ساياسات • 04 ءساۋىر، 2019

ب.ءايتىموۆا: الەۋمەتتىك سالانى قوسىمشا قارجىلاندىرۋ – مۇقتاج ادامدارعا، وتباسىلارعا ناقتى كومەك

780 رەت كورسەتىلدى

سەنات وتىرىسىندا دەپۋتات بىرعانىم ءايتىموۆا «2019-2021 جىلدارعا ارنالعان رەسپۋبليكالىق بيۋدجەت تۋرالى» زاڭعا وزگەرىستەر مەن تولىقتىرۋلار تۋرالى ءسوز الدى. بۇل تۋرالى سەناتتىڭ ءباسپاسوز قىزمەتى حابارلايدى.

«قارالىپ وتىرعان زاڭ جوباسى الەۋمەتتىك سالاعا، قاۋىپسىزدىك پەن ينفراقۇرىلىمعا ءمان بەرە وتىرىپ، بيۋدجەت شىعىستارىنىڭ باسىمدىقتارىن قايتا قاراۋ ارقىلى حالىقتىڭ ءومىر ءسۇرۋ ساپاسىن ارتتىرۋعا باعىتتالعان اسا ماڭىزدى قۇجات» دەيدى سەنات دەپۋتاتى.  

زاڭ جوباسىنا سايكەس، 2019 جىلعا ارنالعان رەسپۋبليكالىق بيۋدجەت شىعىستارىن ناقتىلاۋ كەزىندە ەلباسىنىڭ «الەۋمەتتىك قامقورلىق» جاڭا الەۋمەتتىك قولداۋ شارالارى شەڭبەرىندە كەلەسى قادامدار قاراستىرىلعان:

ءبىرىنشى: - ازاماتتاردىڭ جەكەلەگەن ساناتتارىنا الەۋمەتتىك قولداۋدى كۇشەيتۋ، وعان-224 ملرد. تەڭگە كوزدەلگەن:

- بۇل جەردە اتاۋلى الەۋمەتتىك كومەك تاعايىنداۋ مەحانيزمى وزگەرەدى، بيىلعى جىلدىڭ 1 ساۋىرىنەن باستاپ الۋشىلار سانى ءبىر جارىم ەسەگە ارتىپ، ادامعا 20 789 تەڭگە بەرىلەدى;

- 18 جاسقا دەيىنگى مۇگەدەك بالالاردى تاربيەلەپ وتىرعان اتا-انالارعا، قامقورشىلارعا جاردەماقى، سونداي-اق بالا جاسىنان ءبىرىنشى توپتاعى مۇگەدەككە كۇتىم جاساۋ جونىندەگى جاردەماقى مولشەرى 10 395 تەڭگەگە ۇلعايادى;

ەكىنشى: - از قامتىلعان كوپ بالالى وتباسىلاردى تۇرعىن ۇيمەن قامتاماسىز ەتۋ، وعان 100 ملرد.تەڭگە بولىنەدى.

بۇگىنگى بيۋدجەتتەن باستاپ، ەندى جىل سايىن ساتىپ الۋ قۇقىعىنسىز جالدامالى تۇرعىن ءۇي نەگىزىندە از قامتىلعان كوپبالالى وتباسىلار ءۇشىن 6 مىڭ پاتەر بولىنەدى دەپ ۇلكەن سەنىممەن ايتۋعا بولادى، ال جالپى 2025 جىلعا دەيىن 42 مىڭ پاتەر بەرىلەدى، وسى شارالارعا 350 ملرد.تەڭگە جۇمسالادى.

سونىمەن قاتار، «تۇرعىن ءۇي قۇرىلىس جيناق بانكى» ارقىلى الەۋمەتتىك نەسيەلىك تۇرعىن ءۇي بەرۋ كەزىندە باسىمدىقتى، ءبىزدىڭ ويىمىز بويىنشا، از قامتىلعان كوپ بالالى وتباسىلار يەلەنۋى قاجەت.

ءۇشىنشى: «جاستار جىلىن» وتكىزۋ اياسىندا 24،6 ملرد.تەڭگە، سونداي-اق 180 كوللەدجدى جاڭعىرتۋىنا بايلانىستى «جاس مامان» باعدارلاماسىن ىسكە اسىرۋعا 8 ملرد. تەڭگە بولىنەدى.

جالپى، ناقتىلانعان بيۋدجەت جوباسىنا سايكەس 2019 جىلعا الەۋمەتتىك سالاعا ارنالعان شىعىستار 323،7 ملرد. تەڭگەگە ۇلعايىپ، 5 155،1 ملرد. تەڭگەنى قۇرايدى، ونىڭ ىشىندە:

- الەۋمەتتىك قامتاماسىز ەتۋ جانە الەۋمەتتىك كومەككە 179،8 ملرد. تەڭگە; دەنساۋلىق ساقتاۋعا 74،2 ملرد.تەڭگە; ءبىلىم بەرۋگە 12،5 ملرد. تەڭگە; مادەنيەت جانە سپورتقا 15،1 ملرد. تەڭگە قاراستىرىلعان.

بيۋدجەت سالاسىنىڭ جالاقىسى تومەن جۇمىسكەرلەرىنىڭ جانە اتقارۋشى ورگانداردىڭ ساناتتارى تومەن مەملەكەتتىك قىزمەتشىلەرىنىڭ جالاقىسىن 30% - عا دەيىن ارتتىرۋ مەرزىمىن 2019 جىلدىڭ 1 شىلدەسىنەن 1 ماۋسىمىنا اۋىستىرۋ بولىگىندە پرەزيدەنتتىڭ تاپسىرماسىنا سايكەس كوزدەلگەن 169،7 ملرد. تەڭگەگە قوسىمشا 37 ملرد. تەڭگە ءبولۋ قاجەت بولىپ وتىر. وسىعان بايلانىستى، ءبىز باس كوميتەتتىڭ كەستەدەگى ۇسىنىسىن قولدايمىز.

سونىمەن قاتار، مەنىڭ ويىمشا، بيۋدجەتتى قالىپتاستىرۋ كەزىندە كەلەسى ماڭىزدى جاعدايلار ەسكەرىلمەگەن

بىرىنشىدەن - ەلىمىزدىڭ وڭىرلەرى بويىنشا ءاربىر ازاماتتىڭ ءومىر ءسۇرۋ ساپاسىنىڭ ناقتى عىلىمي نەگىزدەلگەن مەملەكەتتىك ستاندارتتارىنىڭ بولماۋى.

بۇل ستاندارتتاردا وڭىردەگى مەكتەپتەر سانى، مەكتەپكە دەيىنگى ءبىلىم بەرۋ ۇيىمدارىنىڭ سانى، ەڭ تومەنگى كۇنكورىس دەڭگەيى، تۇتىنۋ كورزيناسى جانە ت. ب. ماسەلەلەر ەسكەرىلۋى ءتيىس.

مۇنداي ستاندارتتاردى پايدالانۋ - بيۋدجەتتى قالىپتاستىرۋ پروتسەسىنە وڭ اسەر ەتەتىنى ءسوزسىز.

رەسپۋبليكالىق بيۋدجەتتەن قوسىمشا شىعىندارعا قول جەتكىزۋ ءۇشىن بارىنشا مۇمكىن جانە مۇمكىن ەمەس قۇرالدارمەن ءوڭىر باسشىلارىن قاراجاتتى سۇراۋدان بوساتۋعا سەپتىگىن تيگىزەر ەدى. قازاقستاندىقتاردىڭ ءال-اۋقاتىن ودان ءارى جاقسارتۋعا باعىتتالعان ورتالىق ورگاندار مەن وڭىرلەردىڭ بىرلەسكەن جۇمىسىنا كومەكتەسەر ەدى.

ەكىنشىدەن - يپوتەكالىق قارىزدار بويىنشا باستاپقى جارنانى جابۋ ءۇشىن تۇرعىن ءۇي سەرتيفيكاتتارىن بەرۋ كەزىندە جەرگىلىكتى اتقارۋشى ورگاندار قانداي مەحانيزمدى قولداناتىندىعىن ناقتى ءارى سەنىمدى بىلگىمىز كەلەدى.

ۇشىنشىدەن - قابىلداناتىن بيۋدجەت تۇپكىلىكتى ناتيجەگە ناقتى باعدارلانۋى ءتيىس. بيۋدجەت شىعىستارىنىڭ ەكونوميكالىق تيىمدىلىگىن ايقىن ءبىلۋىمىز كەرەك.

تۇتاستاي العاندا مەن «2019-2021 جىلدارعا ارنالعان رەسپۋبليكالىق بيۋدجەت تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تولىعىمەن قولداي وتىرىپ، الەۋمەتتىك سالانى قوسىمشا قارجىلاندىرۋ حالىقتىڭ ءال-اۋقاتىنىڭ وسۋىنە اسەر ەتەدى جانە ومىرلىك قيىن جاعدايلارداعى مۇقتاج ادامدارعا، وتباسىلارعا ناقتى كومەك كورسەتەدى دەپ ەسەپتەيمىن» دەيدى ب.ءايتىموۆا.


سوڭعى جاڭالىقتار

ۇقساس جاڭالىقتار