استانا اتاۋى – نۇر-سۇلتان
قازاقستاندى 28 جىل باسقارعان مەملەكەت باسشىسى نۇرسۇلتان نازارباەۆ 19 ناۋرىزدا شەشىمىن جاريالادى. سونىڭ ارتىنشا, 20 ناۋرىزدا پارلامەنتتىڭ بىرلەسكەن وتىرىسىندا جاڭا پرەزيدەنت قاسىم-جومارت توقاەۆ انت بەردى. مۇنداي شەشىمنىڭ قازاقستاندى عانا ەمەس, ورتالىق ازيانى جانە تۇركيا تاراپىن دا تاڭعالدىرعانى راس.
قازاقستان جەر كولەمى بويىنشا الەمدە 9-ورىن الادى. 18 ميلليوننان استام حالقى بار. 1991 جىلى قازاقتار ەلدەگى حالىقتىڭ 45 پايىزىن قۇراسا, بۇگىندە 70 پايىزعا جەتتى. مۇناي, تابيعي گاز, ۋران سەكىلدى قازبا بايلىقتارعا يە.
2005-2018 جىلدار ارالىعىندا ەلگە 282 ميلليارد اقش دوللارى كولەمىندە شەتەل ينۆەستيتسياسى قۇيىلسا, ونىڭ 47 پايىزى ەۋروپالىق ەلدەرگە, ال 13 پايىزى اقش-قا تيەسىلى. باسقاشا ايتقاندا, قازاقستان شىعىس پەن باتىستىڭ ءوزارا ارەكەتتەسۋىنىڭ ماڭىزدى ورتالىعى بولىپ تابىلادى. 2010 جىلى ەقىۇ جانە 2011 جىلى يسلام ىنتىماقتاستىعى ۇيىمىنا توراعالىق ەتۋى بۇل تەڭگەرىمنىڭ كورىنىسىنە اينالدى.
1990 جىلداردىڭ اۋقىمدى تەحنولوگيالارى مەن مۇمكىندىكتەرىن ەسكەرە وتىرىپ, بۇگىنگى تاڭدا قازاقستان الەمدە بيزنەس جۇرگىزۋدىڭ قاراپايىمدىلىعى بويىنشا 190 ەل اراسىندا 28-ورىنعا كوتەرىلدى. مەملەكەتتىك ءتىل – قازاق ءتىلى, ال ورىس ءتىلى قاجەت جاعدايدا بىرگە قولدانىلادى. الايدا, نازارباەۆ 1940 جىلدان بەرى قولدانىستا بولعان كيريلليتسا الفاۆيتىنەن باس تارتىپ, لاتىن گرافيكاسىن قابىلداۋ تۋرالى شەشىم شىعاردى. 2025 جىلعا قاراي 32 ارىپتىك جاڭا الفاۆيت ەلدىڭ بارلىق ىشكى جۇيەلەرىندە ىسكە قوسىلادى.
ەلدەگى ترانسفورماتسيا مەن كورنەكى ماقساتتاردى بەلگىلەيتىن ەڭ ماڭىزدى جۇمىس – يەن دالاعا سالىنعان استانا قالاسى. نازارباەۆتىڭ وتستاۆكاعا كەتۋ تۋرالى شەشىمىنەن كەيىن قازاقستان پارلامەنتى استانا اتاۋىن نۇر-سۇلتان دەپ وزگەرتەتىن زاڭ جوباسىن ماقۇلدادى.
تۇركى الەمىنىڭ اقساقالى
ن.نازارباەۆ قازاقستان رەسپۋبليكاسى قاۋىپسىزدىك كەڭەسىنىڭ توراعاسى, «Nur Otan» پارتياسىنىڭ توراعاسى, قازاقستان حالقى اسسامبلەياسىنىڭ توراعاسى قىزمەتتەرىن جالعاستىرا بەرمەك. ول كەڭەس وكىمەتى قۇلاعاننان كەيىن ەل تىزگىنىن وسى ۋاقىتقا دەيىن ۇستاپ كەلگەن جالعىز باسشى بولاتىن.
قازاقستاننىڭ گەوگرافيالىق ەرەكشەلىگىن ۇتىمدى پايدالانىپ, كورەگەن شەشىمدەرىنىڭ ارقاسىندا تۇركى الەمىنىڭ اقساقالى اتاندى. ماسەلەن, تۇركيا-رەسەي قارىم-قاتىناستارىن رەتتەۋدە ۇلكەن ءرول اتقارىپ, 15 شىلدەدەگى وقيعادان كەيىن تۇركياعا كەلگەن العاشقى مەملەكەت باسشىسى بولدى. وندا تۇركى كەڭەسىن قۇرۋ تۋرالى ۇسىنىس جاسادى. وتكەن جىلى تۇركى الەمىنە قاتىستى جۇرگىزىلگەن ساۋالدامادا ن.نازارباەۆتىڭ ەسىمى تۇركىتىلدەس مەملەكەتتەر اراسىندا وتە تانىمال ەكەنى انىقتالعانى ەسىمىزدە.
نازارباەۆتىڭ مۇنداي شەشىم جاسايتىنىن بىرنەشە جىل بۇرىن سەزگەن ەدىم. ءوزىم قاتىسقان ءبىر جيىندا «نازارباەۆ دەنساۋلىعىن ءوز ەركىمەن ەلى ءۇشىن سارپ ەتكەن كوشباسشى رەتىندە تاريحقا ەنەدى», دەپ ايتقانىم بار-تۇعىن.
نازارباەۆ بۇگىنگى ارەكەتىن 2017 جىلدان باستاپ جوسپارلاعان بولاتىن. 2017 جىلى قابىلدانعان كونستيتۋتسيالىق تۇزەتۋلەرمەن ول پارلامەنتكە جانە ۇكىمەتكە 30-دان استام وكىلدىك بەردى. ەلدىڭ باسقارۋ جۇيەسىن وزگەرتكەن بۇل قادام قوعامدا جەتكىلىكتى تۇردە تالقىلانعان جوق. قازاقستان پرەزيدەنتتىك جۇيەدەن پرەزيدەنتتىك-پارلامەنتتىك جۇيەگە داڭعىل جول سالدى. سوندىقتان پارلامەنت پەن ۇكىمەتتىڭ قۇزىرەتى كەڭەيدى. بۇدان بولەك, نازارباەۆ سوڭعى ءۇش جىلدا ەلدەگى بيلىكتەگى ورتاشا جاس كولەمىن ازايتتى.
بۇل – جاستارعا مۇمكىندىك بەرەتىن جاڭا ءتاسىل.
كۋرشاد زورلۋ, پروفەسسور
تۇركيا
