يتاليا ەكونوميكالىق دامۋ ءمينيسترىنىڭ ورىنباسارى اندرەا چيوففيمەن وتكەن كەلىسسوزدەر شەڭبەرىندە تاراپتار ساۋدا-ەكونوميكالىق جانە ينۆەستيتسيالىق سالالارداعى ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلادى. كەزدەسۋ بارىسىندا ر. ۆاسيلەنكو ديپلوماتيالىق قاتىناستار ورناتىلعان ساتتەن باستاپ 27 جىل ىشىندە قازاقستان مەن يتاليا ەكىجاقتى ىنتىماقتاستىقتى دامىتۋدا اسەرلى تابىستارعا قول جەتكىزگەنىن اتاپ ءوتتى. يتاليا ەلىمىزدىڭ ەكىنشى ساۋدا سەرىكتەسى, ناتيجەسىندە تاۋار اينالىمى 13 ملرد اقش دوللارىن, 2006 جىلدان بەرى تىكەلەي يتالياندىق ينۆەستيتسيالاردىڭ كولەمى 6 ملرد اقش قۇرايدى. كەزدەسۋ بارىسىندا قازاقستاننىڭ كولىكتىك-لوگيستيكالىق الەۋەتىنە جانە جىبەك جولىنىڭ جاڭا تۇجىرىمداماسىن ىسكە اسىرۋداعى ەلىمىزدىڭ نەگىزگى رولىنە ەرەكشە نازار اۋدارىلدى. تاراپتار ىسكە كىرىسكەن بىرىككەن قازاقستان-يتالياندىق كاسىپورىنداردى قولداۋ (قازىرگى ۋاقىتتا قر-دا يتاليانىڭ قاتىسۋىمەن 164 بىرىككەن كاسىپورىن جۇمىس ىستەيدى), سونداي-اق تسيفرلىق تەحنولوگيالار, ينفراسترۋكتۋرالىق دامۋ جانە اگروكاسىپتىك كەشەن سالاسىنداعى جاڭا بىرلەسكەن جوبالاردى ازىرلەۋ ارقىلى ىنتىمقاستىقتى نىعايتۋعا ۇمتىلىسىن اتاپ ءوتتى.
يتاليا سىرتقى ىستەر جانە حالىقارالىق ىنتىماقتاستىق مينيسترلىگىنىڭ رەسەي فەدەراتسياسى, شىعىس ەۋروپا, كاۆكاز جانە ورتالىق ازيامەن ىنتىماقتاستىق دەپارتامەنتىنىڭ ديرەكتورى ف. دي ميكەلەمەن اڭگىمەلەسۋ بارىسىندا ديپلوماتتار اعىمداعى جىلى ىنتىماقتاستىقتى نىعايتۋ جوسپارلارىن, ونىڭ ىشىندە كەلە جاتقان ەكونوميكالىق ىنتىماقتاستىق بويىنشا ۇكىمەتارالىق جۇمىس توبىنىڭ 9-شى وتىرىسىن جانە جوعارى دەڭگەيدەگى ساپارلارمەن الماسۋدى تالقىلادى. يتاليالىق ارىپتەس قازاقستاننىڭ سىرتقى ساياسي ۆەدومستۆوسىنىڭ ەكونوميكالىق ۇدەرىسىنىڭ كۇشەيتۋ جۇمىستارىنىڭ باستالعانى جونىندە حاباردار بولدى. تاراپتار ەكىجاقتى ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرىن تالقىلادى.
سىرتقى ساياسي ۆەدومستۆو باسشىسىنىڭ ورىنباسارى ر. ۆاسيلەنكو ساپارىنىڭ ەكىنشى كۇنى يتاليا پارلامەنتى دەپۋتاتتار پالاتاسىنىڭ ۆيتسە-پرەزيدەنتى ەتتورە روزاتومەن جانە دەپۋتاتتار پالاتاسىنىڭ كۆەستورى (جاۋاپتى حاتشى), قازاقستان-يتاليا دوستىق توبىنىڭ توراعاسى ەدموندو چيرەلليمەن كەزدەستى. ەكىجاقتى جانە كوپجاقتى سيپاتتاعى وزەكتى ماسەلەلەر بويىنشا تىڭعىلىقتى پىكىرلەر الماسىلدى. اتاپ ايتقاندا, تاراپتار پارلامەنتارالىق بايلانىستاردى, سونىڭ ىشىندە ىنتىماقتاستىق توپتارىنىڭ بەلسەندى ءوزارا ءىس-قيمىلى جانە زاڭنامالىق قىزمەتتەگى تاجىريبە الماسۋى ارقىلى دامىتۋدىڭ ماڭىزدىلىعىن اتاپ ءوتتى. وسى تۇرعىدا, ءمينيستردىڭ ورىنباسارى يتاليان زاڭ شىعارۋشى ورگان باسشىلارىنىڭ ا.ج. 23-24 قىركۇيەكتە نۇر-سۇلتان قالاسىندا «ۇلكەن ەۋرازيا: ديالوگ. سەنىم. ارىپتەستىك» تاقىرىبىندا وتەتىن ەۋرازيا ەلدەرى پارلامەنتتەرى سپيكەرلەرىنىڭ 4-ءشى كەڭەسىنە قاتىسۋلارىنا ءۇمىتىن ءبىلدىردى.
ءوز كەزەگىندە, يتاليالىق زاڭ شىعارۋشىلار قازاقستان مەن يتاليا اراسىنداعى ەكىجاقتى قارىم-قاتىناستاردىڭ دامۋىنا جوعارى باعا بەرە وتىرىپ, پارلامەنتارالىق قاتىناستاردىڭ ارىپتەستىكتى دامىتۋداعى ماڭىزدى قۇرال بولىپ سانالاتىنىن اتاپ ءوتتى. سونىمەن بىرگە, ولار يتاليا تاراپىنىڭ جاقىن ارادا قازاقستان مەن ەۋرووداق جانە مۇشە-مەملەكەتتەر اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىمدى راتيفيكاتسيالاۋ نيەتىن ءبىلدىردى. كەزدەسۋدىڭ قورىتىندىسى بويىنشا بەلسەندى پارلامەنتارالىق بايلانىستاردى جالعاستىرۋ تۋرالى ۋاعدالاستىققا قول جەتكىزىلدى.
ءوز ساپارىن اياقتاي كەلە, ر.ۆاسيلەنكو حالىقارالىق ۇيىمدارداعى يتالياندىق قوعامىندا (SIOI) «ورتالىق ازيا جانە ايماقتىق تۇراقتىلىق: قازاقستاننىڭ ستراتەگيالىق ءرولى» تاقىرىبىمەن بولاشاق ديپلوماتتار الدىندا لەكتسيا وقىدى. ءمينيستردىڭ ورىنباسارى يتالياندىق ستۋدەنتتەردى نۇر-سۇلتاننىڭ ورتالىق ازيا مەملەكەتتەرىمەن ىنتىماقتاستىقتى نىعايتۋداعى دايەكتى باعىتىمەن تانىستىردى, سونىمەن قاتار ەلىمىزدىڭ ساياسي ومىرىندەگى جاڭا وزگەرىستەر اياسىندا وسى كۋرستىڭ جالعاسىپ كەلە جاتقانىن اتاپ ءوتتى.
ءىس-ساپاردىڭ قورىتىندىسى بويىنشا قازاقستاندىق ديپلومات بىرقاتار يتالياندىق باق وكىلدەرىنە سۇحبات بەردى, ونىڭ بارىسىندا ەكىجاقتى قازاقستان-يتاليا ىنتىماقتاستىعىنىڭ وزەكتى ماسەلەلەرىنە جاۋاپ بەرىپ, حالىقارالىق كۇن تارتىبىندەگى كوپتەگەن ماسەلەلەر بويىنشا قازاقستاننىڭ ۇستانىمىن اتاپ ءوتتى. شيرەك عاسىر ىشىندە ەلدەرىمىز اراسىنداعى جەمىستى ساياسي ديالوگ ورناتىلعانى, نىق شارتتىق-قۇقىقتىق بازا قۇرىلعانى, ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىق دامىعاندىعى اتاپ ءوتىلدى.
