ول ءوزىنىڭ پرەزيدەنتتىك وكىلەتتىلىگىن توقتاتۋ تۋرالى شەشىم قابىلداعانىن جاريالادى. نۇرسۇلتان ءابىش ۇلى, سونىمەن قاتار وسى جىلدار ىشىندە ەلىمىزدىڭ دامۋى, ونىڭ الەمدىك ارەناعا تانىلۋى ءۇشىن قولىنان كەلگەنىنىڭ ءبارىن جاساعانىن, سونىڭ ناتيجەسىندە مەمەلەكەتىمىز الەمدىك قاۋىمداستىققا تانىلىپ, ەكونوميكالىق, الەۋمەتتىك-ساياسي, قۇقىقتىق تۇرعىدان بەلگىلى دامۋ دەڭگەيىنە جەتكەندىگىن دە مالىمدەدى. سونداي-اق ءبىلىم بەرۋ, سپورت, مادەنيەت سالالارىندا ايتارلىقتاي جەتىستىككە جەتكەنى ەلىمىزدىڭ ەگەمەندىگىنىڭ, تاۋەلسىزدىگىنىڭ جەمىسى ەكەنىن, ەندەشە بولاشاقتا دا تاۋەلسىزدىك تۋىن بيىك ۇستاۋ قاجەتتىگىن ەسكەرتتى. ول ءوزىنىڭ قازاقستان حالقىن, قازاق ۇلتىن شىن نيەتپەن قۇرمەتتەيتىنىن, زور سۇيىسپەنشىلىكپەن قارايتىنىن ايتا كەلىپ, بارشا قازاقستاندىقتارعا العىسىن ءبىلدىردى.
بۇگىندە نۇرسۇلتان نازارباەۆ تۋرالى ەل ىشىندە, حالىقارالىق دەڭگەيدە ءارتۇرلى پىكىرلەر بىلدىرىلۋدە. الايدا ءبىر نارسە انىق, ول تەك رەسپۋبليكامىزعا, ىرگەلەس جاتقان مەملەكەتتەرگە عانا بەلگىلى ەمەس, الەمگە تانىمال تۇلعا. ەلىمىزدى باسقارعان 30 جىلداي ۋاقىت ىشىندە ءبىزدىڭ ايتارلىقتاي جەتىستىكتەرىمىز مەملەكەت باسشىسى رەتىندە ن.نازارباەۆتىڭ ەسىمىمەن تىكەلەي بايلانىستى. ويتكەنى پرەزيدەنتتىك باسقارۋداعى رەسپۋبليكا بولعاندىقتان بارلىق ەكونوميكالىق, ساياسي-الەۋمەتتىك ءماندى ىستەر پرەزيدەنتتىڭ شەشىمىمەن, ۇيعارىمىمەن جۇزەگە اسىرىلادى. پرەزيدەنت مەملەكەتىمىزدىڭ بارلىق سالالار بويىنشا ەڭ باستى جەتەكشى جانە جاۋاپتى تۇلعاسى. سول سەبەپتى دە قالىڭ جۇرتشىلىق ەلىمىزدەگى يگى ىستەردى دە, كەلەڭسىزدىكتەردى دە ونىڭ ەسىمىمەن بايلانىستىرىپ قارايدى, بۇل قيسىنسىز دا ەمەس. ەلىمىز بارلىق سالاداعى جەتىستىكتەرىنە تۇراقتىلىقتىڭ, تۇتاستىقتىڭ, اۋىزبىرشىلىكتىڭ, بىرەگەيلىكتىڭ, بىرلىكتىڭ ناتيجەسىندە قول جەتكىزدى. بۇل تۇرعىدان العاندا نۇرسۇلتان نازارباەۆتىڭ ەڭبەگى اسا زور ەكەنىن جوققا شىعارۋعا بولمايدى.
ن.نازارباەۆ قازاقستان حالقىنا, زيالى قاۋىمىنا سىيلاستىقپەن, ۇلكەن سەنىممەن قارايتىندىعىنا, بولاشاقتا پرەزيدەنتتىك ۇلكەن لاۋازىمعا كەلەتىن ادامنىڭ جەتىستىكتەرىمىزدى ءارى قاراي جالعاستىرۋعا قىزمەت ەتەتىنىنە سەنىم ءبىلدىردى. بيىلعى جىلدى جاستار جىلى دەپ جاريالاعان ول بولاشاق جاستاردىكى ەكەنىنە, الداعى ۋاقىتتا بيلىك باسىنا, الەۋمەتتىك-ەكونوميكالىق سالالاردىڭ تۇتقاسىن ۇستاۋعا سول جاستاردىڭ كەلەتىنىن ەسكەرە وتىرىپ, ولارعا زور تابىستار تىلەدى. ءوزىنىڭ الداعى ۋاقىتتا دا حالىقپەن بىرگە بولاتىنىن, قاۋىپسىزدىك كەڭەسىنىڭ جانە «نۇر وتان» پارتياسىنىڭ توراعاسى رەتىندە مەملەكەتىمىزدىڭ ساياسي ومىرىنەن تىس قالمايتىنىن مالىمدەدى. ويىمىزدى قورىتا ايتساق, نۇرسۇلتان نازارباەۆ بيلىگى تۇسىندا ەلىمىزدىڭ جەتكەن جەتىستىگىن ەشكىم جوققا شىعارا الماسى انىق. سونداي-اق ونىڭ وسى جىلدار ىشىندە الەمگە تانىمال تۇلعا بولعانى جانە قازاقستاننىڭ جاڭا تاريحىندا وزىندىك ورنى بار ەكەنى تالقىعا تۇسپەيتىنى اقيقات.
التاي تايجانوۆ,
فيلوسوفيا عىلىمدارىنىڭ دوكتورى, پروفەسسور, مارات وسپانوۆ اتىنداعى باتىس قازاقستان مەديتسينا ۋنيۆەرسيتەتىنىڭ «قوعامدىق-گۋمانيتارلىق پاندەر» كافەدراسىنىڭ مەڭگەرۋشىسى
