الدىن الا مالىمەت بويىنشا, سوققى دۋباي حالىقارالىق قارجى ورتالىعى (DIFC) ورنالاسقان اۋدانعا باعىتتالعان. ازىرگە شابۋىلدىڭ ناقتى سالدارى مەن زارداپ شەككەندەر تۋرالى رەسمي مالىمەت جاريالانعان جوق. جەرگىلىكتى بيلىك قاۋىپسىزدىك قىزمەتتەرى وقيعانىڭ ءمان-جايىن انىقتاپ جاتقانىن مالىمدەدى.
بۇعان دەيىن يراننىڭ جاڭا جوعارعى رۋحاني جەتەكشىسى اياتوللا مودجتابا حامەنەي يسلام رەسپۋبليكاسى ايماقتاعى امەريكالىق اسكەري نىساندارعا سوققى جاساۋدى جالعاستىراتىنىن ايتقان ەدى. سونىمەن قاتار ول يران كورشى مەملەكەتتەرمەن دوستىق قارىم-قاتىناستى ساقتاۋعا مۇددەلى ەكەنىن اتاپ وتكەن.
ايماقتاعى جاعداي 28 اقپاندا اقش پەن يزرايل يرانعا قارسى اسكەري وپەراتسيا باستاعاننان كەيىن كۇرت شيەلەنىسە ءتۇستى. امەريكالىق جانە يزرايلدىك كۇشتەر يران اۋماعىنداعى بىرقاتار اسكەري نىساندارعا سوققى جاساپ, اۋە قورعانىسى جۇيەلەرى, زىمىران كەشەندەرى, اسكەري بازالار مەن تەڭىز كۇشتەرىنىڭ ينفراقۇرىلىمىن نىساناعا العان.
ترامپ يران قۇراماسىنىڭ الەم چەمپيوناتىنا قاتىسۋىن ورىنسىز دەپ باعالادى
ۆاشينگتون بۇل وپەراتسيانىڭ ماقساتى يراننىڭ اسكەري الەۋەتىن السىرەتۋ جانە ونىڭ زىمىراندىق ءارى يادرولىق باعدارلاماسىنىڭ دامۋىن تەجەۋ ەكەنىن مالىمدەگەن.
وپەراتسيا باستالعالى بەرى يران اۋماعىنا جۇزدەگەن سوققى جاسالعان. شابۋىلدار كوماندالىق ورتالىقتارعا, قارۋ-جاراق قويمالارىنا جانە زىمىران ۇشىرۋ قوندىرعىلارىنا باعىتتالعان.
ءوز كەزەگىندە تەگەران دا جاۋاپ رەتىندە تاياۋ شىعىستاعى امەريكالىق بازالار مەن اقش وداقتاستارىنىڭ نىساندارىنا زىمىران جانە ۇشقىشسىز اپپاراتتار ارقىلى سوققى جاساي باستادى. ساراپشىلار بۇل ارەكەتتەر ايماقتاعى قاقتىعىستىڭ اۋقىمى كەڭەيىپ, اسكەري تەكەتىرەستىڭ جاڭا كەزەڭىنە وتكەنىن كورسەتەدى دەپ باعالاپ وتىر.
