- بارشاڭىزدى بۇگىنگى مەرەكەمەن قۇتتىقتايمىن. بۇل ەرەكشە مەرەكە. سەبەبى 1-ناۋرىز ەلباسىمىزدىڭ شەشىمىمەن اسسامبلەيا كۇنى جانە دە العىس ايتۋ كۇنى بولىپ جاريالانعان بولاتىن. بۇل ەلىمىزدە تۇرىپ جاتقان بارلىق ەتنوستاردىڭ ىنتىماعى, بىرلىگى مەن دوستىعىنىڭ ناعىز سيمۆولىنا اينالعان بىرەگەي ينستيتۋت. العىس ايتۋ كۇنى – بۇل قيىن-قىستاۋ ۋاقىتتى بىرگە وتكەرگەن جانە ەڭ قىسقا مەرزىم ىشىندە تاۋەلسىز قازاقستاندى بىرگە قۇرعان ازاماتتاردىڭ ءبىر-بىرىنە دەگەن ءوزارا قۇرمەتىنىڭ, مەيىرىمدىلىگىنىڭ, دوستىعىنىڭ مەرەكەسى. بۇل ورتاق تاريحىمىزعا, جىلدار بويى ەلىمىزدە دوستىق پەن ءوزارا تۇسىنىكتى قالىپتاستىرعان اعا ۇرپاققا, ءبىزدىڭ اكەلەرىمىز بەن اتالارىمىزعا دەگەن قۇرمەت. سوندىقتان ورتاق مەرەكەمىز قۇتتى بولسىن!, - دەدى سالتاناتتى شارادا سويلەگەن سوزىندە ءوڭىر باسشىسى.
سونداي-اق مەرەكەلىك شاراعا جينالعانداردى «حايمات» نەمىس ەتنومادەني بىرلەستىگىنىڭ توراعاسى ەدۋارد فريتسلەر, «ۆايناح» شەشەن-ينگۋش ەتنومادەني بىرلەستىگىنىڭ اقساقالدار كەڭەسىنىڭ توراعاسى ابۋيازيد حاسيەۆ, كورەي ەتنومادەني بىرلەستىگىنىڭ توراعاسى ۆيتالي ان جانە تاعى باسقا ەتنومادەني بىرلەستىكتەرىنىڭ وكىلدەرى قۇتتىقتادى.
- ءبىر كەزدەرى سوۆەت ۇكىمەتىندە ەدىل بويى رەسپۋبليكاسى بولعان ەدى. مەنىڭ اتا-انام سول جەردە تۋعان, 30 جاسىندا قازاق جەرىنە كوشىرىلگەن ەكەن. مەن قازىر70 جاسقا كەلدىم, وسى جەردە, جىمپيتى اۋدانىندا دۇنيەگە كەلدىم. ءوزىمدى قازاقستاننىڭ تولىققاندى ازاماتىمىن دەپ ەسەپتەيمىن. ويلاپ قاراسام, وتكەن ومىرىمدە قۋانىشپەن ەسكە الاتىن ساتتەرىم كوپ. گرۋزين, ارميان, ەۆرەي, ورىس, قازاقپەن تاتۋ-ءتاتتى ارالاسىپ وستىك. ءوزىم ءالى كۇنگە دەيىن اۋىل شارۋاشىلىعى سالاسىندا ەڭبەك ەتەمىن. ماعان قاراپ-اق قازاقستاننىڭ نەمىستەرى قانداي باقۋاتتى جاعدايدا تۇرىپ جاتقانىن كورىڭىزدەر. مىڭ دا ءبىر العىس! - دەيدى ەدۋارد فريتسلەر.
قازبەك قۇتتىمۇرات ۇلى,
«Egemen Qazaqstan»
سۋرەتتى تۇسىرگەن تەمىربولات توقمامبەتوۆ
باتىس قازاقستان
