تۇركيا ەلىنىڭ پرەزيدەنتى رەدجەپ تايپ ەردوعاننىڭ ءبىزدىڭ ەلباسىنا قاراتا «نۇرسۇلتان نازارباەۆ – تۇرىك الەمىنىڭ ليدەرى» دەپ ايتقانى بار عوي. شىنىندا, ۇلتتىق داستۇردە تاربيەلەنگەن ۇلت كوشباسشىسى – حالقىنىڭ بار قادىر-قاسيەتىن بويىنا جيناعان, ءتىلىن, تاريحىن, مادەنيەتىن, ادەت-عۇرپىن, سالت-ءداستۇرىن جەتىك بىلەتىن, ۇلتىن جان-تانىمەن سۇيەتىن, ونىڭ مارتەبەسىن ءوسىرىپ حالقىنىڭ ءۇمىتىن, سەنىمىن اقتاپ كەلە جاتقان ۇلتجاندى ازامات.
«ەر مەرەيى – ەل مەرەيى» دەمەكشى, باسشىسىنىڭ مارتەبەسى بيىكتەگەن سايىن, ەلدىڭ ابىرويى دا اسقاقتاي بەرەدى. ەل ەرتەڭىن ويلاعان كەمەڭگەر ۇلت كوشباسشىسى: ء«بىز – الىس ساپارعا بەل بۋىپ, كەمەمىزدى تاۋەكەل دارياسىنا تۇسىرگەن ەلمىز, ەلەس ءۇمىتتى ەمەس, ەرلىك پەن ەلدىك مۇراتىن كەمەمىزدىڭ تۇعىرىنا تۋ ەتىپ بايلاعان ەلمىز», دەگەن بولاتىن.
بۇگىنگى قازاقستان – الەمنىڭ ىرگەلى مەملەكەتتەرىمەن قاتار حالىقارالىق ماسەلەلەردى شەشۋدە الدىڭعى ورىنداردا. بۇگىنگى قازاقستان – الەم تانىعان ەگەمەندى, دەموكراتيالىق جانە قۇقىقتىق مەملەكەت. بۇگىنگى قازاقستان – ورتالىق ازيانىڭ بارىسىنا اينالعان قۋاتتى ەكونوميكاسى, تۇراقتى ساياسي تۇعىرى بار زايىرلى مەملەكەت.
«دۇنيەدە تاۋەلسىز قازاق ەلى بار. الەمدە ەگەمەن قازاقستان بار. ونىڭ كوپۇلتتى, تاتۋ, ىنتىماقتى حالقى بار. قۋاتتى ەكونوميكاسى, سەنىمدى ساياسي جۇيەسى بار. ەڭ باستىسى – بۇگىننەن نۇرلى, بۇگىننەن جەمىستى بولاشاعى بار», دەگەن ەلباسىمىزدىڭ سوزدەرى ءاربىر قازاقستاندىقتىڭ كەۋدەسىنە قۋانىش پەن شاتتىق اكەلىپ, جارقىن بولاشاققا دەگەن سەنىمىن ۇيالاتادى!
عالياسقار سارىباەۆ,
«Nur Otan» پارتياسى الماتى وبلىستىق فيليالى توراعاسىنىڭ ءبىرىنشى ورىنباسارى
