كورسەتىلەتىن مەملەكەتتىك قىزمەتتەردىڭ ساپاسىن ارتتىرۋ, قىزمەت كورسەتۋ مەرزىمىن قىسقارتۋ, جەمقورلىق تاۋەكەلدەرىن جويۋ جانە قولايلى جاعداي جاساۋ ءۇشىن قۇرىلعان كوشى-قون قىزمەتى ورتالىقتارىندا ەڭبەك ميگرانتتارىنا رۇقساتناما بەرۋ بويىنشا قىزمەت «ءبىر تەرەزە» قاعيداسىمەن جۇزەگە اسادى. سەبەبى زاڭسىز جۇمىس ىستەپ جۇرگەن شەتەلدىكتەر ءۇشىن وتاندىق ميگراتسيالىق پوليتسيا قىرعيداي تيەتىنى بەلگىلى. بىرەۋدىڭ ءۇيىن سالىپ, كافەسىندە شاي تاسىعانداردى ۋاقىتشا تەمىر تورعا توعىتاتىنى بار. وندايدا الگى ميگرانتتاردى شاقىرعان قازاقستان ازاماتتارى پوليتسەيلەردىڭ «كوڭىلىن تاۋىپ», بوساتىپ الادى. وسىنداي جەمقورلىق فاكتىلەرى ازايۋ ءۇشىن ەڭبەك ەتۋگە رۇقسات الۋ كەزىندە ادام فاكتورى دا كەمۋى كەرەك.
ءىىم كوشى-قون قىزمەتى كوميتەتىنىڭ توراعاسى مۇرات قابدەنوۆتىڭ ايتۋىنشا, بۇرىن ميگرانتتار رۇقساتنامانى راسىمدەۋ ءۇشىن اپتا بويى ءارتۇرلى مەكەمەلەردى (مەملەكەتتىك كىرىستەر دەپارتامەنتىندە جسن جاساۋ, مەديتسينالىق انىقتاما الۋ, پوليتسيا بولىمدەرىندە فوتوسۋرەتكە ءتۇسۋ جانە داكتيلوسكوپيادان ءوتۋ, مەملەكەتتىك باج سالىعىن تولەۋ, اۋدارما جانە نوتاريالدىق قىزمەتتەر) ارالاپ جۇرەتىن. ال قازىر كوشى-قون قىزمەتى ورتالىعىندا مۇنداي رۇقساتنامانى بىرنەشە ساعاتتىڭ ىشىندە راسىمدەۋگە بولادى.
مۇنداي ورتالىقتاردى قۇرۋداعى باستى ماقسات – ەلىمىزگە كەلگەن شەتەلدىكتەرگە كورسەتىلەتىن مەملەكەتتىك قىزمەتتەردىڭ ساپاسىن ارتتىرۋ, جەمقورلىققا يتەرمەلەيتىن جاعدايلاردى جويۋ, قىزمەت كورسەتۋ مەرزىمىن قىسقارتۋ.
– كوشى-قون قىزمەتى ورتالىعىندا شەتەلدىك تولقۇجات پەن كوشى-قون كارتوچكاسىن ۇسىنۋ ارقىلى مەديتسينالىق تەكسەرۋدەن, داكتيلاسكوپيالاۋدان وتەدى, ساقتاندىرۋدى راسىمدەپ, مەملەكەتتىك باج سالىعىن تولەيدى, سودان سوڭ وعان جۇمىس جاساۋعا رۇقساتناما راسىمدەلەدى. «ازاماتتارعا ارنالعان ۇكىمەت» مك كەاق-مەن بىرگە كوشى-قون قىزمەتى ورتالىقتارى ەلىمىزدىڭ 14 وڭىرىندە اشىلدى, – دەپ مالىمدەدى مۇرات قابدەنوۆ.
جوعارىدا ايتقانىمىزداي, ورتالىق ازياداعى كورشىلەرىمىزدەن قازاقستانعا ەكى قولعا ءبىر كۇرەك ىزدەپ كەلەتىن جاندار از ەمەس. ماسەلەن, جىل سايىن ورتا ەسەپپەن تەك وزبەكستاننان 140 مىڭ كىسى كەلەدى. قىرعىز رەسپۋبليكاسىنان 80 مىڭ. ارينە, ەڭبەك ميگراتسياسى كەز كەلگەن مەملەكەت ءۇشىن ەكىۇداي ماسەلە. ءبىر جاعىنان ارزان ەڭبەك كۇشى, نارىقتاعى شاعىن كاسىپكەرلەر ءۇشىن تاپتىرماس جۇمىسشىلار. الايدا ولاردىڭ اراسىندا دا قىلمىس جاسايتىندارى, جۇمىسسىز قازاقستاندىقتارعا قىزمەت ورنى ءۇشىن باسەكەلەس بولاتىندارى دا جەتەرلىك. باس پروكۋراتۋرانىڭ مالىمەتىنشە, 2017 جىلى ميگرانتتار قازاقستانداعى بارلىق قىلمىستىڭ 2,8% جاساعان, كوپ ەمەس. بىراق جات جەرلىكتىڭ ءبىر قىلمىس جاساۋىنىڭ ءوزى الاڭداتارلىق ماسەلە.
وتكەن جىلى ءىىم تۇرعىندارعا 19,5 ملن مەملەكەتتىك قىزمەت كورسەتىپتى, سونىڭ ءىشىندە كوشى-قون باعىتىنداعىسى 16,5 ملن. تۇرعىندار اراسىندا مەكەنجاي انىقتاماسى, اۆتوكولىكتى تىركەۋ, قازاقستان ازاماتتارىن تۇرعىلىقتى جەرى بويىنشا ءتىركەۋ, تولقۇجاتتار مەن جەكە كۋالىكتەر بەرۋ, ەلىمىزگە ۋاقىتشا كەلگەن شەتەلدىكتەردى ءتىركەۋ, جۇرگىزۋشى كۋالىكتەرىن بەرۋ سياقتى قىزمەتتەر كوپ سۇرانىسقا يە.
