27 جاستاعى ايگۇل – درامالىق كولوراتۋرالىق سوپرانو يەسى. ول تالدىقورعاندا دۇنيەگە كەلىپ, الماتىداعى ءجانيا اۋباكىروۆانىڭ مەكتەپ-كوللەدجىندە وقىدى. ۆەنا كونسەرۆاتورياسىن ءتامامدادى. شامشيدەنوۆا بالا كەزىنەن ءان ايتتى, ۇلاعاتتى ۇستاز, قازاق كسر ەڭبەگى سىڭگەن ءارتيسى, پروفەسسور, اتى اڭىزعا اينالعان ناديا ابدراحمانوۆا شاريپوۆادان ءتالىم الدى. تانىمال ەلەنا وبرازتسوۆانىڭ شاكىرتى. 2004 جىلى 13 جاسىندا ايگۇلدىڭ ەرەكشە داۋىسى گولليۆۋدتا 4 التىن مەدالمەن جانە ءان ورىنداۋشىلاردىڭ بۇكىلالەمدىك بايقاۋىنىڭ گران-پريىمەن ماراپاتتالدى. ال 15 جاسىندا سانكت-پەتەربورداعى ەلەنا وبرازتسوۆانىڭ حالىقارالىق بايقاۋىندا لاۋرەات اتاندى.
بۇگىندە ايگۇل ۆەناداعى Mahler فيلارمونياسىنىڭ جەتەكشى ءسوليسى ءارى ۆەنا كونسەرۆاتورياسىندا ماگيستر دارەجەسى بويىنشا ءبىلىم الىپ جاتىر. سونداي-اق قازاقستاندىق ءانشى ۆاشينگتونداعى قازاق-امەريكا قاۋىمداستىعىنىڭ مۇشەسى. شامشيدەنوۆا سانكت-پەتەربورداعى مارين تەاترىنىڭ جاس وپەرا انشىلەر اكادەمياسىندا ءارى ءبىلىم الىپ, ءارى ونەر كورسەتتى. ول اتى الەمگە ايگىلى ماەسترونىڭ جەتەكشىلىگىمەن ءان شىرقادى, ەلەنا وبرازتسوۆا, لاريسا گەرگيەۆا, ناتالي دەسسەي, لاريسا رۋداكوۆا سىندى تانىمال مۋزىكانت جانە وپەرا انشىلەرىمەن بىرگە جوعارى كاسىبي دەڭگەيدەگى شەبەرلىك سىنىپتارىنان ءوتتى.
شامشيدەنوۆانىڭ ۆەناداعى كونتسەرتىنە الەمنىڭ تۇكپىر-تۇكپىرىنەن ونىڭ ونەرىن جوعارى باعالايتىن, ءسۇيىپ تىڭداتىن, تالعامى بيىك كورەرمەندەر جينالادى. كوپتەگەن تانىمال ارتىستەر باسقا الەمدىك ساحنالارعا ءدال وسى اۆستريا بانكى سالونىنداعى باروككو زالىنان كەيىن عانا ونەر كورسەتە باستايدى. ء دال سول جەردە ورتاشا قۇنى 180 000 ەۋرودان اساتىن ەڭ قىمبات ءارى تاڭداۋلى Fazilio ءرويالى تۇر. بۇل اتاقتى ءرويالدى ەڭ دارىندى, كەمەڭگەر جاندارعا ارنالعان دەپ جاتادى. رەسەيدە بۇل اسپاپتى «گازپروم» كومپانياسى ساتىپ الىپ, مۋزىكا ۇيىنە سىيعا تارتقان.
«مەن ءۇشىن كلاسسيكالىق مۋزىكانىڭ الەمدىك استاناسى – ۆەنادا جەكە كوتسەرتىمدى وتكىزۋ – زور باقىت, بىرەگەي مۇمكىندىك, قايتالانباس ايرىقشا وقيعا,- دەيدى ايگۇل شامشيدەنوۆا. – بۇعان دەيىن تاپ وسى ءرويالدىڭ سۇيمەلدەۋىمەن ءبىر رەت ونەر كورسەتكەنمىن. بۇل – عاجاپ سەزىم! ال وسى جولى كونتسەرتىمنىڭ مەرەيلى مەيمانى – شۆەيتساريانىڭ وپەرا ءانشىسى ەليزابەت سيسي مالەرمەن بىرگە ءان ايتاتىنىما تولقىپ تا, ەرەكشە قۋانىپ تا وتىرمىن».
ەليزابەت سيسي مالەر «كارنەگي حولل», تسيۋريحتاعى Vienna Konzerthaus, زالتسبۋرگ, نيۋرنبەرگ, حيۋستون, نيۋ-يوركتاعى الەمدىك ساحنالاردا ونەر كورسەتەدى. ونىڭ كونتسەرتتەرى الەمدىك باستى تەلەارنالاردان كورسەتىلىپ, تانىمال راديولاردان تاراتىلادى. قازاقستان-شۆەيتساريا انشىلەرىنىڭ ادەمى ءارى اۋەزدى ۇيلەسىمى كاسىبي مامانداردىڭ ەرەكشە قىزىعۋشىلىعىن تۋعىزۋدا.
كونتسەرتتە الەمنىڭ وزىق تۋىندىلارى ورىندالادى: روسسيني, بەلليني, دونيتسەتتي, ۆەردي, شارپانتەنىڭ ۇزدىك شىعارمالارى بار. شامشيدەنوۆا اۆستريالىق جانە شۆەيتساريالىق وپەرا تەاترىنىڭ ديرەكتورلارىن دا قىزىقتىرا ءبىلدى, سەبەبى, مۇنداي رەپەرتۋارمەن ونەر كورسەتۋ الەمدە تەك بىرەگەيلەردىڭ قولىنان كەلەدى.
ايگۇل شامشيدەنوۆانىڭ ۆەناداعى كونتسەرتىنىڭ قۇنى – 60-80 ەۋرو. وسىدان كەيىن ءانشى 21 ساۋىردە «قازاقستاننىڭ 100 جاڭا ەسىمى» جوباسىنىڭ جەڭىمپازى, قازاقستاننىڭ جالعىز كونتر-تەنورى باتىرجان سماقوۆپەن بىرگە «Astana Opera»-دا كونتسەرت بەرەدى.
ايگۇل احانبايقىزى,
«Egemen Qazaqstan»
الماتى
