– داريعا نۇرسۇلتانقىزىن بارشاڭىز جاقسى بىلەسىزدەر. ول كوپتەن بەرى سىزدەرمەن تىعىز جۇمىس ىستەپ كەلەدى. قوعامدىق جانە ساياسي قىزمەتتەردە جيناعان تاجىريبەسى مول. تەك قازاقستاندا عانا ەمەس, سونداي-اق شەتەلدە دە تانىمال ساياساتكەر. تۇڭعىش پرەزيدەنت – ەلباسىنىڭ قازاقستان حالقىنىڭ ءال-اۋقاتىن ارتتىرۋ جانە تۇرعىندارعا الەۋمەتتىك تۇرعىدان كورسەتىلەتىن قولداۋدى كۇشەيتۋ جونىندە العا قويعان اۋقىمدى مىندەتتەرى ساپالى زاڭدارمەن قامتاماسىز ەتىلۋى كەرەك. سوندىقتان ءبىز داريعا نازارباەۆاعا وسىنداي جاۋاپتى ميسسيانى جۇكتەپ وتىرمىز. وسىعان بايلانىستى, پارلامەنت سەناتىنىڭ دەپۋتاتتارىنان مەن ۇسىنعان كانديداتۋرانى قولداۋدى سۇرايمىن, – دەدى قاسىم-جومارت توقاەۆ.
جاسىرىن داۋىس بەرۋدىڭ قورىتىندىسى بويىنشا د.نازارباەۆا پارلامەنت سەناتىنىڭ توراعاسى بولىپ سايلاندى.
پارلامەنتتىڭ جوعارى پالاتاسىنىڭ جاڭادان سايلانعان توراعاسى وزىنە زور سەنىم بىلدىرگەن مەملەكەت باسشىسى مەن دەپۋتاتتارعا العىس ايتىپ, بەلگىلەنگەن مىندەتتەرگە قول جەتكىزۋ ءۇشىن بار ءبىلىمى مەن قابىلەتىن جۇمسايتىنىن جەتكىزدى.
سوڭىندا قاسىم-جومارت توقاەۆ داريعا نازارباەۆانىڭ كانديداتۋراسىن قولداعاندارى ءۇشىن دەپۋتاتتارعا ريزاشىلىق ءبىلدىرىپ, سەناتتىڭ جاڭا توراعاسىنىڭ قىزمەتىنە تابىس تىلەدى.
