قوناقتار الدىندا ءسوز سويلەگەن قر ەلشىسى ەرلان ىدىرىسوۆ ناۋرىز مەرەكەسىنىڭ جاڭارۋ مەن جاڭا ءومىردىڭ سيمۆولى رەتىندەگى ەرەكشەلىگىن, سونداي-اق فەستيۆالدىڭ حالىقتار مەن مادەنيەتتەردىڭ بىرىگۋ تۇرعىسىنداعى ماڭىزدىلىعىن اتاپ ءوتتى. سونىمەن قاتار ول مۇنداي ءىس-شارالار قازاقستان-بريتان قارىم-قاتىناستارىن دامىتۋعا, سونداي-اق قازاق مادەنيەتىن ۇلىبريتانيادا تانىمال ەتۋگە قوماقتى ۇلەس قوساتىنىن اتاپ ءوتتى.
مەرەكە قوناقتارى ءۇشىن ۇيىمداستىرىلعان كونتسەرت اياسىندا اتىراۋدان لوندونعا ارنايى كەلگەن «مۇراگەر» فولكلورلىق ءانسامبلى ونەر كورسەتتى. انسامبل ۇلى دالانىڭ فولكلورلىق اۋەندەرىن – «قاراجورعا» حالىق كۇيىن, ء«اريداي» حالىق ءانىن, ق.جۇماعاليدىڭ «كوكتەم سازى», س.تۇرىسبەكتىڭ «اق جاۋىن» جانە ت.ب. تۋىندىلاردى ورىندادى.
كونتسەرتتە ۇلىبريتانيانىڭ جوعارى وقۋ ورىندارىندا ءبىلىم الىپ جاتقان قازاقستاندىق ستۋدەنتتەر دە ونەر كورسەتتى. «قوس ارنا» اتتى ەتنوفولكلورلىق دۋەتى ەرەكشە كوزگە ءتۇستى. دۋەت مۇشەلەرى – مۋلتيقۇرالشىلار ايدا مەن ازامات جاحانبەكوۆتەر قوبىز, جەتىگەن, دومبىرا, سىبىزعى جانە شاڭقوبىز ۇلتتىق اسپاپتاردا ويناپ, ا.قۇنانباەۆتىڭ «ايتتىم سالەم, قالامقاس», ن.تىلەنديەۆتىڭ «اققۋ» اتتى شىعارمالارىن, سونداي-اق «شاتتىق سازى» اتتى ءوزىنىڭ اۆتورلىق تۋىندىسىن ورىندادى. ايدا قازىرگى ۋاقىتتا شەففيلد ۋنيۆەرسيتەتىندە وقيدى, ال ونىڭ ءىنىسى ازامات – ك.ج.بايسەيىتوۆا اتىنداعى دارىندى بالالارعا ارنالعان رەسپۋبليكالىق مامانداندىرىلعان مۋزىكالىق ورتا مەكتەپ-ينتەرناتىنىڭ وقۋشىسى.
كونتسەرتتەن باسقا قوناقتار نازارىنا اتىراۋ وبلىسىنىڭ تاريحي-ولكەتانۋ مۇراجايى اكەلگەن تاريحي ەكسپوناتتار مەن قازاقستاندىق قولونەرشىلەردىڭ جۇمىستارى ۇسىنىلدى. مۋزەيدىڭ 50-گە جۋىق ەكسپوناتى – زەرگەرلىك بۇيىمدار, ۇلتتىق كيىم جانە تۇرمىستىق زاتتار – فەستيۆالدىڭ ناعىز كوركى بولدى. سونىمەن قاتار مەرەكەدە قازاقستاندىق ءسان ديزاينەرلەردىڭ جۇمىستارى ۇسىنىلدى. ال ستەندتەگى كىتاپ ونىمدەر قازاقستانعا, ونىڭ تاريحىنا, مادەنيەتىنە جانە تۋريستىك مۇمكىندىكتەرىنە ارنالدى.
فەستيۆالدىڭ باستى نازار اۋدارارلىق ورىندارىنىڭ ءبىرى ۇلتتىق تۇرمىس زاتتارى مەن ءداستۇرلى مۋزىكالىق اسپاپتارمەن بەزەندىرىلگەن قازاق كيىز ءۇيى بولدى. قوناقتار دالا قازاقتاردىڭ ۇيىنە قوناققا كەلىپ, كوشپەندىلەردىڭ اتى اڭىزعا اينالعان باسپاناسىندا سۋرەتكە تۇسۋگە مۇمكىندىككە يە بولدى.
ناۋرىز مەيرامىنىڭ شارىقتاۋ شەگى قازاقتىڭ «تۇساۋ كەسەر» سالتى بولدى. قازاق ءداستۇرى بويىنشا مۇنداي جاۋاپتى ءىس وتباسىنداعى ەڭ قۇرمەتتى ادامعا – سول ادامنىڭ قادامىن باسسىن دەپ تاپسىرىلادى. بالانىڭ اتا-اناسىنىڭ سۇراۋىمەن قر ەلشىسى ەرلان ىدىرىسوۆ قوناقتاردىڭ الدىندا ءبۇلدىرشىننىڭ تۇساۋىن كەسىپ, ونىمەن بىرگە توسەلگەن اق جول ۇستىمەن بىرنەشە سيمۆولدىق قادام جاسادى.
