1999 جىلدان باستاۋ العان, وبلىس كولەمىندە داستۇرگە اينالعان وبلىستىق «بوزتورعاي» كونكۋرسى بيىل 21 مارتە ۇيىمداستىرىلىپ جاتىر.
وسى ۋاقىت ارالىعىندا سىر ەلىنەن شىققان كوپتەگەن جەكە ورىنداۋشىلار مەن بي توپتارى بايقاۋ لاۋرەاتتارى اتانىپ, كوپشىلىگى الەمدىك ساحنالاردا ونەر كورسەتىپ, سىر ەلىنىڭ داڭقىن الەمگە پاش ەتۋدە.
بيىلعى وبلىستىق بايقاۋعا ءان, حورەوگرافيا, اسپاپتا ويناۋ, حالىقتىق ورىنداۋ جانە كوركەمسوز وقۋ جانرلارى بويىنشا 500-گە تارتا ونەرپاز قاتىسىپ, ونەرلەرىن ورتاعا سالادى. وبلىستىڭ بارلىق اۋداندارى مەن قىزىلوردا, بايقوڭىر قالالارىنان بايقاۋدىڭ ىرىكتەۋ كەزەڭىنە 1000-عا تارتا تالاپكەرلەر قاتىستى.
بايقاۋدىڭ بيىلعى ەرەكشەلىگى اسپاپتىق انسامبلدەر مەن جەكە اسپاپتا ورىنداۋشىلار بولەك-بولەك ماراپاتتالادى.
بايقاۋعا كاسىبي مامانداردان قۇرالعان ونەر يەلەرى قازىلىق ەتەتىن بولادى.
