اتىراۋ حالىقارالىق اۋەجايىندا پوليتسيا قىزمەتكەرى ابايسىزدا ايەل ادامدى اياعىنان جاراقاتتاپ الدى. وتكەن جۇما كۇنى اۋەجايدىڭ جولاۋشىلار تەرمينالىندا بولعان وسى وقيعاعا بايلانىستى تەرگەۋ شارالارى اياقتالدى.
كەزەكشىلىكتە تۇرعان پوليتسيا قىزمەتكەرى م.م. قارۋ ساقتالاتىن بولمەدە ءىىم تاپانشاسىنان بايقاۋسىزدا وق اتقان. بانكتەردىڭ ءبىرىنىڭ ينكاسساتسيا قىزمەتىنىڭ قارۋىن تەكسەرۋ كەزىندە قارۋدان شىققان وق اۋەجاي زالىندا وتىرعان 38 جاستاعى ايەلدىڭ اياعىنا ءتيدى. زارداپ شەككەن ايەل اۋرۋحاناعا جەتكىزىلدى, جاعدايى قاناعاتتانارلىق.
ال جۇمىس بارىسىندا قارۋدى ابايسىز قولدانعان پوليتسيا سەرجانتى مەن اۋەجايداعى جەلىلىك پوليتسيا ءبولىمىنىڭ جەتەكشىسى, كولىكتەگى پوليتسيا ءبولىمى باسشىسىنىڭ ەكى ورىنباسارى لاۋازىمدارىنان بوساتىلدى.
قر ءىىم كولىكتەگى پوليتسيا دەپارتامەنتى باسشىسىنىڭ ورىنباسارى مارات الكەنوۆتىڭ ايتۋىنشا, زارداپ شەگۋشى ايەل قارۋدىڭ كەزدەيسوق اتىلىپ كەتكەنىن ءتۇسىنىپ, نارازىلىق بىلدىرمەگەن. قازىر وبلىستىق اۋرۋحانىنىڭ اقىلى پالاتاسىندا ەم الىپ جاتىر. ونىڭ ەمىنە قاجەت شىعىننىڭ ءبارىن كولىكتەگى پوليتسيا دەپارتامەنتى موينىنا العان.
«اتىراۋداعى وقيعادان كەيىن ەلىمىزدەگى بارلىق اۋەجايلار مەن تەمىرجول ۆوكزالدارىنداعى ارنايى بولمەلەر تەكسەرىلىپ, تالاپقا سايكەستەندىرىلەدى», - دەدى مينيسترلىك وكىلى.
اتىراۋ
