پرەمەر-ءمينيستردىڭ ورىنباسارى گۇلشارا ابدىقالىقوۆا, قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ تۇرعىنداردى جۇمىس ساپارىنىڭ ماقساتىمەن تانىستىرا كەلە, ەلىمىزدە الەۋمەتتىك سالاداعى وزگەرىستەرگە قىسقاشا توقتالىپ ءوتتى.
كەزدەسۋ بارىسىندا اۋىل تۇرعىندارى ۇكىمەت وكىلدەرىنە وزدەرىنىڭ مۇقتاجدىقتارىن, ءوتىنىشتەرىن جەتكىزدى. ءبىرى اۋىلدا ءدارىحانانىڭ جوقتىعىن ايتسا, ەندى ءبىرى مەملەكەتتەن الەۋمەتتىك كومەك الۋعا قولۇشىن بەرۋدى ءوتىندى.
اۋىل تۇرعىنى قۋانار ماعازدىڭ موڭعوليادان كوشىپ كەلگەنىنە سەگىز جىل بولعان. الايدا كوپ بالالى انا ەلىمىزدىڭ ازاماتتىعىن بىلتىر عانا العان. وتباسىنىڭ ءۇيى جوق, مەملەكەتتەن تولىققاندى الەۋمەتتىك كومەك الا الماي كەلەدى. قۋانار ماعازبەن قاتار, اۋىلداعى تاعى 7 كوپ بالالى انا 1 ساۋىردەن باستاپ الەۋمەتتىك كومەك الادى دەپ سەندىردى اۋداندىق جۇمىسپەن قامتۋ ءبولىمىنىڭ ماماندارى. ءبۇگىنگى تاڭدا كەنەسارى اۋىلىندا 16 كوپ بالالى وتباسى تۇرادى.
ال سارسەنباي كوكەي ۇلى اقساقال قۇقىقتىق كومەك كورسەتۋدى سۇرادى. بىلتىر ونىڭ ۇلىن بىرەۋلەر جولدا كولىكپەن قاعىپ كەتكەن ەكەن. الايدا كىنالىلەر ءالى كۇنگە دەيىن جازاعا تارتىلماعان.
ۇكىمەت وكىلدەرى ششۋچە پەداگوگيكالىق كوللەدجىندە ءوڭىرىمىزدىڭ بەلسەندى جاستارىمەن دە كەزدەسۋ وتكىزدى. جاس ورەندەرمەن جاستار جىلى, جاستارعا كورسەتىلەتىن قولداۋ جايلى ءاڭگىمە ءوربىتتى.
بۋراباي اۋداندىق جۇمىسپەن قامتۋ ورتالىعىندا, حالىققا قىزمەت كورسەتۋ ورتالىعىندا بولعاندا گۇلشارا ناۋشاقىزى ورتالىق ماماندارىنا كوپ بالالى انالارعا الەۋمەتتىك كومەك تاعايىنداۋدا ولاردىڭ تۇرمىس جاعدايلارىن ءجىتى نازارعا الۋدى, جەرى مەن مالدارىن ەسەپتەگەن كەزدە ولاردىڭ ءونىمدى, ءونىمدى ەمەستىگىنە ءمان بەرۋدى تاپسىردى. ءبىرجان سال اۋدانىنىڭ ماكينكا ورتا مەكتەبىندە تۇرعىندارمەن كەزدەسۋ كەزىندە دە از قامتىلعان وتباسىلارعا كومەك كورسەتۋ ءماسەلەسىنە قاتىستى بىرقاتار ساۋالدار قويىلدى.
ساپار اياسىندا جۇمىس توبىنىڭ مۇشەلەرى ماكينكا اۋىلىندا تۇراتىن كوپ بالالى جالعىزباستى اكە اندرەي مەركەلدىڭ شاڭىراعىندا بولىپ, جاعدايىن سۇرادى. 52 جاستاعى اندرەي مەركەلدىڭ ءۇش بالاسى مەكتەپكە, كەنجەسى بالاباقشاعا بارادى ەكەن. اۋدان اكىمى جومارت نۇركەنوۆ بۇل وتباسى 1 ساۋىردەن باستاپ الەۋمەتتىك ءجاردەماقى الاتىنىن, وتاعاسىنا تۇراقتى جۇمىس تاۋىپ بەرەتىنىن جەتكىزدى.
بۇلاندى اۋدانىنا قاراستى التىندى اۋىلىندا دا وسىنداي كەزدەسۋ ءوتتى. اۋىل تۇرعىنى ايگۇل ماۋلەن التى بالاسى بولا تۇرا, الەۋمەتتىك جاردەماقىدان قاعىلىپ قالايىن دەپ تۇرعان كورىنەدى. سەبەبى وسىدان ەكى جىل بۇرىن وعان «باستاۋ-بيزنەس» باعدارلاماسى ارقىلى مال شارۋاشىلىعىمەن اينالىسۋعا مەملەكەتتەن نەسيە بەرىلگەن ەكەن. الايدا تاپقان تابىسىنىڭ بارلىعى نەسيەنى جابۋعا كەتەدى دەپ ءۋاج ايتقان كوپ بالالى انانىڭ ماسەلەسىن ەڭبەك جانە حالىقتى الەۋمەتتىك قورعاۋ مينيسترى بەردىبەك ساپارباەۆ قايتا قاراۋ قاجەتتىگىن ايتتى.
جۇمىس ساپارىنىڭ سوڭىندا گۇلشارا ابدىقالىقوۆا اقكول اۋدانىندا بولىپ, ءبىلىم ءجانە عىلىم ءمينيسترى كۇلاش ءشامشيدينوۆامەن بىرگە مۇعالىمدەردىڭ قاتىسۋىمەن جيىن وتكىزدى.
– ەلباسىمىز نۇرسۇلتان نازارباەۆ Nur Otan پارتياسىنىڭ ءحVىىى سەزىندە ۇكىمەتكە 1 ءشىلدەدەن باستاپ بيۋدجەت سالاسىنداعى ەڭ از جالاقىنى 30 پايىزعا ءوسىرۋدى, مۇگەدەك بالا اسىراپ وتىرعان اتا-انالار مەن وتباسىلارعا, اسىراۋشىلارعا بەرىلەتىن جاردەماقىنى 30 پايىزعا ارتتىرۋدى, الەۋمەتتىك از قامتىلعان وتباسىلارعا 40 مىڭ پاتەر سالۋدى تاپسىرعان بولاتىن. ساپار بارىسىندا ءبىز وسى ماسەلەلەردىڭ بارلىعىن تۇرعىندارعا تۇسىندىردىك. بارلىعىنا زاڭ اياسىندا كومەكتەسەتىن بولامىز, – دەدى پرەمەر-ءمينيستردىڭ ورىنباسارى.
وسى ورايدا ءسوز العان ءبىلىم جانە عىلىم ءمينيسترى كۇلاش ءشامشيدينوۆا قازاقستان رەسپۋبليكاسىندا ءبىلىم بەرۋدى جانە عىلىمدى دامىتۋدىڭ 2016-2019 جىلعا ارنالعان باعدارلامانىڭ بيىل اياقتالاتىنىن, ەندىگى ارادا ءبىلىم سالاسىندا جاڭا مەملەكەتتىك باعدارلاما ازىرلەۋ ءمىندەتى تۇرعانىن جەتكىزدى.
– ءۇش تىلدە ءبىلىم بەرۋ دەگەن كەزدە كوبىسى پاندەر تەك اعىلشىن تىلىندە عانا وتەدى دەپ ويلايدى. بۇل جاڭساق پىكىر. ءۇش ءتىلدىلىكتى ەنگىزۋ ارقىلى ءبىز ءوز انا ءتىلىمىزدى دە دامىتامىز, – دەي كەلە مينيستر ۇستازداردىڭ مارتەبەسىنە ارنالعان جاڭا زاڭ جوباسى جونىنە دە توقتالىپ ءوتتى. ءمينيستردىڭ ايتۋىنشا, جاڭا زاڭ جوباسى ولاردىڭ قۇقىقتارىن كەڭەيتۋدى كوزدەيدى. كەزدەسۋ بارىسىندا ۇستازدار قاۋىمى ءبىلىم سالاسىنا, وتىز جىلدىق ەڭبەك ءوتىلى بار ۇستازداردى زەينەتكەرلىككە ەرتە شىعارۋ تۋرالى ساۋالدارىن قويدى.
پرەمەر-ءمينيستردىڭ ورىنباسارى گۇلشارا ابدىقالىقوۆانىڭ ءوڭىرىمىزگە ساپارى كەزىندە اقمولا وبلىسىنىڭ اكىمى ەرمەك مارجىقپاەۆ بىرگە بولدى.
