اتاپ ايتار بولساق, يسپانيا كورولى فەليپە ءوزىنىڭ جەدەلحاتىندا قاسىم-جومارت توقاەۆقا شىنايى قۇتتىقتاۋىن جەتكىزىپ, يسپانيانىڭ قازاقستانمەن اراداعى جان-جاقتى ىنتىماقتاستىقتى نىعايتۋعا جانە ەكى جاقتى بايلانىستاردى تەرەڭدەتۋگە نيەتتى ەكەنىن ايتقان.
ساۋد ارابياسىنىڭ كورولى سالمان بەن ابدەل ءازيز ءال ساۋد قاسىم-جومارت توقاەۆتىڭ قازاقستان رەسپۋبليكاسىنىڭ پرەزيدەنتى لاۋازىمىنا كىرىسۋىمەن قۇتتىقتاپ, دوستاس قازاقستان حالقىنا باق-بەرەكە تىلەدى. سونداي-اق قازاقستاننىڭ ءوسىپ-وركەندەي بەرۋىنە نيەتتەستىك ءبىلدىردى.
تۇركيا رەسپۋبليكاسىنىڭ پرەزيدەنتى رەجەپ تايپ ەردوعان جەكە ءوزىنىڭ جانە بارشا تۇركيا حالقىنىڭ اتىنان قاسىم-جومارت توقاەۆتى قازاقستان رەسپۋبليكاسىنىڭ پرەزيدەنتى لاۋازىمىنا كىرىسۋىمەن قۇتتىقتادى.
«ءسىز پرەزيدەنتتىك مانداتىڭىزدىڭ كەزىندە دوستاس ءارى باۋىرلاس ەكى حالىق اراسىنداعى قول جەتكىزىلگەن تابىستى قارىم-قاتىناستار ساقتالىپ, ودان ءارى تەرەڭدەي تۇسەتىنىنە كامىل سەنەمىن», – دەپ اتاپ وتكەن رەجەپ تايپ ەردوعان.
اقش-تىڭ مەملەكەتتىك حاتشىسى مايكل پومپەو ءوزىنىڭ قۇتتىقتاۋ جەدەلحاتىندا قازاقستاننىڭ وسىنداي تاريحي ساتتە دامۋدىڭ كونستيتۋتسيالىق قاعيداتتارىن قاتاڭ ساقتايتىنىن تاعى دا دالەلدەگەنىن اتاپ وتكەن.
«امەريكا قۇراما شتاتتارى قازاقستانمەن سەرىكتەستىكتى نىعايتۋدى كوزدەيدى جانە ءاردايىم ەلدەرىڭىزدىڭ ەگەمەندىگىنىڭ, تاۋەلسىزدىگى مەن شەكارالىق تۇتاستىعىنىڭ ساقتالۋىن قولدايدى. قازاقستاننىڭ قاۋىپسىزدىگىن سىزبەن بىرلەسە قامتاماسىز ەتىپ, وركەندەتۋ ءۇشىن بەلسەندى جۇمىس اتقارۋدى اسىعا كۇتەمىز», – دەلىنگەن جەدەلحاتتا.
بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو ەكى ەلدىڭ جان-جاقتى تابىستى ىنتىماقتاستىعى الداعى ۋاقىتتا دا ستراتەگيالىق سەرىكتەستىك پەن سەنىم نەگىزىندە دامي بەرەتىنىنە سەنىم ءبىلدىردى.
«بەلورۋستە ءسىزدى قازاقستان حالقىنىڭ زور قۇرمەتىنە يە بولعان دانا مەملەكەت قايراتكەرى رەتىندە بىلەدى», – دەدى الەكساندر لۋكاشەنكو.
جاپونيا ۇكىمەتى مەن حالقىنىڭ اتىنان پرەمەر-مينيستر سيندزو ابە دە قۇتتىقتاۋ حاتىن جولدادى. ول ءوزىنىڭ حاتىندا قازاقستان مەن جاپونيا اراسىنداعى ءوزارا ىقپالداستىقتىڭ ماڭىزدىلىعىن ايتىپ, قازاقستان رەسپۋبليكاسىنىڭ وڭىرلىك جانە حالىقارالىق ماسەلەلەردەگى ستراتەگيالىق رولىنە توقتالعان.
«قازاقستانمەن بىرلەسىپ, 2004 جىلى ءسىز باستاماشىلىق ەتكەن «ورتالىق ازيا + جاپونيا» ديالوگى اياسىندا وڭىرلىك ىنتىماقتاستىقتى دامىتۋ جۇمىستارىن جالعاستىرۋعا نيەتتىمىز», – دەلىنگەن جەدەلحاتتا.
كورەيا رەسپۋبليكاسىنىڭ پرەزيدەنتى مۋن چجە ين ءوز قۇتتىقتاۋىندا قازاقستان كورەيانىڭ ورتالىق ازياداعى ەڭ ءىرى ساۋدا-ينۆەستيتسيالىق سەرىكتەسى ەكەنىنە توقتالىپ, قازاقستان رەسپۋبليكاسىمەن جان-جاقتى ىنتىماقتاستىق ورناتۋ بۇكىل ەۋرازيا اۋماعىنداعى ورنىقتى دامۋدىڭ نەگىزى سانالاتىنىن ايتقان.
سونىمەن قاتار, ءوزىنىڭ قۇتتىقتاۋىن فينليانديا رەسپۋبليكاسىنىڭ پرەزيدەنتى ساۋلي نينيستيو دە جولداعان.
«فينليانديا مەن قازاقستاندى تابىستى قارىم-قاتىناستار بايلانىستىرادى. مۇندا ساۋدا جانە ەكونوميكا سالاسىنداعى بەلسەندى سەرىكتەستىك ماڭىزدى ءرول اتقارىپ وتىر. ءبىز ەكى جاقتى جانە حالىقارالىق كۇن تارتىبىندەگى كەڭ اۋقىمدى ماسەلەلەر بويىنشا ىنتىماقتاستىقتى ودان ءارى نىعايتا تۇسۋگە ءازىرمىز», – دەلىنگەن جەدەلحاتتا.
موڭعوليا پرەزيدەنتى حالتمااگين باتتۋلگا ءوزىنىڭ قۇتتىقتاۋ حاتىندا قازاقستان مەن موڭعوليانىڭ ءوزارا ىقپالداستىعىنىڭ دەڭگەيى جوعارى ەكەنىن اتاپ ءوتىپ, حالىقتارىمىز اراسىنداعى دوستىق بايلانىستاردى ودان ءارى كەڭەيتۋگە جانە دامىتۋعا نيەتتى ەكەنىن جەتكىزگەن.
اۋعانستان يسلام رەسپۋبليكاسىنىڭ پرەزيدەنتى مۇحاممەد اشراف عاني ءوزىنىڭ قۇتتىقتاۋىندا قازاقستان پرەزيدەنتىنە جۇكتەلگەن اسا جاۋاپتى ميسسيانىڭ ماڭىزدىلىعىن جانە ەكى جاقتى قارىم-قاتىناستى دامىتۋ ءۇشىن الەۋەتتىڭ زور ەكەنىن اتاپ وتكەن.
بىرىككەن اراب امىرلىكتەرىنىڭ پرەزيدەنتى حاليفا بەن زايد ءال ناحايان, ۆيتسە-پرەزيدەنت, بىرىككەن اراب امىرلىكتەرىنىڭ پرەمەر-ءمينيسترى, دۋبايدىڭ بيلەۋشىسى مۇحاممەد بەن راشيد ءال ماكتۋم, ساۋد ارابياسى كورولدىگى مينيسترلەر كەڭەسى توراعاسىنىڭ ورىنباسارى, قورعانىس ءمينيسترى, تاق مۇراگەرى مۇحاممەد بەن سالمان بەن ءابدۋلازيز ءال ساۋد, ابۋ دابيدىڭ تاق مۇراگەرى, بىرىككەن اراب امىرلىكتەرىنىڭ قارۋلى كۇشتەرى جوعارعى باس قولباسشىسىنىڭ ورىنباسارى مۇحاممەد بەن زايد ءال ناحايان وزدەرىنىڭ قۇتتىقتاۋ حاتتارىندا ەكىجاقتى قاتىناستاردىڭ ودان ءارى دامي تۇسەتىنىنە ءۇمىت ارتاتىنىن ايتىپ, قاسىم-جومارت توقاەۆتىڭ قىزمەتىنە تابىس جانە دوستاس قازاقستان حالقىنا باق-بەرەكە تىلەگەن.
اۋعانستان يسلام رەسپۋبليكاسىنىڭ اتقارۋشى بيلىگىنىڭ باسشىسى ابدۋللا ابدۋللا ءوزىنىڭ قۇتتىقتاۋ حاتىندا مەملەكەت باسشىسىنا جىلى لەبىزىن بىلدىرە وتىرىپ, اۋعانستان ۇكىمەتى ءوزارا ىنتىماقتاستىقتى قولدايتىنىن جانە ونى بارلىق سالادا نىعايتۋعا اتسالىساتىنىن ايتقان.
اۋعانستان يسلام رەسپۋبليكاسىنىڭ جوعارعى پالاتاسىنىڭ سپيكەرى فازەل حادي مۋسليميار ءوزىنىڭ جەدەلحاتىندا مەملەكەت باسشىسىنىڭ جاۋاپتى قىزمەتىنە تابىس تىلەپ, قازاقستان مەن اۋعانستان اراسىنداعى قاتىناستاردىڭ ودان ءارى نىعايا تۇسەتىنىنە سەنىم ءبىلدىردى.
مەملەكەت باسشىسىنىڭ اتىنا ءوزىنىڭ قۇتتىقتاۋ حاتىن ەۋرازيالىق ەكونوميكالىق كوميسسيا القاسىنىڭ توراعاسى تيگران ساركيسيان دا جولدادى.
«ءسىزدىڭ مەملەكەت پەن حالىققا قىزمەت ەتۋ ىسىندەگى جوعارى بىلىكتىلىگىڭىز, مول تاجىريبەڭىز, حالىقارالىق ارەناداعى بەدەلىڭىز, قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ بىلدىرگەن سەنىمى سىزگە قازاقستاننىڭ ەكونوميكاسى مەن مەملەكەتتىلىگىن ودان ءارى دامىتىپ, نىعايتۋ مىندەتىن جۇزەگە اسىرۋعا مۇمكىندىك بەرەدى. ءسىزدىڭ جوعارى لاۋازىمداعى قىزمەتىڭىز ەۋرازيالىق ەكونوميكالىق وداقتاعى ينتەگراتسيالىق ۇدەرىستەردىڭ ودان ءارى جان-جاقتى دامۋىنا سەپتىگىن تيگىزەدى, – دەلىنگەن جەدەلحاتتا.
ەكونوميكالىق ىنتىماقتاستىق جانە دامۋ ۇيىمىنىڭ باس حاتشىسى انحەل گۋرريا ءوزىنىڭ قۇتتىقتاۋ حاتىندا قازاقستان ءۇشىن دامۋدىڭ ماڭىزدى كەزەڭىندەگى پرەزيدەنت لاۋازىمىندا قاسىم-جومارت توقاەۆتىڭ تابىسقا جەتۋىنە تىلەكتەستىك بىلدىرگەن.
«وتكەن ون جىلدا ءسىزدىڭ ەلىڭىز تاڭ قالارلىق جەتىستىكتەرگە قول جەتكىزدى. ەكونوميكالىق ىنتىماقتاستىق جانە دامۋ ۇيىمى ەكونوميكالىق رەفورمالاردى ودان ءارى جۇزەگە اسىرىپ, الەۋمەتتىك دامۋعا قول جەتكىزۋدى جۇزەگە اسىرۋ ىسىندە قازاقستانعا قولداۋ كورسەتەتىنىن نىق سەنىممەن ايتقىم كەلەدى», – دەدى ا.گۋرريا.
