- وڭىرىمىزگە ينۆەستيتسيا تارتۋ – ءبىزدىڭ جۇمىسىمىزدىڭ باسىم باعىتى بولىپ تابىلادى. وبلىسىمىز ءۇشىن بارلىق ينۆەستيتسيالىق جوبا ماڭىزدى. ولار «قاراپايىم زاتتار ەكونوميكاسىنىڭ» دامۋىنا باعىتتالادى. مەملەكەت باسشىسى قاسىم-جومارت توقاەۆ اتاپ وتكەندەي, يندۋستريالاندىرۋ مەن ينۆەستيتسيالار – ەكونوميكانىڭ نەگىزگى قوزعاۋشى كۇشى. سونداي-اق پرەزيدەنت مەملەكەتتىك ورگاندار مەن بيزنەس قاۋىمداستىعىنىڭ ساباقتاسا جۇمىس جاساۋى قاجەتتىلىگىنە ەرەكشە ەكپىن قويدى. ءبىز سىزدەر ءۇشىن جۇمىس جاساۋدامىز, - دەدى وبلىس اكىمى وڭىردە ءتۇرلى جوبالاردى جۇزەگە اسىرۋشى ينۆەستورلارعا قاراتا.
ايتا كەتەيىك, قازىرگى تاڭدا باتىس قازاقستان وبلىسىندا بورداقىلاۋ الاڭدارى قۇرىلىسى بويىنشا جالپى قۇنى 6 ملرد. تەڭگە بولاتىن 4 جوبا, جىلىجاي كەشەنى قۇرىلىسى بويىنشا 17,5 ملرد تەڭگەنى قۇرايتىن 2 جوبا, 20 ملرد تەڭگەلىك تۇرعىن ۇيلەر قۇرىلىسى جوباسى, 4 ملرد تەڭگەگە باعالانعان ءسۇت ونىمدەرىن وندىرەتىن كەشەن, 4 ملرد تەڭگە تۇراتىن ترانسفورماتورلارعا ارنالعان رادياتورلار ءوندىرۋ جوباسى, كىرپىش زاۋىتى جانە ت.ب. ينۆەستيتسيالىق جوبالار جۇزەگە اسىرىلۋدا. «KAZAKH INVEST» اق ۇك باسقارما توراعاسىنىڭ كەڭەسشىسى مارات ەسەنوۆ جيىنعا قاتىسۋشىلاردى اتالعان جوبالاردى قولدايتىنىنا سەندىرىپ, ۇلتتىق كومپانيا تاراپىنان بارلىق كومەك بەرىلەتىنىن ايتتى. كەزدەسۋگە سونداي-اق «اتامەكەن» ۇكپ, «دامۋ», «كاسىپكەرلىكتى قولداۋ قورى», ت.ب. وكىلدەرى دە قاتىسىپ, وڭىردەگى جوبالاردى قارجىلاي قولداۋ جولدارىن ورتاعا سالدى.
التاي كولگىنوۆتىڭ ايتۋىنشا, «قاراپايىم ەكونوميكا زاتتارى باعدارلاماسىنىڭ ورىندالۋى جانە ينۆەستيتسيالىق كليماتتى جاقسارتۋ ماسەلەسى ءاردايىم كۇن تارتىبىنەن تۇسپەيدى».
كەلەشەكتە ىسكە قوسىلىپ, ءوڭىر ەكونوميكاسىن كوتەرەدى دەپ جوسپارلانعان كەيبىر ءىرى جوبالارعا توقتالا كەتەيىك: «ەت يندۋسترياسى» («مياسنايا يندۋستريا») جشس قولعا العان بورداقىلاۋ الاڭىندا ءبىر مەزگىلدە 5 مىڭ باس مال سەمىرتىلمەك. جوبا قۇنى – 2,5 ملرد تەڭگە. ال «Ringo-Milk» جشس 4 ملرد تەڭگەگە جىلىنا 7 مىڭ توننا ءونىم شىعاراتىن ءسۇت كەشەنىن سالىپ جاتىر. «ورال جىلىجاي كومبيناتى» («ۋرالسكي تەپليچنىي كومبينات») جشس 7 ملرد تەڭگەگە جىلىجاي كەشەنى قۇرىلىسىن باستاعان. ال بايتەرەك اۋدانىندا قيار مەن قىزاناق وسىرەتىن جىلىجاي كەشەنىن «World Green Company» جشس قولعا الىپتى. بۇل جوبانىڭ قۇنى – 14 ملرد تەڭگە. سونداي-اق «K7 GROUP» كومپانياسى تۇرعىزاتىن تۇرعىن ۇيلەر كەشەنى 20 ملرد تەڭگەگە باعالانىپ وتىر. تەرەكتى اۋدانىندا 3 مىڭ باس ءىرى قارا بورداقىلايتىن الاڭدى «سىرىم KZ» شارۋا قوجالىعى سالماق. بۇعان دا 1 ملرد تەڭگە كولەمىندە ينۆەستيتسيا كەرەك. ال بۇگىنگە دەيىن ەلىمىزدە عانا ەمەس, شەتەلدەرگە تانىمال بولعان ورال ترانسفورماتور زاۋىتى جاڭادان ىسكە قوسقالى وتىرعان رادياتور زاۋىتى دا وڭىرگە 4 ملرد تەڭگە ينۆەستيتسيا تارتىپتى. بۇل جوبالارعا جەكە توقتالىپ, الەۋمەتتىك جەلىدەگى جەكە پاراعىنا جاريالاعان باتىس قازاقستان وبلىسىنىڭ اكىمى التاي كولگىنوۆ جەرگىلىكتى بيلىك تاراپىنان وڭىردە ينۆەستورلارعا بارلىق جاعداي جاسالاتىنىن ايتىپ وتىر.
