قاۋلىلاردىڭ جوباسى بويىنشا ورتالىق سايلاۋ كوميسسياسىنىڭ مۇشەسى زاۋرەش بايمولدينا باياندادى. كونستيتۋتسيانىڭ 33-بابى 2 جانە 3-تارماقتارىندا: «رەسپۋبليكا ازاماتتارىنىڭ مەملەكەتتىك ورگاندار مەن جەرگىلىكتى ءوزىن ءوزى باسقارۋ ورگاندارىن سايلاۋعا جانە ولارعا سايلانۋعا, سونداي-اق رەسپۋبليكالىق رەفەرەندۋمعا قاتىسۋعا قۇقىعى بار. سوتتىڭ ارەكەتكە قابىلەتسىز دەپ تانىعان, سونداي-اق سوت ۇكىمى بويىنشا باس بوستاندىعىنان ايىرۋ ورىندارىندا وتىرعان ازاماتتاردىڭ سايلانۋعا قۇقىعى جوق» دەلىنگەن. ال 41-باپتىڭ 2-تارماعىندا جاسى قىرىقتان كىشى ەمەس, مەملەكەتتىك ءتىلدى ەركىن مەڭگەرگەن, سوڭعى ون بەس جىلدا قازاقستاندا تۇراتىن, جانە جوعارى ءبىلىمى بار رەسپۋبليكادا تۋعان ازاماتتار سايلانا الادى. سونىمەن ءبىرگە كونستيتۋتسيالىق زاڭدار رەسپۋبليكا پرەزيدەنتتىگىنە كانديداتتارعا قوسىمشا تالاپتار قويۋى مۇمكىن.
«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 4-بابىنىڭ 4-تارماعىنا سايكەس سوتتىلىعى بار نەمەسە ول جويىلماعان نە بولماسا زاڭدا كورسەتىلگەن تارتىپپەن الىنباعان تۇلعالار پرەزيدەنتتىككە كانديدات بولا المايتىندىعى كورسەتىلگەن. سونداي-اق سىبايلاس جەمقورلىققا قاتىستى قىلمىس جاساعان جانە وسى قىلمىسپەن قۇقىق بۇزعاندىعى سوتپەن تانىلعان تۇلعالار دا كانديدات بولا المايدى. 54-باپتىڭ 1-تارماعى پرەزيدەنت بولىپ سايلانۋ ءۇشىن ازامات مەملەكەتتىك قىزمەتتە نەمەسە سايلانبالى مەملەكەتتىك لاۋازىمداردا 5 جىلدان كەم ەمەس تاجىريبەسى بولۋى كەرەكتىگىن تالاپ ەتەدى. وسى باپتىڭ 2-تارماعىندا ءۇمىتكەر رەسپۋبليكالىق قوعامدىق ۇيىم وتىرىسىنىڭ شەشىمىمەن كانديداتتىققا ۇسىنىلاتىندىعى جونىندەگى حاتتامانىڭ كوشىرمەسىن, ءوزىنىڭ ءوتىنىشىن جانە سايلاۋ جارناسىن تولەگەندىگى جونىندە قۇجاتتار تاپسىرعاننان كەيىن ونىڭ پرەزيدەنتتىككە كانديدات بولۋعا سايكەستىگىن كونستيتۋتسياعا جانە وسى كونستيتۋتسيالىق زاڭدارعا سۇيەنىپ, ورتالىق سايلاۋ كوميسسياسى بەس كۇندە انىقتايدى. وتىنىشكە ارنايى فورمادا تولتىرىلعان بيوگرافيالىق دەرەكتەرى, مەملەكەتتىك قىزمەتتە نەمەسە سايلانبالى مەملەكەتتىك لاۋازىمداردا ىستەگەنى تۋرالى اقپاراتتار قوسا بەرىلەدى.
پرەزيدەنتتىككە كانديدات بولعان ۇمىتكەر ورتالىق سايلاۋ كوميسسياسىنىڭ ەسەپشوتىنا زاڭمەن بەكىتىلگەن ەڭ تومەنگى ەڭبەكاقىنىڭ 50 رەت ەسەلەنگەن كولەمىندە سايلاۋ جارناسىن سالادى. وسى قۇجاتتاردىڭ ءبارى تولىق بولعاندا عانا وسك ونى قاراۋعا الىپ, ۋاكىلەتتى ورگاندارعا قۇجاتتارداعى دەرەكتەردىڭ راستىعىن تەكسەرۋگە جەدەل جىبەرەدى.
ۋاكىلەتتى ورگانداردان ءتيىستى مالىمەتتەر كەلىپ تۇسكەننەن كەيىن ورتالىق سايلاۋ كوميسسياسى قازاقستان رەسپۋبليكاسىنىڭ پرەزيدەنتتىگىنە كانديداتتىڭ قازاقستان رەسپۋبليكاسىنىڭ كونستيتۋتسياسىندا جانە «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىندا قويىلاتىن تالاپتارعا سايكەستىگىن بەلگىلەۋ تۋرالى حاتتاما جاسايدى. وسى حاتتامادا ورتالىق سايلاۋ كوميسسياسى كانديداتتىڭ زاڭ تالاپتارىنا سايكەستىگىن نەمەسە سايكەس ەمەستىگىن, ونىڭ ءىشىندە لينگۆيستيكالىق كوميسسيانىڭ قورىتىندىسى نەگىزىندە مەملەكەتتىك ءتىلدى ءبىلۋىن بەلگىلەيدى. كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءراسىمى ورتالىق سايلاۋ كوميسسياسىنىڭ قاۋلىسىمەن ايقىندالادى.
وسىدان ءارى بايانداماشى قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا شەت مەملەكەتتەر, حالىقارالىق ۇيىمدار بايقاۋشىلارىنىڭ, شەتەلدىك بۇقارالىق اقپارات قۇرالدارى وكىلدەرىنىڭ قىزمەتىن ۇيىمداستىرۋ تۋرالى ايتىپ بەردى. ءوتكەن جىلى سايلاۋ تۋرالى كونستيتۋتسيالىق زاڭعا شەت مەملەكەتتەر مەن حالىقارالىق ۇيىمداردىڭ بايقاۋشىلارىنا اۋدارماشى بىرگە جۇرۋگە قۇقىلىعى تۋرالى جاڭا نورما ەنگىزىلدى. شەت مەملەكەتتەر جانە حالىقارالىق ۇيىمدار بايقاۋشىلارى قازاقستان رەسپۋبليكاسى سىرتقى ىستەر مينيسترلىگىنىڭ ۇسىنىمى بويىنشا وسك-دە اككرەديتتەلەدى. ولار اككرەديتتەۋ تۋرالى كۋالىك بولعان جاعدايدا عانا سايلاۋعا بايقاۋ جاساي الادى.
سونىمەن بىرگە 10 ءساۋىر كۇنى قازاقستان رەسپۋبليكاسى پرەزيدەنتى كەزەكتەن تىس سايلاۋىنىڭ كۇنتىزبەلىك جوسپارى جاسالعانى ايتىلدى. وعان سايكەس اككرەديتاتسيادان ءوتۋ داۋىس بەرۋگە بەس كۇن قالعاندا, ياعني 2019 جىلدىڭ 4 ماۋسىمىندا جەرگىلىكتى ۋاقىت بويىنشا 18.00 ساعاتتا اياقتالادى.
كەڭەيتىلگەن وتىرىس قورىتىندىسى بويىنشا وسك مۇشەلەرى جۋرناليستەرمەن ءباسپاسوز ءماسليحاتىن وتكىزىپ, باق وكىلدەرىنىڭ سۇراقتارىنا جاۋاپ بەردى.
