اعايىندى شەتتەتسەڭ, سىرتقا كەتەدى
جۇما, 3 تامىز 2012 7:22
دۇبىرگە تولى دۇنيە
اقش مەملەكەتتىك حاتشىسىنىڭ وڭتۇستىك جانە ورتالىق ازيا جونىندەگى ورىنباسارى روبەرت بلەيك وزبەكستاندى اۋعانستاندى قالپىنا كەلتىرۋگە بايلانىستى ماڭىزدى سەرىكتەسىمىز دەپ سيپاتتادى.
بۇل سيپاتتاما جاي ايتىلا سالعان ءسوز ەمەس, سالماعى بار انىقتاما بولسا, وزبەكستانعا قۇرمەتپەن قاراعىڭ كەلەدى. اڭگىمە اۋعانستاندى قالپىنا كەلتىرۋ جايىندا بولىپ وتىر.
جۇما, 3 تامىز 2012 7:22
دۇبىرگە تولى دۇنيە
اقش مەملەكەتتىك حاتشىسىنىڭ وڭتۇستىك جانە ورتالىق ازيا جونىندەگى ورىنباسارى روبەرت بلەيك وزبەكستاندى اۋعانستاندى قالپىنا كەلتىرۋگە بايلانىستى ماڭىزدى سەرىكتەسىمىز دەپ سيپاتتادى.
بۇل سيپاتتاما جاي ايتىلا سالعان ءسوز ەمەس, سالماعى بار انىقتاما بولسا, وزبەكستانعا قۇرمەتپەن قاراعىڭ كەلەدى. اڭگىمە اۋعانستاندى قالپىنا كەلتىرۋ جايىندا بولىپ وتىر. بۇكىل ناتو وداعىنىڭ ماقساتى دا سول ەلدى باسىپ الۋ, ويرانداۋ ەمەس, ونى ءبۇلدىرۋشى كۇشتەن تازارتۋعا جاعداي جاساۋ ەكەنى بەلگىلى. سول ماقساتقا قولداۋ كورسەتۋ پاراساتتىلىققا ساياتىن قادام. ءوزبەكستاننىڭ سونداي قادامىن ايىپتاۋ قيىن.
بۇل ەلگە ۇجىمدىق قاۋىپسىزدىك شارتى ۇيىمىنان (ۇقشۇ) كەتتىڭ دەپ وكپە ايتامىز, بىراق كۇنى ەرتەڭ ناتو كۇشتەرى اۋعانستاننان كەتكەننەن كەيىن سول تىنىشسىز ەلمەن بەتپە-بەت قالاتىن وزبەكستاننىڭ اقش-پەن, ناتو-مەن بىرىگىپ, ءبىراز شارۋا تىندىرعىسى كەلەتىنىن ءتۇسىنۋگە دە بولادى. ال ءبىزدىڭ كوبىمىزدىڭ تۇسىنگىمىز كەلمەيدى. سول ۇقشۇ-مەن قاتار تاشكەنت ناتو كۇشىن دە پايدالانسا, ول ارتىق پا ەدى؟
ەندى ەكى جىلدان كەيىن ناتو كۇشتەرى اۋعانستاننان تولىق اكەتىلەدى. بۇكىل الەم جابىلىپ جەڭە الماي جاتقان تالىپتەردىڭ سودان كەيىن ارقاسى كەڭيدى. جاقىن ەلدىڭ ءبىرى – وزبەكستان. ءوز ەلىن تىندىرىپ بولعان سوڭ, تالىپتەر ءبۇلدىرۋ ارەكەتىن سولاي قاراي جىلجىتقىسى كەلەتىنى انىق. قام وتىرماي, تاشكەنتتىڭ ارەكەتكە كوشۋى دە زاڭدى. اقش-تاي الىپ ەل, ناتو-داي قۋاتتى وداق ءوزىنىڭ كومەگىن ۇسىنىپ وتىرعاندا, ودان باس تارتۋ ابەستىك كورىنەر ەدى.
كومەك بولعاندا, وتكەن جىلى اقش وزبەكستانعا, تاجىكستانعا, قىرعىزستانعا, ءتىپتى قازاقستانعا دا شەكارانى كۇشەيتۋ, ەسىرتكىگە, لاڭكەستىككە قارسى كۇرەس, جالپى قارۋلى كۇشىن نىعايتۋ ماقساتىندا 170 ميلليون دوللار قارجى ءبولدى. ونى 2014 جىلعا دەيىن جالعاستىرماق. بەرگەن سوڭ, العان ءجون. ونى امەريكالىقتاردىڭ تاكتيكاسى دەسە, سولاي قابىلداۋعا دا بولار. بۇل ءبىرەۋلەرگە ۇنامايدى ەكەن دەپ, ودان باس تارتۋ ءجون بولماس ەدى. تاشكەنتتىڭ الدىنان تاعى ءبىر مۇمكىندىك اشىلىپ وتىر. ەرتەڭگى كۇنى ناتو كۇشتەرى, تەحنيكاسى اۋعانستاننان اكەتىلەدى. سول تەحنيكانىڭ, قارۋ-جاراقتىڭ ءبىرشاماسىن وسىندا قالدىرۋى ىقتيمال. ونى قايتادان سوناۋ الىسقا, ءبىراز ەلدىڭ ۇستىمەن تاسىمالداۋ ءبىراز قارجىنى تالاپ ەتەدى. سوندا ونى وسىندا ارزانداۋ باعاعا ساتىپ كەتۋى ابدەن مۇمكىن. ءتىپتى الداعى ۋاقىتتا قارىم-قاتىناستى جاقسارتۋ ماقساتىندا تەگىن بەرىپ كەتۋ مۇمكىندىگى دە بار. بۇل ءساتتى وزبەكتەر قاپى جىبەرمەۋگە تىرىسادى. جانە ول ءجون دە.
ءسوز باسىندا اقش مەمحاتشىسىنىڭ ورىنباسارى روبەرت بلەيكتىڭ تاشكەنتتى ماڭىزدى ارىپتەس دەپ اتاعانىن ايتتىق. ەندى وسى ايدا سول ارىپتەستىككە اقش-تان بەدەلدى دەلەگاتسيا كەلىپ, ەكى جاقتى پىكىر الىسۋى بولماق. سوندا ءبىراز ءتۇسىنىستىككە قول جەتەر. ورتاق شەشىمگە توقتام جاسالار. بۇل اعايىننان ءبىرشاما الىستاپ قالعان وزبەكتەرگە دە, وسى ماڭنان جاقىن ىزدەگەن امەريكالىقتارعا دا قاجەت, مۇددەلەرىنە ساي.
بۇدان ۇتىلاتىن ماسكەۋ بولادى. اقش-تىڭ بۇل ايماققا ىقپالى ارتادى. ونىڭ ساياسي عانا ەمەس-اۋ, ەكونوميكالىق تا استارى بار. تاشكەنت بۇرىن قارۋدى رەسەيدەن ساتىپ السا, ەندى ونىڭ قاجەتىن اقش, ناتو وتەيدى. اعايىندى سىرتقا تەپكەننىڭ سالدارى سوعان اپارادى.
ماماديار جاقىپ, «ەگەمەن قازاقستان».
