سايلاۋعا تۇركيانىڭ سايلاۋ بەرۋگە قۇقىلى 57 ملن 93 مىڭ ازاماتتىڭ, 83,70 پايىزى داۋىس بەرگەن. بۇل دەگەنىڭىز 47 ملن 784 مىڭنان استام ادام. سايلاۋدىڭ الدىن الا قورىتىندىلارىنا قاراعاندا بيلىك باسىنداعى ادىلەت جانە دامۋ پارتياسى مەن ۇلتشىل-حالىقتىق پارتيانىڭ بىرلەسكەن «حالىقتىق اليانسى» ەلدەگى داۋىس بەرۋشىلەردىڭ 51,6 پايىزدان استام داۋىسىن العانى بەلگىلى بولدى. دەگەنمەن, داۋىس ساناۋدىڭ تولىق اياقتالامعانىن ەسكەرسەك, بۇل دەرەك وزگەرۋى مۇمكىن.
جالپى, تۇركياداعى جەرگىلىكتى سايلاۋدا 30 قالا, 51 پروۆينتسيا مۋنيتسيپاليتەتى, 922 اۋدان, 32 مىڭ 105 ماحاللا, 18 مىڭ 306 اۋىلدىڭ اكىمدەرى مەن جەرگىلىكتى كەڭەستەردىڭ, اقساقالدار كەڭەسىنىڭ مۇشەلەرى سايلاندى. سايلاۋ بارىسىندا «حالىقتىق اليانسقا» قارسى رەسپۋبليكاشىل-حالىقتىق پارتيا مەن IYI Parti دەپ اتالاتىن پارتيانىڭ بىرىككەن «ۇلتتىق اليانس» كواليتسياسى ارەكەت جاسادى. سايلاۋعا قاتىسقان 12 پارتيانىڭ ىشىندە العاشقى تورتتىكتەن كەيىن حالىقتاردىڭ دەموكراتيالىق پارتياسى مول داۋىس جيناعان. كەيبىر ايماقتاردا تۇركيا كوممۋنيستىك پارتياسىنىڭ ۇمىتكەرلەرى دە ءبىرشاما داۋىس الدى. ودان بولەك سايلاۋعا 630 ازامات وزدەرىن-وزدەرى ۇمىتكەر رەتىندە ۇسىنعان. ناتيجەسىندە, ءتۇرلى ەلدىمەكەندەردە سان قىرلى قايراتكەرلەر بيلىككە كەلدى.
تۇركياداعى جەرگىلىكتى سايلاۋداعى ەڭ ۇلكەن تارتىس ىستامبۋل قالاسىندا بايقالدى. سايلاۋعا «حالىقتىق اليانستىڭ» ۇمىتكەرى, بۇرىڭعى پرەمەر-مينيستر, تۇركيا ۇلى ۇلتتىق ءماجىلىسىنىڭ ەكس-سپيكەرى بينالى يىلدىرىم مەن «ۇلتتىق اليانس» اتىنان قاتىسقان ەكرەم يماموعلۋ اراسىنداعى تارتىس جوعارى دەڭگەيدە بولدى. ءتۇننىڭ ءبىر ۋاعىنا دەيىن تۇركيانىڭ ورتالىق سايلاۋ كوميسسياسى قوس ۇمىتكەردىڭ جيناعان داۋىستارىن 48,7 پايىز دەپ كورسەتتى. بىردەي داۋىس جيناعانى ايتىلدى. الايدا, وپپوزيتسيا وكىلدەرى دە, بيلىك پارتياسىنىڭ ۇمىتكەرى دە ءوز ەسەپ-قيسابىنىڭ وزگەشە ەكەندىگىن العا تارتتى. قازىر رەسپۋبليكاشىلداردىڭ ۇمىتكەرى 0.05 پايىز ارتىق داۋىسپەن جەڭگەنى جايلى اقپارات تاراپ جاتىر. الايدا, تۇركيا ورتالىق سايلاۋ كوميتەتى ءالى ناقتى مالىمدەمە جاساعان جوق. ال, انكارا قالاسىندا وپپوزيتسيا ۇمىتكەرى مانسۇر ياۆاش 3,83 پايىز ارتىق داۋىسپەن جەڭىسكە جەتتى. يزمير قالاسى بۇرىننان رەسپۋبليكاشىلداردىڭ بەيرەسمي «قامالى» سانالاتىن. ناتيجە وزگەرگەن جوق. يزميرلىكتەردىڭ 58,02 پايىزى رەسپۋبليكاشىلداردى جاقتادى. ءسويتىپ, تۇركيانىڭ باتىس بولىگى, دالىرەك ايتقاندا انتاليا, ادانا, يزمير ءتارىزدى ايماقتارى, جەرورتا تەڭىزىنىڭ جاعالاۋىنداعى اۋداندار «ۇلتتىق اليانستى» جاقتادى. ال, انادولىنىڭ ىشكى ايماقتارى بيلىك باسىنداعى پارتيا قۇرعان اليانستى قولداعان. سونىمەن قاتار, حالىقتاردىڭ دەموكراتيالىق پارتياسى دا 7 اۋدانىندا جەڭىسكە جەتتى. كىركلارەلى اۋدانىندا تاۋەلسىز ۇمىتكەر وزگەلەردەن وزىق بولسا, تۋنجەلىدە تۇركيا كوممۋنيستىك پارتياسىنىڭ وكىلى تۇرعىنداردىڭ كوڭىلىنەن شىققان. گازياپتەپ, ايدىن, ۆان مەن سيرت قالالارىن باسقارۋعا ايەلدەر سايلانعان. ەلدە 1 ميلليون 395 مىڭنان استام بيۋللەتەن جارامسىز دەپ تانىلىپتى. بۇل دەگەنىز بەرىلگەن داۋىستاردىڭ 3,2 پايىزىن قۇرايدى. داۋىس بەرۋ كەزىندە ءتۇرلى وقىس وقيعالار تىركەلدى. سايلاۋ زاڭدىلىقتارىن بۇزۋ, توبەلەسۋ, ءتىپتى اتىس-شابىس تا تىركەلدى. بىرنەشە ازامات قازا تاپتى. بىراق, بۇل وقيعالارعا قاراماستان, سايلاۋ سالىستىرمالى تۇردە تىنىش ءوتتى.
دەگەنمەن, وسى جولى سايلاۋ تۇركيا حالقىنىڭ بيلىككە قاتاڭ تالاپ قويا باستاعانىن كورسەتتى. ياعني, ەلدەگى ەكونوميكالىق احۋالدى جەدەل تۇردە تۇزەتپەگەن جاعدايدا كەلەسى سايلاۋدا ادىلەت جانە دامۋ پارتياسىن بۇقارانىڭ قولداماۋى مۇمكىن ەكەندىگىن بايقاتتى. 16 جىلدان استام بيلىكتە بولعان پارتيانىڭ الەۋمەتتىك-ەكونوميكالىق جانە ىشكى-سىرتقى ساياساتىنا تۇركيالىقتاردىڭ بىرقاتارىنىڭ كوڭىلدەرى تولمايتىنى اڭعارىلدى. اسىرەسە, ءىرى ءوندىرىس ورىندارى مەن وقىعان-توقىعان ازاماتتارى مول, الەۋمەتتىك جاعداي وزگە وڭىرلەرگە قاراعاندا سالىستىرمالى تۇردە جاقسى سانالاتىن, تۋريزم ورتالىقتارىنا اينالعان جەرورتا تەڭىزىنىڭ جاعالاۋىنداعى ايماقتار وپپوزيتسيانى جاقتادى. انكارا, ىستامبۋل مەن ءيزميردى, تاعى بىرقاتار قالالاردى باسقارۋعا وپپوزيتسيالىق كۇشتەردىڭ وكىلدەرى كەلىپ وتىر. مۇنىڭ ءوزى ەلدەگى حالىقتىڭ ساياسي بەلسەندىلىگىن اڭعارتادى. سونىمەن قاتار, سايلاۋدان كەيىن بارلىق ساياسي كۇشتەر ەلدەگى ەكونوميكالىق ماسەلەلەرگە ايىرىقشا كوڭىل بولۋگە بەكىنگەندىگىن مالىمدەگەن بولاتىن. ياعني, سايلاۋعا قاتىسۋشى تاراپتار وزدەرىنىڭ ساياسي-ەكونوميكالىق باعدارلامالارىن جۇزەگە اسىرۋعا تىرىسادى. ويتكەنى, ەلدە بۇدان كەيىن سايلاۋ تەك 4 جىلدان سوڭ وتەدى. بۇل پارتيالاردىڭ كۇشەيۋىنە دە, ەكونوميكالىق رەفورمالاردىڭ جۇيەلى جۇرگىزىلۋىنە مۇمكىندىك بەرەتىن ۋاقىت.
