اكتسيانىڭ اشىلۋىندا ءسوز العان وبلىس اكىمى دانيال احمەتوۆ تاۋەلسىز قازاقستاننىڭ جەتكەن جەتىستىكتەرى تۇڭعىش پرەزيدەنت - ەلباسى ەسىمىمەن تىعىز بايلانىستى ەكەندىگىن ايتىپ: «ەلباسىنا قانداي قۇرمەت كورسەتسەك تە لايىق. ەلوردامىزدىڭ جاڭا اتاۋى – نۇر-سۇلتان – ەلدىڭ تىلەگى, حالىقتىڭ نيەتى. پرەزيدەنت قاسىم-جومارت توقاەۆتىڭ باس قالامىزدىڭ اتاۋىن نۇر-سۇلتان دەپ اۋىستىرۋ تۋرالى باستاماسى وبلىس حالقى تاراپىنان قىزۋ قولداۋ تاپتى. جەر-جەرلەردە تۇرعىندار وسى شەشىمدى جاقتاپ, قۇپتاپ, شىنايى پەيىلدەرىن بىلدىرۋدە», - دەدى.
اكتسياعا قاتىسقان وليمپيادا چەمپيونى, جەڭىل اتلەت ولگا رىپاكوۆا ەلوردانىڭ جاڭا اتاۋىن قولدايتىنىن, ەلباسىنىڭ سپورت سالاسىنا ءاردايىم ەرەكشە كوڭىل ءبولىپ وتىراتىنىن تىلگە تيەك ەتىپ, وليمپياداعا اتتانار الدىندا بارلىق سپورتشىلاردى جيناپ اق باتاسىن بەرگەن ءساتىن ەسكە الدى. «تۇڭعىش پرەزيدەنتتىڭ قابىلداۋىنا بارعاندا ەرەكشە تولقىدىم. بىراق كەزدەسۋدىڭ باسىندا-اق ول كىسى ءبارىمىزدى باۋراپ الدى, ەمەن-جارقىن اڭگىمە وربىتتىك, بۇرىننان تانىس ادامدارداي سويلەستى بىزبەن. سول كەزدەسۋدەن مەن ايرىقشا شابىتتانىپ شىقتىم, نۇرسۇلتان ءابىش ۇلى قولىمدى قىسىپ تۇرىپ, ماعان تولىق سەنەتىنىن ايتتى, زور تابىسقا جەتۋىمدى تىلەدى. سول كەزدە بويىما دارىعان كۇش-قۋات ماعان چەمپيون بولۋعا كومەكتەستى. ول ءساتتى ەشقاشان ۇمىتپايمىن. ەلوردا اتاۋىنىڭ نۇر-سۇلتان بولىپ اۋىسقانى – دۇرىس شەشىم. تولىق قۇپتايمىن» – دەدى ول.
سەمەيلىك اقىن, كومپوزيتور قۇسمىليا نۇرقاسىم استانانىڭ جاڭا اتاۋىن ەلباسىنىڭ ۇزاق جىلدار بويى ەلىنە سىڭىرگەن ولشەۋسىز ەڭبەگىنە حالقى تاراپىنان بەرىلگەن لايىقتى باعا, العىس رەتىندە قابىلدايتىنىن جەتكىزدى. اكتسيا جەرگىلىكتى كوركەمونەرپازدار ازىرلەگەن كونتسەرتپەن اياقتالدى.
وسى كۇنى شاھارداعى «قازتسينك» جانە ء«ۇمز» سەكىلدى ءىرى ءوندىرىس ورنىنىڭ ەڭبەككەرلەرى دە پاتريوتتىق اكتسياعا ءۇن قوستى. «قازتسينك» جۇمىسشىلارى استانا قالاسى اتاۋىنىڭ نۇر-سۇلتان بولىپ وزگەرتۋ جونىندەگى ماڭىزدى شەشىمدى ءبىراۋىزدان قولدايتىندارىن ايتتى. «تۇڭعىش پرەزيدەنت نۇرسۇلتان نازارباەۆ وسكەمەنگە كەلگەن ءار ساپارىندا كاسىپورنىمىزعا ات باسىن بۇرىپ, قاراپايىم ەڭبەك ادامدارىمەن تىلدەسىپ, قال-جاعدايلارىن ءبىلىپ تۇرۋدى داستۇرگە اينالدىرعان. ەلباسى پرەزيدەنتتىك وكىلەتتىگىن توقتاتسا دا, ساياساتتا قالا بەرمەك, ول ءاردايىم حالقىمەن, بىزبەن بىرگە», – دەدى كومپانيانىڭ باس ەكولوگى ۆاديم كۋشنارەۆ. «نۇرسۇلتان ءابىش ۇلى – بىزدەر ءۇشىن مەتاللۋرگ, قاراپايىم حالىقتان شىققان ەڭبەك ادامى بولىپ قالا بەرەدى», – دەپ تۇيىندەدى شارانى «قازتسينك» جشس اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ.
جيىن سوڭى شاعىن كونتسەرتكە ۇلاسىپ, جۇمىسكەرلەر الدىندا وڭىرىمىزگە تانىمال انشىلەر يۋليا يۋروچكينا, قايرات مايجاروۆ, اسقار التاەۆ, راۆحات باقىتحانوۆ جانە «لادۋشكي» ءانسامبلى ونەر كورسەتتى.
قالاداعى ءۇلبى مەتاللۋرگيالىق زاۋىتىنىڭ جۇمىسشىلارى دا پاتريوتتىق اكتسيادان قالىس قالماي, ءوز پىكىرلەرىن ءبىلدىردى. «نۇرسۇلتان نازارباەۆ – الەم تانىعان سارابدال ساياساتكەر. ونىڭ ەلى ءۇشىن جانە بۇكىل ادامزات ءۇشىن اتقارعان ەڭبەگى ەرەن», – دەدى ء«ۇمز» اق باسقارما توراعاسىنىڭ ءبىرىنشى ورىنباسارى سەرگەي بەجەتسكي. ءوندىرىس ورنىنداعى اكتسيا دا ءان شاشۋعا ۇلاستى. بۇل جەردە وڭىرىمىزگە تانىمال «ينكورو», «ىڭكار», «نون-ستوپ» توپتارى ءوز ونەرلەرىن پاش ەتتى. جيىنعا 1 مىڭنان استام زاۋىت جۇمىسشىسى قاتىستى.
ازامات قاسىم,
«Egemen Qazaqstan»
وسكەمەن
