ءسوز باسىندا ماۋلەن اشىمباەۆ كەزەكتەن تىس پرەزيدەنتتىك سايلاۋ وتكىزۋ تۋرالى شەشىمنىڭ وتە ورىندى ءارى ۋاقتىلى قابىلدانعانىن اتاپ ءوتتى. سونداي-اق ول پرەزيدەنتتىڭ بۇل جاۋاپتى شەشىم بويىنشا ەلباسىمەن اقىلداسقانىنا, پارلامەنتتەگى قوس پالاتا سپيكەرىمەن, پرەمەر-مينيسترمەن كەڭەسكەنىنە, كونستيتۋتسيالىق كەڭەستىڭ كەلىسىمىنە جۇگىنگەنىنە جانە پارلامەنتتەگى پارتيا جەتەكشىلەرىمەن كەزدەسكەنىنە نازار اۋدارىپ, Nur Otan پارتياسىنىڭ اتالعان تاريحي شەشىمدى قولدايتىنىن جەتكىزدى.
– بۇل بيلىكتىڭ تۇراقتىلىعى مەن ەلدىڭ بىرلىگىن نىعايتۋ ءۇشىن قابىلدانعان ۋاقتىلى ءارى وتە ورىندى شەشىم. Nur Otan پارتياسى سايلاۋ ناۋقانىنا تاس-ءتۇيىن دايىن. ول ءۇشىن ءبىز ءوزىمىزدىڭ ۇيىمداستىرۋشىلىق, كادرلىق, ساياسي جانە اقپاراتتىق الەۋەتىمىزدى پايدالانىپ, زاڭ اياسىندا جۇمىس ىستەيمىز. سايلاۋ ەلىمىزدەگى تۇراقتىلىق پەن بىرلىكتىڭ ودان ءارى كۇشەيۋىنە وڭ اسەرىن تيگىزىپ, حالىقتى ەلباسىنىڭ ساياساتى اياسىندا جاڭا ماقساتتارعا جەتەلەيدى دەپ سەنەمىز, – دەدى م.اشىمباەۆ.
سونىمەن قاتار ول سايلاۋعا Nur Otan پارتياسىنىڭ بەلسەندى تۇردە قاتىساتىنىن جەتكىزدى.
– ەلىمىزدەگى جەتەكشى ساياسي پارتيا رەتىندە Nur Otan پرەزيدەنتتىك سايلاۋعا بەلسەندى تۇردە قاتىسادى. پارتيا ءتوراعاسىنىڭ تاپسىرماسىنا سايكەس پارتيامىز سايلاۋعا قاتىسۋ ءۇشىن ءوز كانديداتىن ۇسىنادى. سوعان بايلانىستى نۇرسۇلتان ءابىش ۇلى نازارباەۆ 2019 جىلدىڭ 23 ساۋىرىندە پارتيانىڭ كەزەكتەن تىس XIX سەزىن شاقىرۋ تۋرالى قاۋلىعا قول قويدى. سول سەزدە Nur Otan اتىنان سايلاۋعا قاتىساتىن كانديداتتىڭ ەسىمى بەلگىلى بولادى, – دەدى م.اشىمباەۆ.
Nur Otanda وتكەن جينالىستا ەلباسى – پارتيا توراعاسى نۇرسۇلتان نازارباەۆ «باقىتتى وتباسى», «قۇتتى مەكەن», «اۋىل – ەل بەسىگى» جانە «حالىققا كومەك» جوبالارىن ءتيىمدى جۇزەگە اسىرۋ ماسەلەلەرىنە ارنايى توقتالعان ەدى.
اتاپ ايتقاندا, «حالىققا كومەك» جوباسى حالىقتىڭ پروبلەمالارىنا جان-جاقتى ءارى جەدەل نازار اۋدارۋ كەرەك دەگەندى بىلدىرەدى. پارتيانىڭ قوعامدىق قابىلداۋ بولمەلەرى بازاسىندا 234 الەۋمەتتىك تەرەزە قۇرىلسا, ولارعا قازاقستان رەسپۋبليكاسىنىڭ كەز كەلگەن ازاماتى ءوزىنىڭ باسىندا بار ماسەلەلەرىمەن بارىپ كومەك سۇراۋىنا بولادى. ال جوبانى جۇزەگە اسىرۋ ءۇشىن ءموبيلدى توپتار قۇرىلعان. ولارعا جەرگىلىكتى اتقارۋشى ورگاندار مەن ۇكىمەتتىك ەمەس ۇيىمداردىڭ وكىلدەرى كىرەدى. ازاماتتاردىڭ بارلىق ءوتىنىش-تىلەكتەرى ءبىرى قالماي «وسى جەردە جانە قازىر» قاعيداتى بويىنشا قاراستىرىلادى.
«اۋىل – ەل بەسىگى» جوباسى اۋىلداعى الەۋمەتتىك ينفراقۇرىلىمداردى دامىتۋعا, ماماندارمەن قامتاماسىز ەتۋگە جانە اۋىلدى جەرلەردە جاستاردىڭ كاسىپكەرلىگىن ورىستەتۋگە باعىتتالعان.
ال «قۇتتى مەكەن» جوباسىنىڭ ماقساتى ينجەنەرلىك جانە الەۋمەتتىك ينفراقۇرىلىمداردى دامىتۋ ۇدەرىستەرىنە پارتيالىق باقىلاۋ جۇرگىزۋ بولىپ تابىلادى. ولاردى جۇزەگە اسىرۋ ءۇشىن باقىلاۋدىڭ ءۇش دەڭگەيلى جۇيەسى قۇرىلعان. اۋداندىق دەڭگەيدە مونيتورينگ جۇرگىزەتىن توپتار باقىلاۋدى تىكەلەي ينفراقۇرىلىمداردىڭ نىساندارىندا قامتاماسىز ەتەدى. ال اۋماقتىق دەڭگەيدە قارجىنىڭ ماقساتتى جۇمسالۋىن باقىلاپ, اعىمداعى جاعدايعا تالداۋ جۇرگىزەدى جانە شەكتەۋلى سيپاتتاعى ۇسىنىمدامالار جاسايدى. ورتالىق دەڭگەيدە مەملەكەتتىك ورگاندار مەن پارتيا قۇرىلىمدارىنىڭ جوبانى جۇزەگە اسىرۋ بارىسىنداعى ەسەپتەرى تىڭدالاتىن بولادى.
جيىن سوڭىندا م.اشىمباەۆ پارتيانىڭ ورتالىق اپپاراتى مەن بارلىق دەڭگەيدەگى فيليالدارىنا جانە باستاۋىش پارتيا ۇيىمدارىنا الداعى سايلاۋ ناۋقانىنا قاتىستى بىرقاتار ناقتى تاپسىرما بەردى.
ەلباسى انىقتاپ بەرگەن اتالعان ءتورت جوبانىڭ باستى ماقساتى – ازاماتتاردىڭ ءال-اۋقاتىن ارتتىرىپ, الەۋمەتتىك جاعدايىن جاقسارتۋ. سوندىقتان قاشاندا حالىقتىڭ مۇددەسىن ءبىرىنشى كەزەككە قوياتىن Nur Otan ءۇشىن بۇل باسىمدىقتار پارتيا جۇمىسىنىڭ نەگىزگى باعىتى بولىپ سانالادى.
