وقيعا حVIII عاسىردا ءوتىپ, ءوزىنىڭ سۇيىكتىسى دورۆيلگە جاسىرىن تۇرمىسقا شىققان دجۋليانىڭ توڭىرەگىندە ءوربيدى. ول ءوزىنىڭ زاڭدى كۇيەۋىنە تەرەزەدەن جىبەك ساتىنى ءتۇسىرىپ, سول ارقىلى جىگىت سۇيىكتىسىنە كوتەرىلەدى. دجۋليانىڭ نەكەلەسكەنىنەن بەيحابار ونىڭ قامقورشىسى قارت دورمونت قىزدى بلانزاكقا تۇرمىسقا بەرۋگە تىرىسادى. بىرىنەن كەيىن ءبىرى ورىن العان تۇسىنىسپەۋشىلىكتەردىڭ ءمان-جايى انىقتالىپ, سوڭى باقىتتى اياقتالادى.
- ءبىز ۆەنەتسياداعى كارناۆالدى كورسەتەمىز. نەاپول مەن ۆەنەتسيا – بۇل كۇلدىرگى وپەرانىڭ كارناۆالدىق جانە حالىقتىق كەيىپكەرلەرى دۇنيەگە كەلگەن جەرلەر, ولاردىڭ ارقايسىلارىنىڭ ءوز قالىپتارى, تۇلعاسى مەن قىزمەتى بولدى. ءدال وسى بەلگىلەردى ستسەنوگراف كوستيۋمدەردى جاساۋ كەزىندە پايدالانعان. كەيىپكەرلەردىڭ بەينەسى بەتپەردەلەرمەن تولىقتىرىلادى, سەبەبى ۆەنەتسيا مەن كارناۆالدى بەتپەردەسىز ەلەستەتۋ مۇمكىن ەمەس. بۇل تولىققاندى ءبىر اكتىلى سپەكتاكل, مۇندا كەيىپكەرلەر قىزىقتى وقيعالارعا تاپ بولا وتىرىپ, وزدەرىنىڭ ارەكەتتەرىمەن ءبارىن ەلىكتىرەدى. وسىنىڭ بارلىعىنان ماحاببات سالتانات قۇراتىن قىزىقتى وقيعالار جەلىسى تۋىندايدى. بۇل وپەرانىڭ مىندەتى – كوتەرىڭكى كوڭىل-كۇي سىيلاۋ, الايدا ساحنادا ءازىلدى كورسەتۋ وتە قيىن, سوندىقتان ارتىستەردىڭ اكتەرلىك ءبىلىم-داعدىسى بولۋى ءتيىس. كۇلدىرگى وپەرادا سوليستەر كورەرمەندەرگە قۋانىش پەن شاتتىقتى جەتكىزىپ, ءازىل-سىقاقتى تۇسىنە ءبىلۋى كەرەك, سەبەبى يتاليان ءتىلىن بىلمەيتىن تىڭدارمان ساحنادا نە بولىپ جاتقانىن ۆوكاليستەر اراسىنداعى ءىس-قيمىل, ىم-يشارا, قوزعالىس پەن قارىم-قاتىناس ارقىلى ءتۇسىنۋى قاجەت, - دەپ ءتۇسىندىردى قويۋشى رەجيسسەر اللا سيمونيشۆيلي (يتاليا).
ونىمەن بىرگە سپەكتاكل جۇمىسىنا قويۋشى ديريجەر – قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ, ستسەنوگراف جانە كوستيۋمدەر بويىنشا سۋرەتشى – مانانا گۋنيا (يتاليا), جوبانىڭ تەحنيكالىق ديرەكتورى – ۆيكتور كارارە, جوبا ۇيلەستىرۋشىسى – مارجان جاكەنوۆا, كوستيۋمدەر بويىنشا سۋرەتشىنىڭ اسسيستەنتتەرى – جانار مومىنوۆا, ايجان حامزينا قاتىسىپ, ەڭبەك ەتۋدە.
- «جىبەك ساتى» وپەراسىنىڭ كەيبىر ورىنداۋشىلىق كۇردەلىلىگىنە قاراماستان, كورەرمەن قاۋىممەن جەڭىل قابىلدانادى. بۇل جاس انشىلەر ءۇشىن كەرەمەت مەكتەپ بولماق. ارينە, «استانا وپەرا» تەاترى «اۋقىمدى رەپەرتۋار» ءۇشىن جۇمىس جاسايدى, تۋىندىلار گراند وپەرا داۋىرىنەن قويىلادى. جاڭا جوبانى جۇزەگە اسىرۋ – كەرەمەت يدەيا دەپ سانايمىن, سەبەبى كولەمدى سپەكتاكلدەر بار كەزدە كومەديانى جاقسى كورەتىن ءارى باسقا ءبىر دۇنيەنى تاماشالاۋدى قالايتىن كورەرمەن ءۇشىن بالاما قويىلىمدار بولۋى قاجەت. كامەرالىق زالدا اكتەرلەردىڭ جۇمىسىن جاقىنىراق كورىپ, ءتىپتى قويىلىم بارىسىنا قاتىسۋعا دا بولادى. بۇگىندە ءبىز ۆيرتۋالدى نارسەگە ۇيرەنىپ كەتتىك, كەز كەلگەن ساتتە قالاعانىمىزدى الا الامىز, ال وپەرانى جازبا كۇيىندە تىڭداۋ – «جانسىز» مۋزىكانى تىڭداۋمەن بىردەي. تەاتر – بۇل, ەڭ الدىمەن, كۇش-قۋات بەرەدى, بۇل وتە ماڭىزدى, - دەپ قورىتىندىلادى اللا سيمونيشۆيلي.
ەسكە سالار بولساق, 2019 جىل جاستار جىلى بولىپ جاريالانعان ەدى, جانە «Piccolo تەاترى» جاڭا جوباسى جاس دارىنداردى قولداۋعا باعىتتالعان, «استانا وپەرا» سوليستەرى, سونداي-اق جاڭادان باستاپ كەلە جاتقان قازاقستاندىق ۆوكاليستەردىڭ وزدەرىن بار قىرىنان كورسەتە الاتىن شىعارماشىلىق زەرتحاناسى ىسپەتتى. «جىبەك ساتى» وپەراسىنىڭ پرەمەراسى جاس ونەرپازداردىڭ, سونداي-اق تاجىريبەلى ارتىستەردىڭ قاتىسۋىمەن وتەدى. ءار كۇندەرى باستى پارتيالاردى ورىندايتىندار: دورمونت – رامزات بالاكيشيەۆ پەن رۋسلان سوۆەت, دجۋليا – قازاقستاننىڭ ەڭبەك سىڭىرگەن ءارتىسى جاننات باقتاي, قازاقستاننىڭ ەڭبەك سىڭىرگەن قايراتكەرى سالتانات احمەتوۆا, باشقۇرتستاننىڭ ەڭبەك سىڭىرگەن ءارتىسى الفيا كاريموۆا مەن «قۇرمەت» وردەنىنىڭ كاۆالەرى ايزادا كاپونوۆا. ليۋچيللا – سالتانات مۇراتبەكوۆا, ماليكا مينيزيني. دورۆيل – قازاقستاننىڭ ەڭبەك سىڭىرگەن قايراتكەرى جان تاپين, دامير سادۋاقاسوۆ. دجەرمانو – قازاقستاننىڭ ەڭبەك سىڭىرگەن قايراتكەرلەرى سۇندەت بايعوجين مەن ازامات جىلتىركوزوۆ, بلانزاك – ەۆگەني چاينيكوۆ پەن ەرجان سايپوۆ.
