قازۇپۋ ءباسپاسوز قىزمەتىنىڭ مالىمەتى بويىنشا, كەزدەسۋ بارىسىندا اگادجافار گاسانالي «ماحمۇد قاشقاري» قورىنىڭ قىزمەتى تۋرالى اڭگىمەلەدى. ونىڭ ايتۋىنشا, «قور 14 جىل بۇرىن ءازىربايجان استاناسىندا, تۇركى الەمىنىڭ تانىمال تۇلعالارىنىڭ باستاماسىمەن باكۋ قالاسىندا قۇرىلدى. قوردىڭ نەگىزگى ماقساتى تۇركى حالىقتارىنىڭ تاريحى مەن مادەنيەتىن بىرىكتىرۋ, تاريحي-مادەني بايلانىستار پريزماسى ارقىلى مەملەكەتتەر اراسىنداعى ىنتىماقتاستىقتى دامىتۋ بولىپ تابىلادى». سونداي-اق, اگادجافار گاسانالي پەداگوگيكالىق, گۋمانيتارلىق جانە جاراتىلىستانۋ عىلىمدارىن دامىتۋدا, قازاقستانداعى ءبىلىم بەرۋ سالاسىنىڭ دامۋىنا قوسقان وراسان زور ۇلەسى مەن قازاقستاننىڭ تۇڭعىش ۋنيۆەرسيتەتىنىڭ عىلىمي جانە پەداگوگيكالىق كادرلاردى دايارلاۋداعى, وقۋ ورنىن حالىقارالىق تاجىريبەگە سايكەستەندىرۋدە تابىستى كوشباسشىلىعى ءۇشىن اباي اتىنداعى قازۇپۋ رەكتورى تاكير بالىقباەۆتى «ماحمۇد قاشقاريدىڭ 1000 جىلدىعى» مەدالىمەن ماراپاتتاۋ تۋرالى ماحمۇد قاشقاري قورى پرەزيديۋمىنىڭ شەشىمىن حابارلاپ, رەكتورعا «ماحمۇد قاشقاريدىڭ 1000 جىلدىعى» مەدالىن تابىس ەتتى.
قازاقستانداعى ءازىربايجان ەلشىلىگىنىڭ وكىلى راميل رزاەۆ ءوز ەلىنىڭ اتىنان قازۇپۋ رەكتورىن قۇتتىقتاپ, ەڭبەك جولىندا تابىس تىلەدى. ول سونداي-اق, كەزدەسۋدىڭ ءبىلىم جانە عىلىم سالاسىنداعى ەكى مەملەكەتتىڭ ورتاق قۇندىلىقتارىن نىعايتۋداعى ماڭىزدىلىعىن اتاپ ءوتتى.
