ەڭبەك جانە حالىقتى الەۋمەتتىك قورعاۋ مينيسترلىگى ءوزىنىڭ www.enbek.gov.kz رەسمي سايتىندا ورنالاستىرىلعان اتاۋلى الەۋمەتتىك كومەك كولەمىن ەسەپتەۋگە ارنالعان ونلاين-كالكۋلياتوردى ىسكە قوستى.
ااك مولشەرىن ەسەپتەۋ ءۇشىن تۇرعىلىقتى ءوڭىرىن, وتباسى مۇشەلەرىنىڭ سانىن, جيىنتىق تابىسىن: ەڭبەكاقىنى, اليمەنتتى, جەكە قوسالقى شارۋاشىلىقتان, كاسىپكەرلىك قىزمەتتەن, جىلجىمايتىن م ۇلىك پەن كولىك قۇرالدارىن جالعا بەرۋ مەن ساتۋدان تۇسكەن تابىستاردى, كرەديتتەن (ميكروكرەديتتەن) تۇسكەن تابىستاردى, سونداي-اق باسقا دا تابىس تۇرلەرىن كورسەتۋ قاجەت.
سونىمەن بىرگە, ااك مولشەرىن ەسەپتەۋ كەزىندە 18 جاسقا دەيىنگى بالالاردىڭ, سونداي-اق جوعارى جانە كاسىپتىك وقۋ ورىندارىندا كۇندىزگى نىساندا وقيتىن 23 جاسقا دەيىنگى ستۋدەنتتەردىڭ سانى ەنگىزىلەدى.
اتاۋلى الەۋمەتتىك كومەك - از قامتىلعان جانە تابىسى تومەن ازاماتتار مەن وتباسىلارعا, سونىڭ ىشىندە كوپبالالى وتباسىلارعا بەرىلەتىن اقشالاي تولەم.
ەستەرىڭىزگە سالا كەتەيىك, ەلباسىنىڭ تاپسىرماسىنا سايكەس, قازاقستاندا 2019 جىلدىڭ 1 ساۋىرىنەن باستاپ ااك كورسەتۋ مولشەرى كۇنكورىس دەڭگەيىنىڭ 50% - نان 70% - عا دەيىن كوتەرىلىپ, 20 789 تەڭگەنى قۇرادى. ناتيجەسىندە جاردەماقى الۋشىلار سانى 571,6 مىڭ ادامنان 830 مىڭ ادامعا دەيىن وسەدى. بۇل رەتتە, بۇرىن ااك-ءتىڭ ورتاشا مولشەرى وتباسىنىڭ ءاربىر مۇشەسىنە 4 834 تەڭگەنى قۇراعان بولسا, كەلەسى ايدان باستاپ, ءار بالاعا 20 789 تەڭگە بولادى.
بۇدان باسقا, اتاۋلى الەۋمەتتىك كومەك تاعايىنداۋ ماسەلەلەرى بويىنشا كەڭەستەردى بىرىڭعاي بايلانىس-ورتالىعىنىڭ «111» ءنومىرى ارقىلى الۋعا بولادى.
