24 ناۋرىز، 2019

كرەملدى تامساندىرعان ديماش

1071 رەتكورسەتىلدى

كۇمىس كومەي داۋسىمەن الەمگە تانىلعان ديماش قۇدايبەرگەن كرەملدە ەكى كۇن بويى ءان سالىپ، سارايعا جينالعانداردى تامساندىردى. 

حالىقتىڭ ىقىلاسىنا بولەنگەن ءانشىنىڭ كونتسەرتى وتكەن زالدا ينە شانشار ورىن بولعان جوق. ءىس-شاراعا الەمنىڭ 50-دەن استام ەلىنەن جانكۇيەرلەر كەلگەن ەكەن. ءتىپتى، بيلەت ساتىلىمعا تۇسكەن كۇنى-اق تۇگەسىلگەن كورىنەدى. 

كرەملگە جينالعان كورەرمەندەر اراسىندا ءانشىنىڭ اتا-اناسى، قازاقستاننىڭ رەسەيدەگى ەلشىسى يمانعالي تاسماعامبەتوۆ، قازاقستاننىڭ مادەنيەت جانە سپورت ءمينيسترى ارىستانبەك مۇحامەدي ۇلى، رەسەي پرەمەر-ءمينيسترىنىڭ جۇبايى سۆەتلانا مەدۆەدەۆا، ەسترادا جۇلدىزدارى جانە باسقا دا قۇرمەتتى قوناقتار بولعان. 

ايتا كەتەرلىگى، تانىمال ءانشى انيتا تسوي قازاقستاندىق ءانشىنىڭ ونەرىن تاماشالاۋ ءۇشىن ءوزىنىڭ جوسپارلاعان ساپارىنان باس تارتقان ەكەن. تسوي ءوزىنىڭ ينستاگرامداعى پاراقشاسىندا ديماشتى قۇتتىقتاپ، بىرەگەي داۋسىن كوزدىڭ قاراشىعىنداي ساقتاۋعا كەڭەس بەردى.

العاشقى كۇنگى كونتسەرت ءۇش ساعاتقا سوزىلدى. كورەرمەندەر ديماش ءار ءانىن ايتىپ بولعان سايىن قوشەمەتتەپ، قولداۋ ءبىلدىرىپ وتىرعان. اسىرەسە، «ديماشي» دەگەن داۋىستان قۇلاق تۇنادى. ديماش قاي تىلدە ءان شىرقاعانىنا قاراماستان، زالعا جينالعان كورەرمەندەر ونىمەن بىرگە قوسىلىپ وتىردى. 

«انا» انىنەن كەيىن ديماش كورەرمەندەرگە اۋەلى اجەسىن، سودان كەيىن اناسىن تانىستىرىپ، «قازاقتاردا تۇڭعىشىن اتا-اجەسىنە بەرۋ ءداستۇرى بار. ەگەر انامدى ءبىرىنشى اتاسام، ۇيدە داۋ تۋادى» دەپ ادەمى ازىلدەدى. 

سونداي-اق Screaming، «يامايكا»، All By Myself، «گرەشنايا ستراست» سەكىلدى اندەردى ناقىشىنا كەلتىرىپ ورىنداعان ديماش جانر تاڭدامايتىن بىرەگەي ءانشى ەكەنىن كورسەتە ءبىلدى. بۇدان بولەك ديماش وزىنە اسەر ەتكەن ونەر جۇلدىزدارىنا ءان ارناپ، ءاردايىم قولداۋ كورسەتىپ جۇرگەن يگور كرۋتويعا العىس ءبىلدىردى. 

ءوز كەزەگىندە ديماش قۇدايبەرگەن كونتسەرتتىڭ وتۋىنە قولداۋ بىلدىرگەن ازاماتتارعا راحمەتىن ايتتى. 

«راحمەت، ماسكەۋ! ەكى كۇن قاتارىنان  كرەملدە انشلاگ بولدى! سىزدەر ءۇشىن ونەر كورسەتكەنىمە باقىتتىمىن. وسى جوبامەن جۇمىس ىستەگەن بارلىق ادامدارعا شىن جۇرەكتەن العىسىمدى بىلدىرەمىن. بۇگىن «1 كانالدا» كەزدەسەمىز»، دەدى ديماش ينستاگرامداعى جەكە پاراقشاسىندا.
كونتسەرت بارىسىندا ديماش قۇدايبەرگەنگە بىرەگەي سىيلىق بەرگەندەر دە تابىلدى. ماسەلەن، ياكۋتيالىق قولونەر شەبەرى حاارچاانە باپپاگاي سۇيىكتى ءانشىسىنىڭ بەينەسىندەگى قۋىرشاقتى سىيعا تارتتى.

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار