ياكۋتيالىق قولونەر شەبەرى حاارچاانە باپپاگاي سۇيىكتى ءانشىسىنىڭ بەينەسىندەگى قۋىرشاقتى ءسوز قولىمەن جاساعان ەكەن.
قولونەر شەبەرىنىڭ ايتۋىنشا, قۋىرشاقتى جاساۋ وڭايعا تۇسپەكەن ەكەن. ويتكەنى ونى اۋەلى ماسكەۋدە تىگىپ باستاعانىمەن, باليدا جالعاستىرۋعا تۋرا كەلگەن.
«قۋىرشاقتى جاساۋ بارىسىندا ونىڭ بەت الپەتىن ءۇش رەت اۋىستىرۋعا تۋرا كەلدى. ءار كەزەڭ سايىن قيىندىققا تاپ كەلىپ وتىردىم. ءتىپتى, بۇعان دەيىن قۋىرشاق جاساپ جۇرگەن پەش تە ىستەن شىعىپ, جاڭاسىن ساتىپ الدىم» دەپ جازدى ح. باپپاگاي ينستاگرامداعى پاراقشاسىندا.
ايتا كەتەيىك, ديماش قۇدايبەرگەن ناۋرىز مەرەكەسىنە وراي كرەملدە ەكى كۇن كونتسەرت بەرگەن بولاتىن. كرەملگە جينالعان كورەرمەندەر اراسىندا ءانشىنىڭ اتا-اناسى, قازاقستاننىڭ رەسەيدەگى ەلشىسى يمانعالي تاسماعامبەتوۆ, قازاقستاننىڭ مادەنيەت جانە سپورت ءمينيسترى ارىستانبەك مۇحامەدي ۇلى, رەسەي پرەمەر-ءمينيسترىنىڭ جۇبايى سۆەتلانا مەدۆەدەۆا, ەسترادا جۇلدىزدارى جانە باسقا دا قۇرمەتتى قوناقتار بولعان.
ءوز كەزەگىندە ديماش قۇدايبەرگەن كونتسەرتتىڭ وتۋىنە قولداۋ بىلدىرگەن ازاماتتارعا راحمەتىن ايتتى.
«راحمەت, ماسكەۋ! ەكى كۇن قاتارىنان كرەملدە انشلاگ بولدى! سىزدەر ءۇشىن ونەر كورسەتكەنىمە باقىتتىمىن. وسى جوبامەن جۇمىس ىستەگەن بارلىق ادامدارعا شىن جۇرەكتەن العىسىمدى بىلدىرەمىن. بۇگىن «1 كانالدا» كەزدەسەمىز», دەدى ديماش ينستاگرامداعى جەكە پاراقشاسىندا.
