شاراسىنان شىقپايتىن, ساباسىنان سىرتقا توگىلمەيتىن حالىق. وزەن قالاي ءوز ارناسىمەن اقسا, ءبىزدىڭ قوعامنىڭ مىنەزى دە سونداي. ءبىز ەل ءۇشىن, بولاشاق ءۇشىن ءوز ارنامىزبەن جۇرەمىز. سايلاۋ دا ءوز ارناسىمەن وتەتىنىنە كامىل سەنەمىن.
عاريفوللا ەسىم,
ۇعا اكادەميگى
