باقىت سۇلتانوۆ اۋدان اكىمدەرى مەن قالالىق باسقارمالار مەن دەپارتامەنتتەردىڭ باسشىلارىنا تۇرعىندارمەن تىعىز بايلانىس ورناتۋ ءۇشىن الەۋمەتتىك جەلىلەردەگى جۇمىستى جانداندىرۋدى تاپسىردى.
«قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا بارلىق اۋدان اكىمدەرى مەن باسقارما باسشىلارى قالا تۇرعىندارىمەن تۇراقتى بايلانىستا بولۋعا ءتيىس. كونتەنتتىڭ مازمۇنىنا ەرەكشە نازار اۋدارۋ قاجەت. سونداي-اق, بەلگىلى ءبىر الەۋمەتتىك جەلىگە عانا قوسىلۋدىڭ قاجەتى جوق. اۋديتوريانى ناقتى ءبىلۋ ءارى سەزىنۋ كەرەك. مىسالى, مەنىڭ بىلۋىمشە, وقۋشىلار مەن ستۋدەنتتەر «ۆكونتاكتە» جەلىسىن پايدالانادى. سوندىقتان ءبىلىم باسقارماسىنىڭ قىزمەتكەرلەرى تەك «فەيسبۋكتە» عانا ەمەس, «ۆكونتاكتە» جەلىسىندە بولۋى كەرەك. «تۆيتتەردى» ينۆەستيتسيالاردى تارتۋ, برەندتىڭ اتىن شىعارۋ ءۇشىن پايدالانۋعا بولادى. سوندىقتان بۇل تاپسىرمانى ورىنداۋعا جۇيەلى تۇردە كىرىسۋ كەرەك», – دەپ اتاپ ءوتتى باقىت سۇلتانوۆ.
ەستەرىڭىزگە سالا كەتەيىك, 27 ناۋرىزدا قازاقستان پرەزيدەنتى قاسىم-جومارت توقاەۆ اكىمدەرگە حالىقتىڭ ساۋالدارىنا جەدەل جاۋاپ بەرۋدى تاپسىردى.
«اكىمدەر حالىقتىڭ سۇرانىستارىنا جەدەل دەن قويىپ, ءتۇسىندىرۋ جۇمىستارىن جۇرگىزۋ قاجەت. الەۋمەتتىك جەلىلەردە بەلسەندى جۇمىس ىستەۋ ماڭىزدى: مەسسەندجەرلەردە توپتار قۇرىپ, جۇرگىزىلىپ جاتقان ساياساتتى ءتۇسىندىرىپ, جاعدايدى جەتىلدىرۋ كەرەك», – دەدى ق.توقاەۆ وبلىس, نۇر-سۇلتان, الماتى جانە شىمكەنت قالالارىنىڭ اكىمدەرىمەن وتكەن كەڭەستە.
